Mānavagṛhyasūtra · Chapter 1.10

iti navamaḥ khaṇḍaḥ //9//
daśamaḥ khaṇḍaḥ
prāgudañcaṃ lakṣaṇamuddhṛtyāvokṣya sthaṇiḍalaṃ gomayenopalipya maṇḍalaṃ caturasraṃ vā agniṃ nirmathyābhimukhaṃ praṇayet tatra brahmopaveśanam

darbhāṇāṃ pavitre mantravadutpādyemaṃstoma marhata ityagniṃ parisamuhya paryukṣya paristīrya paścādagnerekavadbahiḥstṛṇāti

udakprāktūlāndarbhānprakṛṣya dakṣiṇāṃstathottarānagreṇāgniṃ dakṣiṇairuttarānavastṛṇāti

dakṣiṇato 'gnerbrahmaṇe saṃstṛṇātyaparaṃ yajamānāya paścārjjhe patnyai aparamaparaṃśākhodakadhārayorlājā dhāryāśca paścādyugadhārasya ca

syonā pṛthivi bhavetyetayāvasthāpya śamīmayīḥ śamyāḥ kṛtvāntagorṣṭhe 'gnimupasamādhāya bhartā bhāryāmabhyudānayati

vāsasonte gṛhītvā-
'aghora cakṣurapatighnyedhi śivā paśubhyaḥ sumanāḥ suvarcāḥ vīrasūdervakāmā syonā śaṃ no bhava dvipade śaṃ catuṣpade' ityabhiparigṛhyābhyudānayati

uttareṇa rathaṃ vānovānuparikramyāntareṇa jvalanavahanāvatikramya dakṣiṇāsyāṃ dhuryuttarasya yugatanmano 'dhastātkanyāmavasthāpya śamyāmutkṛṣya hiraṇyamantardhāya hiraṇyavarṇāḥ śucaya iti tisṛbhiradbhirabhiṣicya ajtraiva bāṇaśabdaṃ kuruteti preṣyati

athāsyai vāsaḥ prayacchati-
yā akṛntanyā atanvanyā āvanyā avāharan
yāścāgnādevyo 'ntānabhito 'tatananta /
tāstvādevyo jarase saṃvyayantvāyuṣmatīdaṃ paridhatsva vāsaḥ-ityahataṃ vāsaḥ- paridhāpyānvārabhyādhārāvājyabhāgau hutvā agnaye janavide svāhetyuttarārdhe juhoti somāya janavide svāheti dakṣiṇārddhe gandharvāya janavide svāheti madhye

yukto vaha yadākūtamiti dvābhyāmagniṃyojayitvā nakṣatramiṣṭvā nakṣatradevatāṃyajettithiṃ tithidevatāmṛtudevatāṃ ca

somodadadgandharvāya gandharvo dadadagnaye /
raviṃ ca putrāṃścādādagnirmahyamatho imām
agnirasyāḥ prathamo jātavedāḥ
so 'syāḥ prajñā muñcatu mṛtyupāśāt /
tadidaṃ rājā varuṇo 'numanyatām /
yathedraṃstrīpautramaganma rudriyāya svāha-
iti hiraṇyagarbha ityaṣṭābhiḥ pratyṛcamājyāhutīrjuhuyāt

yena ca karmaṇecachettatra ca jayān juhuyāt jayānāṃca śrutistāṃ yatoktām /
ākūtyai tvā svāhā, bhūtyai tvā svāha, prayuje tevā svāha, nabhase tvā svāha, aryambhaṇe tvā svāha, samṛdhyai tvā svāha, jayāyai tvā svāha, kāmāya tvā svāhetyṛcā stomaṃ prajāpataya iti ca

śuciḥ pratyaṅṅupayantā tāṃsamīkṣasvetyāha

tasyāṃ samīkṣamāṇāyāṃ japati--
mama vrate te hṛdayaṃ dadhātu mama cittamanucittaṃ te 'stu
mama vācamekamanā juṣasva prajāpatiṣṭhvā niyunaktumahyam-iti

kā nāmāsītyāda

nāmadheye
prokte devasya tvā savituḥ prasave 'śvinorbāhubhyāṃ pūṣṇo hastābhyāṃ hastaṃ gṛhṇābhyasāviti hastaṃ gṛhṇannāma gṛhṇāti /
prāṅmukhyāḥ prātyāṅmuka ūrdhvastiṣṭannāsīnāyā dakṣiṇa muttānaṃ dakṣiṇena nīcārikta mariktena- yathendrohastamagrahīt savitā varuṇo bhagaḥ /
gṛhṇāmi te sau bhagatvāya hastaṃ mayā patyā jaradṛṣṭiryathā sat //
bhago aryamā savitā purandhir mahyaṃ tvādurgārhapatyāya dovāḥ /
yāgre vāk samavadata purā devāsurebhyaḥ /
tāmadya gāthāṃ gāsyāmo yā strīṇāmuttamaṃ manaḥ /
sarasvati predamava subhage vājinīvati
yāṃ tvā viśvasya bhūtasya bhavyasya prāgāyāmyasyāgrataḥ /
amoha masmi sā tvaṃ sā tvamasyāpyamoham //
dyau rahaṃ pṛthivi tvamṛk tvamasi sāmāham //
retoha masmi reto dhattam //
tā eva vivāhāvahai puṃse putrāya karttavai /
śrīye putrāya vedhavai //
rāyasyoṣayā suprajāstvāya suvīryāya //
iti

abhidakṣiṇamānīyāgneḥ paścāt---
etamaśmānamātiṣṭatamaśmeva yuvāṃ sthiro bhavatam
kṛṇvantu viśve devā āyurvā śaradaḥ śatam /
iti dakṣiṇābhyāṃ pabhdyāmaśmānamāsthāpayati

yathendraḥ sahendrāṇyā avāruhad gandhamādanāt /
evaṃ tvamasmādaśmano avaroha saha patnyā //
ārohasva same pādau pra pūrvyāyuṣmatī kanye putravatī bhava /
ityevaṃ dvirāsthāpayati

catuḥ pariṇayati

samitaṃ saṃkalpethāmiti paryāye paryāye brahmā brahmajapaṃ japet