Matsya Purana · Chapter 99

śṛṇu nārada vakṣyāmi viṣṇorvratamanuttamam
vibhūtidvādaśī nāma sarvadevanamaskṛtam //

kārttike caitravaiśākhe mārgaśīrṣe ca phālgune
āṣāḍhe vā daśamyāṃ tu śuklāyāṃ laghubhuṅnaraḥ
kṛtvā sāyantanīṃ saṃdhyāṃ gṛhṇīyānniyamaṃ budhaḥ //

ekādaśyāṃ nirāhāraḥ samabhyarcya janārdanam
dvādaśyāṃ dvijasaṃyuktaḥ kariṣye bhojanaṃ vibho //

tadavighnena me yātu saphalaṃ syācca keśava
namo nārāyaṇāyeti vācyaṃ ca svapatā niśi //

tataḥ prabhāta utthāya kṛtasnānajapaḥ śuciḥ
pūjayetpuṇḍarīkākṣaṃ śuklamālyānulepanaiḥ //

vibhūtaye namaḥ pādāv aśokāya ca jānunī
namaḥ śivāyetyūrū ca viśvamūrte namaḥ kaṭim //

kandarpāya namo meḍhram ādityāya namaḥ karau
dāmodarāyetyudaraṃ vāsudevāya ca stanau //

mādhavāyetyuro viṣṇoḥ kaṇṭham utkaṇṭhine namaḥ
śrīdharāya mukhaṃ keśān keśavāyeti nārada //

pṛṣṭhaṃ śārṅgadharāyeti śravaṇau varadāya vai
svanāmnā śaṅkhacakrāsi gadājalajapāṇaye
śiraḥ sarvātmane brahman nama ityabhipūjayet //

matsyamutpalasaṃyuktaṃ haimaṃ kṛtvā tu śaktitaḥ
udakumbhasamāyuktam agrataḥ sthāpayedbudhaḥ //

guḍapātraṃ tilairyuktaṃ sitavastrābhiveṣṭitam
rātrau jāgaraṇaṃ kuryād itihāsakathādinā //

prabhātāyāṃ tu śarvaryāṃ brāhmaṇāya kuṭumbine
sakāñcanotpalaṃ devaṃ sodakumbhaṃ nivedayet //

yathā na mucyase deva sadā sarvavibhūtibhiḥ
tathā māmuddharāśeṣa duḥkhasaṃsārakardamāt //

daśāvatārarūpāṇi pratimāsaṃ kramānmune
dattātreyaṃ tathā vyāsam utpalena samanvitam
dadyādevaṃ samā yāvat pāṣaṇḍānabhivarjayet //

samāpyaivaṃ yathāśaktyā dvādaśa dvādaśīḥ punaḥ
saṃvatsarānte lavaṇa parvatena samanvitām
śayyāṃ dadyānmuniśreṣṭha gurave dhenusaṃyutām //

grāmaṃ ca śaktimāndadyāt kṣetraṃ vā bhavanānvitam
guruṃ sampūjya vidhivad vastrālaṃkārabhūṣaṇaiḥ //

anyānapi yathāśaktyā bhojayitvā dvijottamān
tarpayed vastragodānai ratnaughadhanasaṃcayaiḥ
alpavitto yathāśaktyā stokaṃ stokaṃ samācaret //

yaścāpyatīva niḥsvaḥ syād bhaktimānmādhavaṃ prati
puṣpārcanavidhānena sa kuryādvatsaradvayam //

anena vidhinā yastu vibhūtidvādaśīvratam
kuryātpāpavinirmuktaḥ pitṝṇāṃ tārayecchatam //

janmanāṃ śatasāhasraṃ na śokaphalabhāgbhavet
na ca vyādhirbhavettasya na dāridryaṃ na bandhanam
vaiṣṇavo vātha śaivo vā bhavejjanmani janmani //

yāvadyugasahasrāṇāṃ śatamaṣṭottaraṃ bhavet
tāvatsvarge vasedbrahman bhūpatiśca punarbhavet //