Markandeya Purana · Chapter 13

iti śrīmārkaṇḍeyapurāṇe pitāḥ putrasaṃvāde mahārauravādinarakākhyānaṃ nāma dvādaśo 'dhyāyaḥ
trayodaśo 'dhyāyaḥ
putra uvāca
ahaṃ vaiśyakule jāto janmanyasmāttu saptame /
samatīte gavāṃ rodhaṃ nipāne kṛtavān purā

vipākāt karmaṇastasya narakaṃ bhṛśadāruṇam /
samprāpto 'gniśikhāghoramayomukhakhagākulam

yantrapīḍanagātrāsṛk-pravāhodbhūtakardamam /
viśasyamānaduṣkarmi-tannipātaravākulam

pātyamānasya me tatra sāgraṃ varṣaśataṃ gatam /
mahātāpārtitaptasya tṛṣṇādāhānvitasya ca

tatrāhlādakaraḥ sadyaḥ pavanaḥ sukhaśītalaḥ /
karambha-bālukākumbha-madhyastho me samāgataḥ

tatsamparkādaśeṣāṇāṃ nābhavadyātanā nṛṇām /
mama cāpi yathā svarge svargiṇāṃ nirvṛtiḥ parā

kimetaditi cāhlāda-vistārastimitekṣaṇaiḥ /
dṛṣṭamasmābhirāsannaṃ nararatnamanattamam

yāmyaśca puruṣo ghoro daṇḍahasto 'śaniprabhaḥ /
purato darśayan mārgamiti ehīti vagatha

puruṣaḥ sa tadā dṛṣṭvā yātanāśatasaṃkulam /
narakaṃ prāha taṃ yāmyaṃ kiṅkaraṃ kṛpayānvitaḥ

puruṣa uvāca
bho yāmyapuruṣācakṣva kiṃ mayā duṣkṛtaṃ kṛtam /
yenedaṃ yātanābhīm prāpto 'smi narakaṃ param

vipaściditi vikhyāto janakānāmahaṃ kule /
jāto videhaviṣaye samyaṅmanujapālakaḥ

yajñairmayeṣṭaṃ bahubhirdharmataḥ pālitā mahī /
notsṛṣṭaścaiva saṃgrāmo nātithirvimukho gataḥ

pitṛ-devarṣi-bhṛtyāśca na cāpacaritā mayā /
kṛtā spṛhā ca na mayā parastrīvibhavādiṣu

parvakāleṣu pitarastithikāleṣu devatāḥ /
puruṣaṃ svayamāyānti nipānamiva dhenavaḥ

yataste vimukhā yānti niśvasya gṛhamedhinaḥ /
tasmādiṣṭaśca pūrtaśca dhamau dvāvapi naśyataḥ

pitṛniśvāsavidhvastaṃ saptajanmārjitaṃ śubham /
trijanmaprabhavaṃ daivo niśvāso hantyasaṃśayam

tasmād daive ca pitrye ca nityamevodyato 'bhavam /
so 'haṃ kathamimaṃ prāpto naraṅka bhṛśadāruṇam