Malinivijayottara Tantra · Chapter 9

athaiṣāṃ samayasthānāṃ kuryāddīkṣāṃ yada guruḥ
tadādhivāsanaṃ kṛtvā [lacuna]

sa ca pūrvaṃ diśaṃ samyaksūtramāsphālayettataḥ
tanmadhyātpūrvavāruṇyā vaṅkayeta samāntaram

pūrvāparasamāsena sūtreṇottaradakṣiṇam
aṅkayedaparādaṅkādpūrvādapi tathaiva te

matsyamadhye kṣipetsūtramāyataṃ dakṣiṇottare
matakṣetrārdhamānena madhyāddikṣvaṅkayetsamam

tadvaddiksthācca koṇeṣu anulomavilomataḥ
pātayetteṣu sūtrāṇi caturaśraprasiddhaye

vedāśrite hi haste prākpūrvamardhaṃ vibhājayet
hastārdhaṃ sarvatastyaktvā pūrvodagyāmadiggatam

guṇāṅgulasamairbhāgaiḥ śeṣamasya vibhājayet
tryaṅgulaiḥ koṣṭakairūrdhvaistiryakcāṣṭadvidhātmakaiḥ

dvau dvau bhāgau parityajya punardakṣiṇasaumyagau
brahmaṇaḥ pārśvayorjīvāccaturthātpūrvatastathā

bhāgārdhabhāgamānaṃ tu khaṇḍacandradvayaṃ dvayam
tayorantastṛtīye tu dakṣiṇottarapārśvayoḥ

jīve khaṇḍenduyugalaṃ kuryādantarbhramādbudhaḥ
tayoraparamarmasthaṃ khaṇḍendudvayakoṭigam

bahirmukhabhramaṃ kuryātkhaṇḍacandradvayaṃ dvayam
tadvadbrahmaṇi kurvīta bhāgabhāgārdhasaṃmitam

tato dvitīyabhāgānte brahmaṇaḥ pārśvayordvayoḥ
dve rekhe pūrvage neye bhāgatryaṃśaśame budhaiḥ

ekārdhendūrdhvakoṭisthaṃ brahmasūtrāgrasaṃgataṃ
sūtradvayaṃ prakurvīta madhyaśṛṅgaprasiddhaye

tadagrapārśvayorjīvātsūtramekāntare śritam
ādidvitīyakhaṇḍendu koṇātkoṇāntamāśrayet

tayorevāparājjīvātprathamārdhendukoṇataḥ
tadvadeva nayetsūtraṃ śṛṅgadvitayasiddhaye

kṣetrārdhe cāpare daṇḍo dvikaracchannapañcakaḥ
dvikaraṃ pañca tadbhāgāḥ pañcapīṭhatirohitāḥ

śeṣamanyadbhaveddṛśyaṃ pṛthutvādbhāgasaṃmitam
ṣaḍvistṛtaṃ caturdīrghaṃ tadadho'malasārakam

vedāṅgulaṃ ca tadadho mūlaṃ tīkṣṇāgramiṣyate
ādikṣetrasya kurvīta dikṣu dvāracatuṣṭayam

hastāyāmaṃ tadardhaṃ tu vistarādapi atasamam
dviguṇaṃ bāhyataḥ kuryāttataḥ padmaṃ yathā śṛṇu

ekaikabhāgamānāni kuryādvṛttāni vedavat
dikṣvaṣṭau punarapyaṣṭau jīvasūtrāṇi ṣoḍaśa

dvayordvayoḥ punarmadhye tatsaṃkhyātāni pātayet
eṣāṃ tṛtīyavṛttasthaṃ pārśvajīvasamaṃ bhramam

etadantaṃ prakurvīta tato jīvāgramānayet
yatraiva kutra citsaṅgastatsaṃbandhe sthirīkṛte

tatra kṛtvā nayenmantrī patrāgrāṇāṃ prasiddhaye
ekaikasmin dale kuryātkesarāṇāṃ trayaṃ trayam

dviguṇāṣṭāṅgulaṃ kāryaṃ tadvacchṛṅgakajatrayam
tataḥ prapūjayenmantrī rajobhiḥ sitapūrakaiḥ

raktaiḥ kṛṣṇaistathāpītairharitaiśca viśeṣataḥ
karṇikāḻpītavarṇena mūlamadhyāgradeśataḥ

sitaṃ raktaṃ tathā pītaṃ kāryaṃ kesarajālakam
dalāni śuklavarṇāni prativāraṇayā saha

pītaṃ tadvaccatuṣkoṇaṃ karṇikārdhasamaṃ bahiḥ
sitaraktapītakṛṣṇaistatpādān vahnitaḥ kramāt

caturbhirapi śṛṅgāṇi tribhirmaṇḍalamiṣyate
daṇḍaḥ syānnīlaraktena pītamāmalasārakam

raktaṃ śūlaṃ prakurvīta yattatpūrvaṃ prakalpitam
paścāddvārasya pūrveṇa tyaktvāṅgulacatuṣṭayam

dvāraṃ vedāśri vṛttaṃ vā saṃkīrṇaṃ vā vicitritam
ekadvitripuraṃ tulyaṃ sāmudgamatha vobhayam

kapālakaṇṭhaśobhopa śobhādibahucitritam
vicitrākārasaṃsthānaṃ vallīsūkṣmagṛhānvitam

evamatra suniṣpanne gandhavastreṇa mārjanam
kṛtvā snānaṃ prakurvīta pūrvoktenaiva karmaṇā

praviśya pūrvavanmantrī upaviśya yathā purā
nyasya pūrvoditaṃ sarvaṃ pañcadhā bhairavātmakam

uttare vinyasecchṛṅge devadevaṃ navātmakam
madhye bhairavasadbhāvaṃ dakṣiṇe ratiśekharam

raktatvaṅmāṃsasūtraistu vāmakarṇavibhūṣitam
binduyuktaṃ prameyotaṃ ratiśekharamādiśet

śāktaṃ ca pūrvavatkṛtvā tarpayetpūrvavadbudhaḥ
punarabhyarcya deveśaṃ bhaktyā vijñāpayedidam

gurutvena tvayaivāhamājñātaḥ parameśvara
anugrāhyāstvayā śiṣyāḥ śivaśaktipracoditāḥ

tadete tadvidhāḥ prāptāstvameṣāṃ kurvanugraham
madīyāṃ tanumāviśya yenāhaṃ tvatsamo bhavan

karomyevamiti prokto harṣādutphullalocanaḥ
tataḥ ṣaḍvidhamadhvānamanenādhiṣṭhitaṃ smaret

sṛṣṭyādipañcakarmāṇi niṣpādyānyasya cintayet
śaktibhirjīvamūrtiḥ syāddvidhaivāsya parāparā

mūrtāmūrtatvabhedena māmapyeṣānutiṣṭhati
karaṇatvaṃ prayāntyasya mantrā ye hṛdayādayaḥ

evaṃbhūtaṃ śivaṃ dhyātvā tadgatenāntarātmanā
bhāvyaṃ tanmayamātmānaṃ daśadhāvartayecchivam

triḥkṛtvā sarvamantrāṃśca garbhāvaraṇasaṃsthitān
sitoṣṇīṣaṃ tato buddhvā saptajaptaṃ navātmanā

śivahastaṃ tataḥ kuryātpāśaviśleṣakārakam
prakṣālya gandhatoyena hastaṃ hastena kena cit

gandhadigdho yajeddevaṃ sāṅgamāsanavarjitam
ātmanyālabhanaṃ kuryādgrahaṇaṃ yojanaṃ tathā

viyogaṃ ca tathoddhāraṃ pāśacchedādikaṃ ca yat
evaṃ patitvamāsādya prapañcavyāptitaḥ śivam

bhāvayetpṛthagātmānaṃ tatsamānaguṇaṃ tataḥ
maṇḍalastho'hamevāyaṃ sākṣīvākhilakarmasu

homādhikaraṇatvena vahnāvahamavasthitaḥ
ā yāgāntamahaṃ kumbhe saṃsthito vighnaśāntaye

śiṣyadehe ca tatpāśa viśleṣatvaprasiddhaye
sākṣātsvadehasaṃstho'haṃ kartānugrahakarmaṇaḥ

ityetatsarvamālocya śodhyādhvānaṃ vicintayet
dīkṣāṃ yenādhvanā mantrī śiṣyāṇāṃ kartumicchati

tatraivālocayetsarvaṃ yāyātpadamanāmayam
tatra tenāpṛthagbhūtvā punaḥ saṃcintayedidam

ahameva paraṃ tattvaṃ mayi sarvamidaṃ jagat
adhiṣṭhātā ca kartā ca sarvasyāhamavasthitaḥ

tatsamatvaṃ gato janturmukta ityabhidhīyate
evaṃ saṃcintya bhūyo'pi śodhyamādyaṃ samāśrayet

śiṣyamaṇḍalavahnīnāṃ tatraikaṃ bhāvayetsthitam
śodhyādhvānaṃ tu śiṣyāṇāṃ nyasya dehe puroktavat

svena svenaiva mantreṇa svavyāptidhyānamāśrayet
āgantu sahajaṃ śāktaṃ buddhvādau pāśapañjaraṃ

bāhukaṇṭhaśikhāgreṣu triṣu (vṛt) triguṇatantunā
svamantreṇa tatastattvamāvāhyeṣṭvā pratarpya ca

tatastacchodhyayonīnāṃ vyāpinīṃ yonimānayet
māyānte'dhvani tāmeva śuddhe vidyāṃ vicakṣaṇaḥ

tasyāṃ saṃtarpaṇaṃ kṛtvā śiṣyamastreṇa tāḍayet
ālabhya hṛdaye vidvāñchivahastena taṃ punaḥ

grahaṇaṃ tasya kūrvīta raśmimātrāviyogataḥ
nāḍīmārgeṇa gatvā tu haṃhṛnmantrapuṭīkṛtam

kṛtvātmasthaṃ tato yonau garbhādhānaṃ vicintayet
tryarṇārdhākṣarayā mantrī sarvagarbhakriyānvitam

bhogyabhoktṛtvasāmarthya niṣpattyā jananaṃ budhaḥ
dakṣaśṛṅgasthayā mantrī prakurvīta sulocane

pibatīpūrvikābhiśca astrādyaiḥ parayāpi ca
samyagāhutayo dadyāddaśa pañca vicakṣaṇaḥ

tato'syāparayā kāryaṃ pāśavicchedanaṃ budhaiḥ
bhuvaneśamathāmantrya tattveśvaramathāpi vā

bhogabhāgā[lacuna] paścāttamidamādiśet
bhuvaneśa tvayā nāsya sādhakasya śivājñayā

pratibandhaḥ prakartavyo yātuḥ padamanāmayam
utkṣepaṇaṃ tataḥ kuryāttayaivādhyuṣṭavarṇayā

avyāptimantrasaṃyogatpṛthaṅmārgaviśuddhaye
dadyādekaikaśo dhyātvā āhutīnāṃ trayaṃ trayam

tataḥ pūrṇāhutiṃ dadyātparayā vauṣaḍantayā
śiśumutkṣipya cātmasthaṃ taddehasthaṃ ca kārayet

āhutīnāṃ trayaṃ dadyāddattvā pūrṇāhutiṃ budhaḥ
mahāpāśupatāstreṇa vilomādiviśuddhaye

visarjayitvā vāgīśīṃ tattvaṃ tu tadantaraṃ
vilīnaṃ bhāvayecchuddhamaśuddhe parameśvari

kālāntavyāptisaṃśuddhau kṛtāyāmevamādarāt
bāhupāśaṃ tu taṃ chittvā homayedājyasaṃyutam

māyātattve viśudhe tu kaṇṭhapāśe tathā budhaḥ
māyāntamārgasaṃśuddhau dīkṣākarmaṇi sarvataḥ

kriyāsvanuktamantrāsu yojayedaparāṃ budhaḥ
vidyādisakalānte ca tadvadeva parāparām

yoyayennaiśvarādūrdhvaṃ pibantyādikamaṣṭakam
na cāpi sakalādūrdhvamaṅgaṣaṭkaṃ vicakṣaṇaḥ

niṣkale parayā kāryaṃ yatkiṃ cidvidhicoditam
viśuddhe sakalānte tu śikhāṃ chittvā vicakṣaṇaḥ

hutvā cājyaṃ tataḥ śiṣyaṃ snāpayedanupūrvataḥ
ācamyābhyarcya deveśaṃ sruvamāpūrya sarpiṣā

kṛtvā śiṣyaṃ tathātmasthaṃ mūlamantramanusmaret
śivaśaktiṃ tathātmānaṃ śiṣyaṃ sarpistathānalam

ekīkurvañchanairgaccheddvādaśāntamananyadhīḥ
tatra kumbhakamāsthāya dhyāyan sakalaniṣkalam

tiṣṭhettāvadanudvigno yāvadājyakṣayo bhavet
evaṃ yukte pare tattve guruṇa śivamūrtinā

na bhūyaḥ paśutāmeti dagdhamāyānibandhanaḥ
vidhireṣa samākhyāto dīkṣākarmaṇi bhauvane

itarādhvavidhiṃ muktvā śivayogavidhiṃ tathā
vilomakarma saṃtyajya dviguṇastattvavartmani

tadvacca varṇamārge'pi caturdhā padavartmani
aṣṭadhā mantramārge'pi kalākhye'pi ca taddvidhā

trikhaṇḍe viṃśatiguṇaḥ sa eva parikīrtitaḥ
iti sarvādhvasaṃśuddhiḥ samāsātparikīrtitā

sādhakācāryayoḥ karma kathyamānamataḥ śṛṇu