Scripture Library

Mānavagṛhyasūtra · Chapter 1.9

1.9.1

iti aṣṭamaḥ khaṇḍaḥ //8//
navamaḥ khaṇḍaḥ
ṣaḍadhyārhā bhavantyṛtvigācāryo vivāhyo rājā snātakaḥ priyaśceti

1.9.2

aprākaraṇikānvā parisaṃvatsarādarhayanti

1.9.3

prākaraṇikāḥ kartāraḥ sadasyāśca vṛtāḥ

1.9.4

na jīvatpitṛkor'dhyaṃ pratigṛhṇīyāditiśrutirathavā pratigṛhṇīyāt

1.9.6

athainamarhayanti // ManGS_1,9. 5 //
kāṃsye camase vā dadhi madhu cānīya varṣīyasā pidhāyācamanīyaprathamaiḥ pratipadyante

1.9.7

virājo dohosi virājo dohosi virājo dohamaśīya mayi dohaḥ padyāyai virājaḥ kalpatāmityekaika māhrimāṇaṃ pratīkṣate

1.9.8

sāvitreṇa viṣṭaraṃ pratigṛhya ahaṃ varṣma sadṛśānāmudyatāmiva sūryaḥ idaṃ tamabhitiṣṭhāmi yo mā kaścābhidāsatīti japati

1.9.9

rāṣṭrabhṛdasītyācārya āsandīmanumantrayate

1.9.10

mā tvā doṣa ityadhastātpādayorviṣṭaramupakarṣati

1.9.11

viṣṭara āsīnāyai kaikaṃ triḥ prāha

1.9.12

naiva bho ityāha nama ārṣeyāyeti śrutiḥ spṛśatyarghyam

1.9.13

pādyena pādau prakṣālya sāvitreṇa madhuparkaṃ pratigṛhya pratiṣṭhāpyavasāyya namo rudrāya pātrasade namo rudrāya pātrasada iti prādeśenādhyadhi pratidiśaṃ pradakṣiṇaṃ
sarvato 'bhyuddiśati

1.9.14

madhuvātā ṛtāyata iti tisṛbhiraṅgulyā pradakṣiṇaṃ pratyṛcaṃ trirāyauti

1.9.15

amṛtopastaraṇamasītyupastarati

1.9.16

satyaṃ yaśaḥ śrīrmayi śrīḥśrayatāmiti madhuparkaṃ triḥ prāśnāti

1.9.17

amṛtāpidhānamasītyācāmati

1.9.18

suhṛde 'vaśiṣṭaṃ prayacchati

1.9.19

asi pāṇirgāṃ prāha

1.9.20

hato me pāpmānaṃ me hata oṃkuruta iti preṣyati

1.9.21

caturo brāhmaṇānnānāgotrān bhojayate

1.9.22

paśvaṅgaṃ pāyasaṃ vā kārayennāmāṃso madhuparka iti śrutiḥ

1.9.23

yadyutsṛjenmātā rudrāṇāṃ duhitā vasūnāṃ svasādityānāmamṛtasya nābhiḥ /
pranuvocaṃ cikituṣe janāya māgā manāgā maditiṃ vaṅiṣṭa /
bhurbhuvaḥ svarotmutsṛjatu tṛṇānyattu

1.9.24

athālaṃkāraṇamalaṃkaraṇamasi sarvasmā alaṃ me bhūyāsam

1.9.25

praṇāpānau me tarpaya udīnarūpe me tarpaya sucakṣā aha makṣibhyāṃ bhūyāsaṃ suvarcā mukhena suśrutkarṇābhyāṃ bhūyāsāmiti yatāliṅgamaṅgāni saṃspṛśati

1.9.26

atha gandhotsadane vāsasī

1.9.27

paridhāsye yaśo dhāsye dīrghāyutvāya jaradaṣṭirastu
śataṃ jīvemaśaradaḥ purūcī rīyaspoṣamabhisaṃvyayiṣye
yaśasā mādyāvā pṛthivī yaśasendrā bṛhaspatī
yaśo bhagaśca māriṣadyaśo mā prati mucyatāmaṃ
ityahataṃ-vāsaḥ paridhatte

1.9.28

kumāryāḥ pramadane bhagamaryamaṇaṃ pūṣaṇaṃ tvaṣṭāramiti yajati

1.9.29

/
prāksviṣṭakṛtaścatasro avidhavā nandīrupavādayanti

1.9.30

abhyantare kautuke devapatnīrjayati

Original text: Mānavagṛhyasūtra (= Maitrāyaṇīyamānavagṛhyasūtra) · Edition: Ramakrishna Harshaji Sastri: Mānavagṛhyasūtra of the Mitrāyaṇīya Śākhā, Baroda : Central Library 1926 (Gaekwad's Oriental Series, 35) · Data entry members of the Sansknet Project · GRETIL (Göttingen) · CC BY-NC-SA 4.0