Mokṣopāya · Chapter 6.218

cidākāśāś cidākāśe payasīva payorayāḥ /
cittvāj jīvās sphuranty ete ye ta eva manāṃsi naḥ //

viśadākāśarūpāṇi tāny eva ca manāṃsi naḥ /
jaganti tāny anantāni sampannāny abhitas svayam //

sarvabhūtagaṇe mokṣaṃ mahākalpakṣaye gate /
punaẖ kasya kathaṃ sargasaṃvittir upajāyate //

tasmān na kasyacit kiñcit kadācin naśyati kvacit /
na caiva jāyate brahma śāntaṃ dṛśyam ajaṃ sthitam //

vapur jagad idaṃ tasyā nanu nāma mahāciteḥ /
kathaṃ naśyaty anaṣṭāyāṃ tasyāṃ sā ca na naśyati //

saṃvido hṛdayaṃ svapne yathā bhāti jagattayā /
vyomātmaiva tathaivādisargāt prabhṛti bhāsate //

cidvyomāvayavas sargas sargasyaitā daśāḥ kṣayāḥ /
udayāś ceti khaṃ sarvaṃ kiṃ nāśi kim anāśi vā //

yad yad yadātmakaṃ tattvaṃ tad vināśaṃ vinākṣayi /
tasmād brahmātmakaṃ dṛśyaṃ viddhi brahmavad akṣayam //

cinmātre parame vyomni kuta eva bhavābhavau /
kuto bhāvavikārādiẖ kathaṃ vyomni nirākṛtau //

mahākalpādayo bhāvā rāmaitāni jaganti ca /
brahmātmakatayaivāsmin saṃvidbrahmaṇi saṃsthitam //

nirākṛty acchacinmātraṃ dṛśyaṃ saṅkalpya tadvaśam /
yāti yenaiva ghaṭito yakṣas taṃ ghaṭṭayet kila //

avayavāvayavinor dṛśyayor vāpy adṛśyayoḥ /
ekātmanor eva sadā na bhedo 'sti kadācana //

ito bhāva ito 'bhāva itas sarga itaẖ kṣayaḥ /
svabhāvam evānubhavad iti brahmācalaṃ sthitam //

evammaye 'pi parame brahmākāśe na rañjanāḥ /
kāścid evāṅga santīndubimbe viṣalatā yathā //

nirmale paramākāśe kva bhāvābhāvarañjanāḥ /
kvādimadhyāntakalanāẖ kva lokāntaravibhramaḥ //

aparijñānam evaikam atra doṣavad utthitam /
kevalaṃ tat parāvṛtya prekṣaṇāt pariśāmyati //

ajñānaṃ jñaptibodhena parāmṛṣṭaṃ praṇaśyati /
yenaivābhyutthitaṃ tena pavaneneva dīpakaḥ //

ajñānaṃ samparijñātaṃ nāsīd eveti budhyate /
abandhamokṣaṃ brahmaiva sarvam ity avagamyate //

evambodhād dhi yo rāma mokṣa uktas svasaṃvidā /
vicārayann ālabhate nātra kaścana saṃśayaḥ //

idaṃ jagajjālam anādy ajātaṃ brahmettham ābhātam itīha dṛṣṭvā /
vicāradṛṣṭyāṣṭaguṇeśvaratvaṃ paśyaṃs tṛṇaṃ svātmani jīva āste //