Matsya Purana · Chapter 100

purā rathaṃtare kalpe rājāsītpuṣpavāhanaḥ
nāmnā lokeṣu vikhyātas tejasā sūryasaṃnibhaḥ //

tapasā tasya tuṣṭena caturvaktreṇa nārada
kamalaṃ kāñcanaṃ dattaṃ yathākāmagamaṃ mune //

lokaiḥ samastair nagara vāsibhiḥ sahito nṛpaḥ
dvīpāni suralokaṃ ca yatheṣṭaṃ vyacarattadā //

kalpādau saptamaṃ dvīpaṃ tasya puṣkaravāsinaḥ
loke ca pūjitaṃ yasmāt puṣkaradvīpamucyate //

devena brahmaṇā dattaṃ yānamasya yato 'mbujam
puṣpavāhanamityāhus tasmāttaṃ devadānavāḥ //

nāgamyamasyāsti jagattraye 'pi brahmāmbujasthasya tapo 'nubhāvāt
patnī ca tasyāpratimā munīndra nārīsahasrairabhito 'bhinandyā
nāmnā ca lāvaṇyavatī babhūva sā pārvatīveṣṭatamā bhavasya //

tasyātmajānāmayutaṃ babhūva dharmātmanām agryadhanurdharāṇām
tadātmanaḥ sarvamavekṣya rājā muhurmuhur vismayamāsasāda
so 'bhyāgataṃ vīkṣya munipravīraṃ prācetasaṃ vākyamidaṃ babhāṣe //

kasmādvibhūtir amalāmaramartyapūjyā jātā ca sarvavijitāmarasundarīṇām
bhāryā mamālpatapasā paritoṣitena dattaṃ mamāmbujagṛhaṃ ca munīndra dhātrā //

yasminpraviṣṭamapi koṭiśataṃ nṛpāṇāṃ sāmātyakuñjararathaughajanāvṛtānām
no lakṣyate kva gatamambaramadhya indus tārāgaṇairiva gataḥ paritaḥ sphuradbhiḥ //

tasmātkimanyajananījaṭharodbhavena dharmādikaṃ kṛtamaśeṣaphalāptihetuḥ
bhagavanmayātha tanayair athavānayāpi bhadraṃ yadetadakhilaṃ kathaya pracetaḥ //

munirabhyadhādatha bhavāntaritaṃ samīkṣya pṛthvīpateḥ prasabhamadbhutahetuvṛttam
janmābhavattava tu lubdhakule 'tighore jātastvamapyanudinaṃ kila pāpakārī //

vapurapyabhūttava punaḥ puruṣāṅgasaṃdhir durgandhisattvabhujagāvaraṇaṃ samantāt
na ca te suhṛn na sutabandhujano na tātas tv ādṛksvasā na jananī ca tadābhiśastā //

abhisaṃgatā paramabhīṣṭatamā vimukhī mahīśa tava yoṣidiyam
abhūdanāvṛṣṭiratīva raudrā kadācidāhāranimittamasmin
kṣutpīḍitenātha tadā na kiṃcid āsāditaṃ dhānyaphalāmiṣādyam //

athābhidṛṣṭaṃ mahadambujāḍhyaṃ sarovaraṃ paṅkaparītarodhaḥ
padmānyathādāya tato bahūni gataḥ puraṃ vaidiśanāmadheyam //

tanmaulyalābhāya puraṃ samastaṃ bhrāntaṃ tvayāśeṣam ahas tadāsīt
kretā na kaścitkamaleṣu jātaḥ śrānto bhṛśaṃ kṣutparipīḍitaśca //

upaviṣṭastvamekasmin sabhāryo bhavanāṅgaṇe
atha maṅgalaśabdaśca tvayā rātrau mahāñśrutaḥ //

sabhāryastatra gatavān yatrāsau maṅgaladhvaniḥ
tatra maṇḍapamadhyasthā viṣṇorarcāvalokitā //

veśyānaṅgavatī nāma vibhūtidvādaśīvratam
samāptau māghamāsasya lavaṇācalamuttamam //

nivedayantī gurave śayyāṃ copaskarānvitām
alaṃkṛtya hṛṣīkeśaṃ sauvarṇāmarapādapam //

tāṃ tu dṛṣṭvā tatastābhyām idaṃ ca paricintitam
kimebhiḥ kamalaiḥ kāryaṃ varaṃ viṣṇuralaṃkṛtaḥ //

iti bhaktistadā jātā dampatyostu narādhipa
tatprasaṅgātsamabhyarcya keśavaṃ lavaṇācalam
śayyā ca puṣpaprakaraiḥ pūjitā bhūśca sarvataḥ //

athānaṅgavatī tuṣṭā tayordhanaśatatrayam
dīyatāmādideśātha kaladhautaśatatrayam //

na gṛhītaṃ tatastābhyāṃ bahusattvāvalambanāt
anaṅgavatyā ca punas tayorannaṃ caturvidham
ānīya vyāhṛtaṃ cātra bhujyatāmiti bhūpate //

tābhyāṃ tu tadapi tyaktaṃ bhokṣyāvo vai varānane
prasaṅgādupavāsena tavādya sukhamāvayoḥ //

janmaprabhṛti pāpiṣṭhau kukarmāṇau dṛḍhavrate
tatprasaṅgāttayormadhye dharmaleśastu te 'nagha //

iti jāgaraṇaṃ tābhyāṃ tatprasaṅgādanuṣṭhitam
prabhāte ca tadā dattā śayyā salavaṇācalā //

grāmāśca gurave bhaktyā vipreṣu dvādaśaiva tu
vastrālaṃkārasaṃyuktā gāvaśca karakānvitāḥ //

bhojanaṃ ca suhṛnmitra dīnāndhakṛpaṇaiḥ samam
tacca lubdhakadāmpatyaṃ pūjayitvā visarjitam //

sa bhavāṃl lubdhako jātaḥ sapatnīko nṛpeśvaraḥ
puṣkaraprakarāttasmāt keśavasya na pūjanāt //

vinaṣṭāśeṣapāpasya tava puṣkaramandiram
tasya sattvasya māhātmyād alpena tapasā nṛpa //

yathākāmagamaṃ jātaṃ lokanāthaścaturmukhaḥ
saṃtuṣṭastava rājendra brahmarūpī janārdanaḥ //

sāpyanaṅgavatī veśyā kāmadevasya sāmpratam
patnī sapatnī saṃjātā ratyāḥ prītiriti śrutā
lokeṣvānandajananī sakalāmarapūjitā //

tasmādutsṛjya rājendra puṣkaraṃ tanmahītale
gaṅgātaṭaṃ samāśritya vibhūtidvādaśīvratam
kuru rājendra nirvāṇam avaśyaṃ samavāpsyasi //

ityuktvā sa munir brahmaṃs tatraivāntaradhīyata
rājā yathoktaṃ ca punar akarotpuṣpavāhanaḥ //

idamācarato brahmann akhaṇḍavratam ācaret
yathākathaṃcit kamalair dvādaśa dvādaśīr mune //

kartavyāḥ śaktito deyā viprebhyo dakṣiṇānagha
na vittaśāṭhyaṃ kurvīta bhaktyā tuṣyati keśavaḥ //

iti kaluṣatridāraṇaṃ janānāmapi paṭhatīha śṛṇoti cātha bhaktyā /
matimapi ca dadāti devaloke vasati sa koṭiśatāni vatsarāṇām //