Malinivijayottara Tantra · Chapter 10

atha lakṣaṇasaṃpannaṃ siddhisādhanatatparam
śāstrajñaṃ saṃyataṃ dhīramalubdhamaśaṭhaṃ dṛḍham

aparīkṣya gurustadvatsādhakatve niyojayet
samabhyarcya vidhānena pūrvavatparameśvaram

dvitīye pūrvavatkumbhaṃ hemādimayamavraṇam
sarvatra madhyapadmasya dakṣiṇaṃ dalamāśritam

nāyakānāṃ pṛthaṅmantrān pūjayetkusumādibhiḥ
taṃ saṃtarpya sahasreṇa prakuryādabhiṣecanam

bhadrapīṭhe śubhe sthāpya śrīparṇe dārunirmite
pūrvāmukhamudagvaktraṃ snātaṃ puṣpādyalaṅkṛtam

kṛtamantratanuḥ samyaksamyakca kṛtamaṅgalaḥ
śaṅkhabheryādinirghoṣairvedamaṅgalanisvanaiḥ

sarvarājopacāreṇa kṛtvā tasyābhiṣecanam
sadāśivasamaṃ dhyātvā tatastamapi bhūṣayet

punaḥ saṃpūjya deveśaṃ mantramasmai dadedbudhaḥ
puṣpākṣatatilopetaḥ sajala[lacuna]śvaraṃ nyaset

so'pi mūrdhani taṃ tadvanmūrtimāśritya dakṣiṇam
abhiṣicya tato'streṇa rudraśaktiṃ prakāśayet

sa tayāliṅgya tanmantraṃ sahasreṇa pratarpayet
tadā prabhṛti tanniṣṭhastatsamānaguṇo bhavet

ācāryasyābhiṣeko'yaṃ sa[lacuna]mantravidhiṃ vinā
kiṃ tu tasya [lacuna] adhivāsapadānvitam

evametatpadaṃ prāpyaṃ duṣprāpyamakṛtātmanām
sādhako mantrasiddhyarthaṃ mantravratamupācaret

evaṃ kṛtvābhiṣekoktaṃ snātvā vidyādhipaṃ japet
lakṣamekaṃ daśāṃśena tasya tarpaṇamācaret

pūrvavaccābhiṣekaṃ ca kṛtvā brahmaśiro japet
tallakṣyastanmayo bhūtvā lakṣadvayamatandritaḥ

lakṣadvayaṃ ca rudrāṇīṃ catuṣkaṃ tu puruṣṭutam
lakṣāṇāṃ pañcakaṃ devi mahāpāśupataṃ japet

sitaraktapītakṛṣṇa vicitrāmbarabhūṣaṇaḥ
tataḥ saṃrakṣito mantrairebhirapratimo bhavet

avācyaḥ sarvaduṣṭānāṃ mantratejopabṛṃhitaḥ
evaṃ cīrṇavrato bhūtvā yaṃ sādhayitumicchati

dattvārghaṃ tasya lakṣāṇāṃ japennavakamādarāt
uttamadravyahomācca taddaśāṃśena tarpaṇam

mahākṣmāpapalānyāhuruttamādīni tadvidaḥ
madhyame dviguṇaṃ kṛtvā triguṇaṃ kanyase'pi ca

ājyaguggulanṛsnehā mahāmāṃsasamāḥ matāḥ
dadhibilvapayaḥpadmāḥ kṣmāsamāḥ parikīrtitāḥ

dhātrīdurvāmṛtāmīnāḥ samyagājyasamā matāḥ
tilādyairatha kurvīta navaṣaṭtriguṇaṃ kramāt

pūrvamevamimaṃ kṛtvā siddherarghaṃ dadedbudhaḥ
dattvārghaṃ tu japettāvadyāvatsiddhirabhīpsitā

lakṣeṇaikena pṛthvīśaḥ sabhṛtyabalavāhanaḥ
vaśamānīyate devi dvābhyāṃ rājyamavāpnuyāt

tribhirnidhānasaṃsiddhiścaturbhirbalasiddhayaḥ
pañcabhirmedinī sarvā ṣaḍbhirapsarasāṃ gaṇaḥ

saptabhiḥ sapta lokāśca daśabhistatsamo bhavet
pañcāśadbhistato gacchedavyaktāntaṃ maheśvari

māyāntaṃ ṣaṣtibhirlakṣairīśvarāntamaśītibhiḥ
sakalāvaniparyantaṃ koṭijaptasya siddhyati

athavā vīracittaḥ syātkṛtvā sevāṃ yathoditām
kṛṣṇabhūtadine rātrau vidhimenaṃ samācaret

kṛtvā pūrvoditaṃ yāgaṃ hutvā dravyamathottaram
ūrdhvakāyo japenmantrī suniṣkampottarāmukhaḥ

tāvadyāvatsamāyātā yogeśvaryaḥ samantataḥ
kṛtvā kalakalārāvamatighoraṃ sudāruṇam

bhūmau nipatya tiṣṭhanti veṣṭyāntaḥ sādhakeśvaram
tāsāṃ kṛtvā namaskāraṃ bhittvā vāmāṅgamātmanaḥ

tadutthena tatastāsāṃ dattvārghaṃ tatsamo bhavet
ācāryo'pi ca ṣaṇmāsaṃ maunī pratidinaṃ caret

daśa pañca ca ye mantrāḥ pūrvamuktā mayā tava
pūrvanyāsena saṃnaddhastrikālaṃ vahnikāryakṛt

dhyāyetpūrvoditaṃ śūlaṃ brahmacaryaṃ samāśritaḥ
kṛtvā pūrvoditaṃ yāgaṃ triśaktiparimaṇḍalam

abhiṣiñcettadātmānamādāvante ca daiśikaḥ
evaṃ cīrṇavrato bhūtvā mantrī mantraviduttamaḥ

nigrahānugrahaṃ karma kurvanna pratihanyate
śuddhayorvinyasenmūla madhyāditritaye trayam

vāmāṅguṣṭhe tule netre tarjanyāmastrameva ca
akṣahrīmiti khaṇḍena śabdarāśiṃ niveśayet

naphahrīmityanenāpi śaktimūrtiṃ vicakṣaṇaḥ
viparītamahāmudrā prayogānmūlameva ca

svasthāneṣu tathāṅgāni nyāsaḥ sāmānya ityayam