Malinivijayottara Tantra · Chapter 8

athātaḥ saṃpravakṣyāmi yajanaṃ sarvakāmadam
yasya darśanamātreṇa yoginīsaṃmato bhavet

tatrādau yāgasadanaṃ śubhe kṣetre manoramam
kārayedagnikuṇḍena vartulena samanvitam

pañcaviṃśatiparveṇa samantādardhanābhinā
turyāṃśamekhalenāpi parvauṣṭhena suśobhinā

tataḥ snātvā jitadvandvo bhāvasnānena mantravit
tacca ṣaḍvidhamuddiṣṭaṃ bhasmasnānādyanukramāt

bhasmasnānaṃ mahāstreṇa bhasma saptābhimantritam
malasnānāya saṃhārakrameṇoddhūlayettanum

vidyāṅgaiḥ pañcabhiḥ paścācchiraḥ prabhṛti guṇṭhayet
abhiṣekaṃ tu kurvīta mūlenaiva ṣaḍaṅginā

tato'vāsāḥ suvāsā ca hastau pādau ca dhāvayet
ācamya mārjanaṃ kuryādvidyayā bhūrivarṇayā

nyāsaṃ kṛtvā tu sāmānyāmaghamarṣaṃ dvitīyayā
upasthānaṃ ca mālinyā japeccaikākṣarāṃ parām

jalasnāne'pi cāstreṇa mṛdaṃ saptābhimantritam
pūrvavattanumālabhya malasnānaṃ samācaret

vidhisnānādikaṃ cātra pūrvavatkiṃ tu vāriṇā
sādhāraṇavidhisnāto vidyātritayamantritam

toyaṃ vinikṣipenmūrdhni mantrasnānāya mantravit
rajasā godhutenaiva vāyavyaṃ snānamācaret

mahāstramuccaran gaccheddhyānayukpadasaptakam
tadeva punarāgacchedanusmṛtya parāparām

varṣātapasamāyogāddivyo .apyevaṃvidho mataḥ
kiṃ tu tatra parāṃ mantrī sravantīmamṛtaṃ smaret

astreṇāṅguṣṭhamūlāttu vahnimutthāpya nirdahet
svatanuṃ plāvayetpaścātparayaivāmṛtena tu

sūryādau mantramādāya gacchedastramanusmaran
yāgaveśmāstrasaṃśuddhaṃ viśecchuciranākulaḥ

tatra dvārapatīn pūjya mahāstreṇābhimantritam
puṣpaṃ vinikṣipeddhyātvā jvaladvighnapraśāntaye

daśasvapi tato'streṇa dikṣu saṃkalpya rakṣaṇaṃ
praviśedyāgasadanaṃ vahnivadvahnisaṃyutam

pūrvāsyaḥ saumyavaktro vā viśeṣanyāsamārabhet
tatrādāvastramantreṇa kālānalasamatviṣā

aṅguṣṭhāgrāttanuṃ dagdhāṃ sabāhyābhyantarāṃ smaret
vikīryamāṇaṃ tadbhasma dhyātvā kavacavāyunā

śivabindusamākāramātmānamanucintayet
tato'sya yojayecchaktiṃ so'hamityaparājitaḥ

vidyāmūrtiṃ tato dadhyānmantreṇānena śāṅkari
daṇḍākrāntaṃ mahāprāṇaṃ daṇḍārūḍhaṃ sanābhikam

nitambaṃ tadadhastācca vāmastanamadhaḥ punaḥ
kaṇṭhaṃ ca vāmaśikharaṃ vāmamudrāvibhūṣitam

bindvardhacandrakhaṃ nādaśaktibinduvibhūṣitam
eṣa piṇḍakaro devi navātmaka iti śrutaḥ

sarvasiddhikaraścāyaṃ sarahasyamudāhṛtaḥ
eṣa tryarṇojjhito .adhastāddīrghaiḥ ṣaḍbhiḥ svarairyutaḥ

ṣaḍaṅgāni hṛdādīni jātibhedena kalpayet
kṣayaravalabījaiśca dīptairbinduvibhūṣitaiḥ

vaktrāṇi kalpayetpūrvamūrdhvavaktrāditaḥ kramāt
pratyaṅgavidhisiddhyarthaṃ lalāṭādiṣvatho nyaset

a lalāṭe dvitīyaṃ ca vaktre saṃparikalpayet
i ī netradvaye dattvā u ū karṇadvaye nyaset

ṛ .ṛ nāsāpuṭe tadvadḷ .ḻ gaṇḍadvaye tathā
e ai adhordhvadanteṣu o-aukārau tathoṣṭhayoḥ

aṃ śikhāyāṃ visargeṇa jihvāṃ saṃparikalpayet
dakṣiṇaskandhadordaṇḍa karāṅgulinakheṣu ca

kavargaṃ vinyasedvāme tadvaccādyamanukramāt
ṭatādyau pūrvavadvargau nitamborvādiṣu nyaset

pādyaṃ pārśvadvaye pṛṣṭhe jaṭhare hṛdyanukramāt
tvagraktamāṃsasūtreṣu yavargaṃ parikalpayet

śādyamasthivasāśukraprāṇakopeṣu pañcakam
mūrtyaṅgāni tato dattvā śivamāvāhayedbudhaḥ

prāṇopari nyasennābhiṃ tadūrdhve dakṣiṇāṅgulim
vāmakarṇaprameyotaḥ sarvasiddhipradaḥ śivaḥ

sadbhāvaḥ paramo hyeṣaḥ bhairavasya mahātmanaḥ
aṅgānyanena kāryāṇi pūrvavatsvarabhedataḥ

mūrtiḥ sṛṣṭistritattvaṃ ca aṣṭau mūrtyaṅgasaṃyutāḥ
śivaḥ sāṅgaśca ṣoḍhaiva nyāsaḥ saṃparikīrtitaḥ

asyopari tataḥ śāktaṃ kuryānnyāsaṃ yathā śṛṇu
mūrtau parāparāṃ nyasya tadvaktrāṇi ca mālinīm

parāditritayaṃ paścācchikhāhṛtpādagaṃ nyaset
kavaktrakaṇṭhahṛnnābhiguhyorūpādagaṃ kramāt

aghoryādyaṣṭakaṃ nyasya vidyāṅgāni tu pūrvavat
tatastvāvāhayecchaktiṃ sarvayoginamaskṛtām

jīvaḥ prāṇapuṭāntasthaḥ kālānalasamadyutiḥ
atidīptastu vāmāṅghribhūṣito mūrdhni bindunā

dakṣajānuyutaścāyaṃ sarvamātṛgaṇānvitaḥ
anena prīṇitāḥ sarvā dadate vāñchitaṃ phalam

sadbhāvaḥ paramo hyeṣa mātṛṇāṃ paripaṭhyate
tasmādenāṃ japenmantrī ya icchetsiddhimuttamām

rudraśaktisamāveśo nityamatra pratiṣṭhitaḥ
yasmādeṣā parāśaktirbhedenānena kīrtitā

yāvatyaḥ siddhayastantre sarvāḥ syuranayā kṛtāḥ
aṅgāni kalpayedasyāḥ pūrvavatsvarabhedataḥ

mūrtiḥ savaktrā śaktiśca vidyātritaya eva ca
aghoryādyaṣṭakaṃ ceti tathā vidyāṅgapañcakam

sāṅgāścaiva parā śaktirnyāsaḥ prokto .atha ṣaḍvidhaḥ
yāmalo'yamato nyāsaḥ sarvasiddhiprasiddhaye

vāmo vāyaṃ vidhiḥ kāryo muktimārgāvalambibhiḥ
varṇamantravibhedena pṛthagvā tatphalārthibhiḥ

yāvantaḥ kīrtitā bhedaiḥ śaṃbhuśaktyaṇuvācakāḥ
tāvatsvapyevamevāyaṃ nyāsaḥ pañcavidho mataḥ

kiṃ tu bāhyastu yo yatra sa tatrāṅgasamanvitaḥ
ṣaṣṭhaḥ syāditi sarvatra ṣoḍhaivāyamudāhṛtaḥ

svānuṣṭhānāvirodhena bhāvābhāvavikalpanaiḥ
yāgadravyāṇi sarvāṇi kāryāṇi vidhivadbudhaiḥ

tato'rghapātramādāya bhāvābhāvavikalpitam
tataścāstrāgnisaṃdagdhaṃ śaktyambuplāvitaṃ śuci

kartavyā yasya saṃśuddhiranyasyāpyatra vastunaḥ
tasyānenaiva mārgeṇa prakartavyā vijānatā

na cāsaṃśodhitaṃ vastu kiñcidapyatra kalpayet
tena śuddhaṃ tu sarvaṃ yadaśuddhamapi tacchuci

tadambunā samāpūrya ṣaḍbhiraṅgaiḥ samarpya ca
amṛtīkṛtya sarvāṇi tena dravyāṇi śodhayet

ātmānaṃ pūjayitvā tu kuryādantaḥkṛtiṃ yathā
tathā te kathayiṣyāmi sarvayogigaṇārcite

ādāvauāvādhāraśaktiṃ tu nābhyadhaścaturaṅgulām
dharāṃ surodaṃ potaṃ ca kandaśceti catuṣṭayam

ekaikāṅgulametatsyācchūlasyāmalasārakam
tato nālamanantākhyaṃ daṇḍamasya prakalpayet

lambikāvadhitaścātra śūlordhvaṃ granthiriṣyate
abhittvainaṃ mahādevi pāśajālamahārṇavam

na sa yogamavāpnoti śivena saha mānavaḥ
dharmaṃ jñānaṃ ca vairāgyamaiśvaryaṃ ca catuṣṭayam

koṇeṣu cintayenmantrī āgneyādiṣvanukramāt
gātrakāṇāṃ catuṣkaṃ ca dikṣu pūrvādiṣu smaret

grantherūrdhvaṃ triśūlādho bhavitavyā catuṣkikā
vidyātattvaṃ tadevāhuśchadanatrayasaṃyutam

kakhalambikayormadhye tattattvamanucintayet
padmākṛti kakhatattvamaiśvaraṃ cintayedbudhaḥ

karṇikākesaropetaṃ sabījaṃ vikasatsitam
pūrvapatrāditaḥ paścādvāmādinavakaṃ nyaset

vāmā jyeṣṭhā ca raudrī ca kālī ceti tathā parā
kalavikaraṇī caiva balavikaraṇī tathā

balapramathanī cānyā sarvabhūtadamanyapi
manonmanī ca madhye'pi bhānumārgeṇa vinyaset

vibhvādinavakaṃ cānyadvilomātparikalpayet
vibhurjñānī kriyā cecchā vāgīśī jvālinī tathā

vāmā jyeṣṭhā ca raudrī ca sarvāḥ kālānalaprabhāḥ
brahmaviṣṇuharāḥ pūrvaṃ ye śāktāḥ pratipāditāḥ

dalakesaramadhyasthā maṇḍalānāṃ ta īśvarāḥ
dhvani [?] cārkenduvahnīnāṃ saṃjñeyā paribhāvayet

īśvaraṃ ca mahāpretaṃ prahasantaṃ sacetanam
kālāgnikoṭivapuṣamityevaṃ sarvamāsanam

tasya nābhyutthitaṃ śaktiśūlaśṛṅgatrayaṃ smaret
kakhatrayeṇa niryātaṃ dvādaśāntāvasānakam

cintayettasya śṛṅgeṣu śāktaṃ padmatrayaṃ tataḥ
sarvādhiṣṭhāyakaṃ śuklamāmityetatparamāsanam

tatropari tato mūrtiṃ vidyākhyāmanucintayet
ātmākhyāṃ ca tatastasyāṃ pūrvanyāsaṃ śivātmakam

tato madhye parāṃ śaktiṃ dakṣiṇottarayordvayam
parāparāṃ svarūpeṇa raktavarṇāṃ mahābalām

icchārūpadharāṃ dhyātvā kiṃ cidugrāṃ na bhīṣaṇām
aparāṃ vāmaśṛṅge tu bhīṣaṇāṃ kṛṣṇapiṅgalām

icchārūpadharāṃ devīṃ praṇatārtivināśinīm
parāṃ cāpyāyanīṃ devīṃ candrakoṭyayutaprabhām

ṣaḍvidhe'pi kṛte śākte mūrtyādāvapi cintayet
vidyāṅgapañcakaṃ paścādāgneyyādiṣu vinyaset

agnīśarakṣovāyūnāṃ dakṣiṇe ca yathākrama
śaktyaṅgāni śivāṅgāni tathaiva vidhinā smaret

kiṃ tu śakrādidikṣvastramantraṃ madhye ca locanam
aghorādyaṣṭakaṃ dhyāyedaghoryādyaṣṭakānvitam

sarvāsāmāvṛtatvena lokapālāṃśca bāhyataḥ
sāstrān svamantraiḥ saṃcintya japaṃ paścātsamārabhet

svarūpe tallayo bhūtvā ekaikāṃ daśadhā smaret
jvalatpāvakasaṃkāśāṃ dhyātvā svāhāntamuccaret

sakṛdekaikaśo mantrī homakarmaprasiddhaye
ityeva mānaso yāgaḥ kathitaḥ sāmudāyikaḥ

etattriśūlamuddiṣṭamekadaṇḍaṃ triśaktikam
itthametadavijñāya śaktiśūlaṃ varānane

baddhvāpi khecarīṃ mudrāṃ notpatayatyavanītalāt
ityetacchāmbhavaṃ proktamaṣṭāntaṃ śāktamiṣyate

turyāntamāṇavaṃ vidyāditi śūlatrayaṃ matam
pṛthagyāgavidhānena śakticakraṃ vicintayet

tenāpi khecarīṃ baddhvā tyajatyevaṃ mahītalam
tato'bhimantrya dhānyāni mahāstreṇa trisaptadhā

nikṣipeddikṣu sarvāsu jvalatpāvakavatsmaret
nirvighnaṃ tadgṛhaṃ dhyātvā saṃhṛtyeśadiśaṃ nayet

pañcagavyaṃ tataḥ kuryādvadanaiḥ pañcabhirbudhaḥ
gomūtraṃ gomayaṃ caiva kṣīraṃ dadhi ghṛtaṃ tathā

mantrayedūrdhvaparyantaiḥ ṣaḍaṅgena kuśodakam
mudre dravyāmṛtaṃ baddhvā tattvaṃ tasya vicintayet

tena saṃprokṣayedbhūmiṃ svalpenānyannidhāpayet
vāstuyāgaṃ tataḥ kuryānmālinyuccārayogataḥ

puṣpairañjalimāpūrya phakārādi samuccaret
dhyātvā śaktyantamadhvānaṃ nakārānte vinikṣipet

gandhadhūpādikaṃ dattvā gaṇeśānaṃ prapūjayet
ṣaḍutthamāsanaṃ nyasya praṇavena tatopari

gāmityanena vighneśaṃ gandhapuṣpādibhiryajet
asyāṅgāni gakāreṇa ṣaḍdīrghasvarayogataḥ

trinetraṃ muditaṃ dhyātvā gajāsyaṃ vāmanākṛtim
visarjya siddhikāmastu mahāstramanupūjayet

dattvānantaṃ tathā dharmaṃ jñānaṃ vairāgyameva ca
aiśvaryaṃ karṇikāṃ ceti ṣaḍutthamidamāsanam

asyopari nyaseddhyātvā khaḍgakheṭakadhāriṇam
vikarālaṃ mahādaṃṣṭraṃ mahograṃ bhrūkuṭīmukham

svāṅgaṣaṭkasamopetaṃ diṅmātṛparivāritam
svārṇairevāṅgaṣaṭkaṃ tu phaṭkāraparidīpitam

tadrūpameva saṃcintya tato mātraṣṭakaṃ yajet
indrāṇīṃ pūrvapatre tu savajrāṃ yugapatsmaret

āgneyiṃ śaktihastāṃ tu yāmyāṃ daṇḍakarāṃ tataḥ
nairṛtīṃ varuṇānīṃ ca vāyavīṃ ca vicakṣaṇaḥ

khaḍgapāśadhvajairyuktāṃ cintayedyugapatpriye
kauverīṃ mudgarakarāmīśānīṃ śūlasaṃyutām

gandhapuṣpādibhiḥ pūjya svatantre homamācaret
ādau ca kalaśaṃ kuryātsahasrādhikamantritam

sahasraṃ homayettatra tato japtvā visarjayet
śatamaṣṭottaraṃ pūrṇaṃ paścādyajanamārabhet

tatrādau kumbhamādāya hemādimayamavraṇam
sarvamantrauṣadhīgarbhaṃ gandhāmbuparipūritam

cūtapallavavaktraṃ ca sraksūtrasitakaṇṭhakam
rakṣoghnatilakākrāntaṃ sitavastrayugāvṛtam

śatāṣṭottarasaṃjaptaṃ mūlamantraprapūjitam
vārdhānyapi tathābhūtā kiṃ tu sāstreṇa pūjitā

vikirairāsanaṃ dattvā pūrvoktaṃ tu vicakṣaṇaḥ
indrādīn pūjayetpaścātsvadikṣu proktasasvaraiḥ

avicchinnāṃ tato dhārāṃ vārdhānyā pratipādayet
bhrāmayetkalaśaṃ paścādbrūyallokeśvarānidam

bho bhoḥ śakra tvayā svasyāṃ diśi vighnapraśāntaye
sāvadhānena karmāntaṃ bhavitavyaṃ śivājñayā

nītvā tatrāsane pūrvaṃ mūrtibhūtaṃ ghaṭaṃ nyaset
tasya dakṣiṇadigbhāge vārdhānīṃ viniveśayet

ātmamūrtyādipūjyāntaṃ kumbhe vinyasya mantravit
gandhapuṣpādibhiḥ pūjya vārdhānyāṃ pūjayedimam

gandhairmaṇḍalakaṃ kṛtvā brahmasthāne vicakṣanaḥ
tatra saṃpūjayetṣaṭkaṃ trikaṃ vāpyekameva vā

kuṇḍasyollekhanaṃ lekhaḥ kuṭṭanaṃ copalepanam
catuṣpathākṣavāṭaṃ ca vajrasaṃsthāpanaṃ tathā

kuśāstaraṇaparidhiviṣṭarāṇāṃ ca kalpanam
sarvamastreṇa kūrvīta vidyāmoṃ hrīmiti nyaset

śivamomiti vinyasya saṃpūjya dvitayaṃ punaḥ
tāmrapātre śarāve vā ānayejjātavedasam

śivaśukramiti dhyātvā vidyāyonau vinikṣipet
tatastvāhūtayaḥ pañca vidyāṅgaireva homayet

jananādi tataḥ karma sarvamevaṃkṛte kṛtam
parāparāmanusmṛtya dadyātpūrṇāhutiṃ punaḥ

saṃpūjya mātaraṃ vahneḥ pitaraṃ ca visarjayet
carvādisādhanāyāgniṃ samuddhṛtya tataḥ punaḥ

jvalitasyāthavā vahneścitiṃ vāmena vāyunā
ākṛṣya hṛdi saṃkumbhya dakṣiṇena punaḥ kṣipet

pūrṇāṃ ca pūrvavaddadyācchivāgneraparo vidhiḥ
śivarūpaṃ tamālokya tasyātmāntaḥkṛtiḥ kramāt

kuryādantaḥkṛtiṃ mantrī tato homaṃ samārabhet
mūlaṃ śatena saṃtarpya tadaṅgāni ṣaḍaṅgataḥ

śeṣāṇāṃ mantrajātīnāṃ daśāṃśenaiva tarpaṇam
tataḥ praveśayecchiṣyāñśucīn snātānupoṣitān

praṇamya devadeveśaṃ catuṣṭayagataṃ kramāt
pañcagavyaṃ caruṃ dadyāddantadhāvanameva ca

hṛdayena caroḥ siddhiryājñikaiḥ kṣīrataṇḍulaiḥ
saṃpātaṃ saptabhirmantraistataḥ ṣaḍbhāgabhājitam

śivāgniguruśiṣyāṇāṃ vārdhānīkumbhayoḥ samam
dantakāṣṭhaṃ tato dadyātkṣīravṛkṣasamudbhavam

tasya pātaḥ śubhaḥ prācīsaumyaiśāpyordhvadiggataḥ
aśubho'nyatra tatrāpi homo'ṣṭaśatiko bhavet

bahiḥkarma tataḥ kuryāddikṣu sarvāsu daiśikaḥ
oṃ kṣaḥ kṣaḥ sarvabhūtebhyaḥ svāheti manunāmunā

samācamya kṛtanyāsaḥ samabhyarcya ca śaṅkaram
[lacuna] gṛhe śuciḥ

nyāsaṃ kṛtvā tu śiṣyāṇāmātmanaśca viśeṣataḥ
prabhāte nityakarmādi kṛtvā svapnaṃ vicārayet

śubhaṃ prakāśayetteṣāmaśubhe homamācaret
tataḥ puṣpaphalādīnāṃ suveśābharaṇāḥ striyaḥ

āpaduttaraṇaṃ caiva śubhadeśāvarohaṇam
madyapānaṃ śiraśchedamāmamāṃsasya bhakṣaṇam

devatādarśanaṃ sākṣāttathā viṣṭānulepanam
evaṃvidhaṃ śubhaṃ dṛṣṭvā siddhiṃ prāpnotyabhīpsitām

etadevānyathābhūtaṃ duḥsvapna iti kīrtyate
pakvamāṃsāśanābhyaṅgagartādipatanādikam

tantroktāṃ niṣkṛtiṃ kṛtvā dvijatvāpādanaṃ tataḥ
devāgnigurudevīnāṃ pūjāṃ kṛtvā sadā budhaḥ

eteṣāmanivedyaiva na kiṃ cidapi bhakṣayet
devadravyaṃ gurudravyaṃ caṇḍīdravyaṃ ca varjayet

niṣphalaṃ naiva ceṣṭeta muhūrtamapi mantravit
yogābhyāsarato bhūyānmantrābhyāsarato'pi vā

ityevamādisamayāñśrāvayitvā visarjayet
devadevaṃ tataḥ snānaṃ śiṣyāṇāmātmano'pi vā

kārayecchivakumbhena sarvaduṣkṛtahāriṇā
ityetatsāmayaṃ karma samāsātparikīrtitam