માલિનીવિજયોત્તરતન્ત્રમ્ · અધ્યાય 8

અથાતઃ સંપ્રવક્ષ્યામિ યજનં સર્વકામદમ્
યસ્ય દર્શનમાત્રેણ યોગિનીસંમતો ભવેત્

તત્રાદૌ યાગસદનં શુભે ક્ષેત્રે મનોરમમ્
કારયેદગ્નિકુણ્ડેન વર્તુલેન સમન્વિતમ્

પઞ્ચવિંશતિપર્વેણ સમન્તાદર્ધનાભિના
તુર્યાંશમેખલેનાપિ પર્વૌષ્ઠેન સુશોભિના

તતઃ સ્નાત્વા જિતદ્વન્દ્વો ભાવસ્નાનેન મન્ત્રવિત્
તચ્ચ ષડ્વિધમુદ્દિષ્ટં ભસ્મસ્નાનાદ્યનુક્રમાત્

ભસ્મસ્નાનં મહાસ્ત્રેણ ભસ્મ સપ્તાભિમન્ત્રિતમ્
મલસ્નાનાય સંહારક્રમેણોદ્ધૂલયેત્તનુમ્

વિદ્યાઙ્ગૈઃ પઞ્ચભિઃ પશ્ચાચ્છિરઃ પ્રભૃતિ ગુણ્ઠયેત્
અભિષેકં તુ કુર્વીત મૂલેનૈવ ષડઙ્ગિના

તતોઽવાસાઃ સુવાસા ચ હસ્તૌ પાદૌ ચ ધાવયેત્
આચમ્ય માર્જનં કુર્યાદ્વિદ્યયા ભૂરિવર્ણયા

ન્યાસં કૃત્વા તુ સામાન્યામઘમર્ષં દ્વિતીયયા
ઉપસ્થાનં ચ માલિન્યા જપેચ્ચૈકાક્ષરાં પરામ્

જલસ્નાનેઽપિ ચાસ્ત્રેણ મૃદં સપ્તાભિમન્ત્રિતમ્
પૂર્વવત્તનુમાલભ્ય મલસ્નાનં સમાચરેત્

વિધિસ્નાનાદિકં ચાત્ર પૂર્વવત્કિં તુ વારિણા
સાધારણવિધિસ્નાતો વિદ્યાત્રિતયમન્ત્રિતમ્

તોયં વિનિક્ષિપેન્મૂર્ધ્નિ મન્ત્રસ્નાનાય મન્ત્રવિત્
રજસા ગોધુતેનૈવ વાયવ્યં સ્નાનમાચરેત્

મહાસ્ત્રમુચ્ચરન્ ગચ્છેદ્ધ્યાનયુક્પદસપ્તકમ્
તદેવ પુનરાગચ્છેદનુસ્મૃત્ય પરાપરામ્

વર્ષાતપસમાયોગાદ્દિવ્યો .અપ્યેવંવિધો મતઃ
કિં તુ તત્ર પરાં મન્ત્રી સ્રવન્તીમમૃતં સ્મરેત્

અસ્ત્રેણાઙ્ગુષ્ઠમૂલાત્તુ વહ્નિમુત્થાપ્ય નિર્દહેત્
સ્વતનું પ્લાવયેત્પશ્ચાત્પરયૈવામૃતેન તુ

સૂર્યાદૌ મન્ત્રમાદાય ગચ્છેદસ્ત્રમનુસ્મરન્
યાગવેશ્માસ્ત્રસંશુદ્ધં વિશેચ્છુચિરનાકુલઃ

તત્ર દ્વારપતીન્ પૂજ્ય મહાસ્ત્રેણાભિમન્ત્રિતમ્
પુષ્પં વિનિક્ષિપેદ્ધ્યાત્વા જ્વલદ્વિઘ્નપ્રશાન્તયે

દશસ્વપિ તતોઽસ્ત્રેણ દિક્ષુ સંકલ્પ્ય રક્ષણં
પ્રવિશેદ્યાગસદનં વહ્નિવદ્વહ્નિસંયુતમ્

પૂર્વાસ્યઃ સૌમ્યવક્ત્રો વા વિશેષન્યાસમારભેત્
તત્રાદાવસ્ત્રમન્ત્રેણ કાલાનલસમત્વિષા

અઙ્ગુષ્ઠાગ્રાત્તનું દગ્ધાં સબાહ્યાભ્યન્તરાં સ્મરેત્
વિકીર્યમાણં તદ્ભસ્મ ધ્યાત્વા કવચવાયુના

શિવબિન્દુસમાકારમાત્માનમનુચિન્તયેત્
તતોઽસ્ય યોજયેચ્છક્તિં સોઽહમિત્યપરાજિતઃ

વિદ્યામૂર્તિં તતો દધ્યાન્મન્ત્રેણાનેન શાઙ્કરિ
દણ્ડાક્રાન્તં મહાપ્રાણં દણ્ડારૂઢં સનાભિકમ્

નિતમ્બં તદધસ્તાચ્ચ વામસ્તનમધઃ પુનઃ
કણ્ઠં ચ વામશિખરં વામમુદ્રાવિભૂષિતમ્

બિન્દ્વર્ધચન્દ્રખં નાદશક્તિબિન્દુવિભૂષિતમ્
એષ પિણ્ડકરો દેવિ નવાત્મક ઇતિ શ્રુતઃ

સર્વસિદ્ધિકરશ્ચાયં સરહસ્યમુદાહૃતઃ
એષ ત્ર્યર્ણોજ્ઝિતો .અધસ્તાદ્દીર્ઘૈઃ ષડ્ભિઃ સ્વરૈર્યુતઃ

ષડઙ્ગાનિ હૃદાદીનિ જાતિભેદેન કલ્પયેત્
ક્ષયરવલબીજૈશ્ચ દીપ્તૈર્બિન્દુવિભૂષિતૈઃ

વક્ત્રાણિ કલ્પયેત્પૂર્વમૂર્ધ્વવક્ત્રાદિતઃ ક્રમાત્
પ્રત્યઙ્ગવિધિસિદ્ધ્યર્થં લલાટાદિષ્વથો ન્યસેત્

અ લલાટે દ્વિતીયં ચ વક્ત્રે સંપરિકલ્પયેત્
ઇ ઈ નેત્રદ્વયે દત્ત્વા ઉ ઊ કર્ણદ્વયે ન્યસેત્

ઋ .ઋ નાસાપુટે તદ્વદૢ .ળ્ ગણ્ડદ્વયે તથા
એ ઐ અધોર્ધ્વદન્તેષુ ઓ-ઔકારૌ તથોષ્ઠયોઃ

અં શિખાયાં વિસર્ગેણ જિહ્વાં સંપરિકલ્પયેત્
દક્ષિણસ્કન્ધદોર્દણ્ડ કરાઙ્ગુલિનખેષુ ચ

કવર્ગં વિન્યસેદ્વામે તદ્વચ્ચાદ્યમનુક્રમાત્
ટતાદ્યૌ પૂર્વવદ્વર્ગૌ નિતમ્બોર્વાદિષુ ન્યસેત્

પાદ્યં પાર્શ્વદ્વયે પૃષ્ઠે જઠરે હૃદ્યનુક્રમાત્
ત્વગ્રક્તમાંસસૂત્રેષુ યવર્ગં પરિકલ્પયેત્

શાદ્યમસ્થિવસાશુક્રપ્રાણકોપેષુ પઞ્ચકમ્
મૂર્ત્યઙ્ગાનિ તતો દત્ત્વા શિવમાવાહયેદ્બુધઃ

પ્રાણોપરિ ન્યસેન્નાભિં તદૂર્ધ્વે દક્ષિણાઙ્ગુલિમ્
વામકર્ણપ્રમેયોતઃ સર્વસિદ્ધિપ્રદઃ શિવઃ

સદ્ભાવઃ પરમો હ્યેષઃ ભૈરવસ્ય મહાત્મનઃ
અઙ્ગાન્યનેન કાર્યાણિ પૂર્વવત્સ્વરભેદતઃ

મૂર્તિઃ સૃષ્ટિસ્ત્રિતત્ત્વં ચ અષ્ટૌ મૂર્ત્યઙ્ગસંયુતાઃ
શિવઃ સાઙ્ગશ્ચ ષોઢૈવ ન્યાસઃ સંપરિકીર્તિતઃ

અસ્યોપરિ તતઃ શાક્તં કુર્યાન્ન્યાસં યથા શૃણુ
મૂર્તૌ પરાપરાં ન્યસ્ય તદ્વક્ત્રાણિ ચ માલિનીમ્

પરાદિત્રિતયં પશ્ચાચ્છિખાહૃત્પાદગં ન્યસેત્
કવક્ત્રકણ્ઠહૃન્નાભિગુહ્યોરૂપાદગં ક્રમાત્

અઘોર્યાદ્યષ્ટકં ન્યસ્ય વિદ્યાઙ્ગાનિ તુ પૂર્વવત્
તતસ્ત્વાવાહયેચ્છક્તિં સર્વયોગિનમસ્કૃતામ્

જીવઃ પ્રાણપુટાન્તસ્થઃ કાલાનલસમદ્યુતિઃ
અતિદીપ્તસ્તુ વામાઙ્ઘ્રિભૂષિતો મૂર્ધ્નિ બિન્દુના

દક્ષજાનુયુતશ્ચાયં સર્વમાતૃગણાન્વિતઃ
અનેન પ્રીણિતાઃ સર્વા દદતે વાઞ્છિતં ફલમ્

સદ્ભાવઃ પરમો હ્યેષ માતૃણાં પરિપઠ્યતે
તસ્માદેનાં જપેન્મન્ત્રી ય ઇચ્છેત્સિદ્ધિમુત્તમામ્

રુદ્રશક્તિસમાવેશો નિત્યમત્ર પ્રતિષ્ઠિતઃ
યસ્માદેષા પરાશક્તિર્ભેદેનાનેન કીર્તિતા

યાવત્યઃ સિદ્ધયસ્તન્ત્રે સર્વાઃ સ્યુરનયા કૃતાઃ
અઙ્ગાનિ કલ્પયેદસ્યાઃ પૂર્વવત્સ્વરભેદતઃ

મૂર્તિઃ સવક્ત્રા શક્તિશ્ચ વિદ્યાત્રિતય એવ ચ
અઘોર્યાદ્યષ્ટકં ચેતિ તથા વિદ્યાઙ્ગપઞ્ચકમ્

સાઙ્ગાશ્ચૈવ પરા શક્તિર્ન્યાસઃ પ્રોક્તો .અથ ષડ્વિધઃ
યામલોઽયમતો ન્યાસઃ સર્વસિદ્ધિપ્રસિદ્ધયે

વામો વાયં વિધિઃ કાર્યો મુક્તિમાર્ગાવલમ્બિભિઃ
વર્ણમન્ત્રવિભેદેન પૃથગ્વા તત્ફલાર્થિભિઃ

યાવન્તઃ કીર્તિતા ભેદૈઃ શંભુશક્ત્યણુવાચકાઃ
તાવત્સ્વપ્યેવમેવાયં ન્યાસઃ પઞ્ચવિધો મતઃ

કિં તુ બાહ્યસ્તુ યો યત્ર સ તત્રાઙ્ગસમન્વિતઃ
ષષ્ઠઃ સ્યાદિતિ સર્વત્ર ષોઢૈવાયમુદાહૃતઃ

સ્વાનુષ્ઠાનાવિરોધેન ભાવાભાવવિકલ્પનૈઃ
યાગદ્રવ્યાણિ સર્વાણિ કાર્યાણિ વિધિવદ્બુધૈઃ

તતોઽર્ઘપાત્રમાદાય ભાવાભાવવિકલ્પિતમ્
તતશ્ચાસ્ત્રાગ્નિસંદગ્ધં શક્ત્યમ્બુપ્લાવિતં શુચિ

કર્તવ્યા યસ્ય સંશુદ્ધિરન્યસ્યાપ્યત્ર વસ્તુનઃ
તસ્યાનેનૈવ માર્ગેણ પ્રકર્તવ્યા વિજાનતા

ન ચાસંશોધિતં વસ્તુ કિઞ્ચિદપ્યત્ર કલ્પયેત્
તેન શુદ્ધં તુ સર્વં યદશુદ્ધમપિ તચ્છુચિ

તદમ્બુના સમાપૂર્ય ષડ્ભિરઙ્ગૈઃ સમર્પ્ય ચ
અમૃતીકૃત્ય સર્વાણિ તેન દ્રવ્યાણિ શોધયેત્

આત્માનં પૂજયિત્વા તુ કુર્યાદન્તઃકૃતિં યથા
તથા તે કથયિષ્યામિ સર્વયોગિગણાર્ચિતે

આદાવૌઆવાધારશક્તિં તુ નાભ્યધશ્ચતુરઙ્ગુલામ્
ધરાં સુરોદં પોતં ચ કન્દશ્ચેતિ ચતુષ્ટયમ્

એકૈકાઙ્ગુલમેતત્સ્યાચ્છૂલસ્યામલસારકમ્
તતો નાલમનન્તાખ્યં દણ્ડમસ્ય પ્રકલ્પયેત્

લમ્બિકાવધિતશ્ચાત્ર શૂલોર્ધ્વં ગ્રન્થિરિષ્યતે
અભિત્ત્વૈનં મહાદેવિ પાશજાલમહાર્ણવમ્

ન સ યોગમવાપ્નોતિ શિવેન સહ માનવઃ
ધર્મં જ્ઞાનં ચ વૈરાગ્યમૈશ્વર્યં ચ ચતુષ્ટયમ્

કોણેષુ ચિન્તયેન્મન્ત્રી આગ્નેયાદિષ્વનુક્રમાત્
ગાત્રકાણાં ચતુષ્કં ચ દિક્ષુ પૂર્વાદિષુ સ્મરેત્

ગ્રન્થેરૂર્ધ્વં ત્રિશૂલાધો ભવિતવ્યા ચતુષ્કિકા
વિદ્યાતત્ત્વં તદેવાહુશ્છદનત્રયસંયુતમ્

કખલમ્બિકયોર્મધ્યે તત્તત્ત્વમનુચિન્તયેત્
પદ્માકૃતિ કખતત્ત્વમૈશ્વરં ચિન્તયેદ્બુધઃ

કર્ણિકાકેસરોપેતં સબીજં વિકસત્સિતમ્
પૂર્વપત્રાદિતઃ પશ્ચાદ્વામાદિનવકં ન્યસેત્

વામા જ્યેષ્ઠા ચ રૌદ્રી ચ કાલી ચેતિ તથા પરા
કલવિકરણી ચૈવ બલવિકરણી તથા

બલપ્રમથની ચાન્યા સર્વભૂતદમન્યપિ
મનોન્મની ચ મધ્યેઽપિ ભાનુમાર્ગેણ વિન્યસેત્

વિભ્વાદિનવકં ચાન્યદ્વિલોમાત્પરિકલ્પયેત્
વિભુર્જ્ઞાની ક્રિયા ચેચ્છા વાગીશી જ્વાલિની તથા

વામા જ્યેષ્ઠા ચ રૌદ્રી ચ સર્વાઃ કાલાનલપ્રભાઃ
બ્રહ્મવિષ્ણુહરાઃ પૂર્વં યે શાક્તાઃ પ્રતિપાદિતાઃ

દલકેસરમધ્યસ્થા મણ્ડલાનાં ત ઈશ્વરાઃ
ધ્વનિ [?] ચાર્કેન્દુવહ્નીનાં સંજ્ઞેયા પરિભાવયેત્

ઈશ્વરં ચ મહાપ્રેતં પ્રહસન્તં સચેતનમ્
કાલાગ્નિકોટિવપુષમિત્યેવં સર્વમાસનમ્

તસ્ય નાભ્યુત્થિતં શક્તિશૂલશૃઙ્ગત્રયં સ્મરેત્
કખત્રયેણ નિર્યાતં દ્વાદશાન્તાવસાનકમ્

ચિન્તયેત્તસ્ય શૃઙ્ગેષુ શાક્તં પદ્મત્રયં તતઃ
સર્વાધિષ્ઠાયકં શુક્લમામિત્યેતત્પરમાસનમ્

તત્રોપરિ તતો મૂર્તિં વિદ્યાખ્યામનુચિન્તયેત્
આત્માખ્યાં ચ તતસ્તસ્યાં પૂર્વન્યાસં શિવાત્મકમ્

તતો મધ્યે પરાં શક્તિં દક્ષિણોત્તરયોર્દ્વયમ્
પરાપરાં સ્વરૂપેણ રક્તવર્ણાં મહાબલામ્

ઇચ્છારૂપધરાં ધ્યાત્વા કિં ચિદુગ્રાં ન ભીષણામ્
અપરાં વામશૃઙ્ગે તુ ભીષણાં કૃષ્ણપિઙ્ગલામ્

ઇચ્છારૂપધરાં દેવીં પ્રણતાર્તિવિનાશિનીમ્
પરાં ચાપ્યાયનીં દેવીં ચન્દ્રકોટ્યયુતપ્રભામ્

ષડ્વિધેઽપિ કૃતે શાક્તે મૂર્ત્યાદાવપિ ચિન્તયેત્
વિદ્યાઙ્ગપઞ્ચકં પશ્ચાદાગ્નેય્યાદિષુ વિન્યસેત્

અગ્નીશરક્ષોવાયૂનાં દક્ષિણે ચ યથાક્રમ
શક્ત્યઙ્ગાનિ શિવાઙ્ગાનિ તથૈવ વિધિના સ્મરેત્

કિં તુ શક્રાદિદિક્ષ્વસ્ત્રમન્ત્રં મધ્યે ચ લોચનમ્
અઘોરાદ્યષ્ટકં ધ્યાયેદઘોર્યાદ્યષ્ટકાન્વિતમ્

સર્વાસામાવૃતત્વેન લોકપાલાંશ્ચ બાહ્યતઃ
સાસ્ત્રાન્ સ્વમન્ત્રૈઃ સંચિન્ત્ય જપં પશ્ચાત્સમારભેત્

સ્વરૂપે તલ્લયો ભૂત્વા એકૈકાં દશધા સ્મરેત્
જ્વલત્પાવકસંકાશાં ધ્યાત્વા સ્વાહાન્તમુચ્ચરેત્

સકૃદેકૈકશો મન્ત્રી હોમકર્મપ્રસિદ્ધયે
ઇત્યેવ માનસો યાગઃ કથિતઃ સામુદાયિકઃ

એતત્ત્રિશૂલમુદ્દિષ્ટમેકદણ્ડં ત્રિશક્તિકમ્
ઇત્થમેતદવિજ્ઞાય શક્તિશૂલં વરાનને

બદ્ધ્વાપિ ખેચરીં મુદ્રાં નોત્પતયત્યવનીતલાત્
ઇત્યેતચ્છામ્ભવં પ્રોક્તમષ્ટાન્તં શાક્તમિષ્યતે

તુર્યાન્તમાણવં વિદ્યાદિતિ શૂલત્રયં મતમ્
પૃથગ્યાગવિધાનેન શક્તિચક્રં વિચિન્તયેત્

તેનાપિ ખેચરીં બદ્ધ્વા ત્યજત્યેવં મહીતલમ્
તતોઽભિમન્ત્ર્ય ધાન્યાનિ મહાસ્ત્રેણ ત્રિસપ્તધા

નિક્ષિપેદ્દિક્ષુ સર્વાસુ જ્વલત્પાવકવત્સ્મરેત્
નિર્વિઘ્નં તદ્ગૃહં ધ્યાત્વા સંહૃત્યેશદિશં નયેત્

પઞ્ચગવ્યં તતઃ કુર્યાદ્વદનૈઃ પઞ્ચભિર્બુધઃ
ગોમૂત્રં ગોમયં ચૈવ ક્ષીરં દધિ ઘૃતં તથા

મન્ત્રયેદૂર્ધ્વપર્યન્તૈઃ ષડઙ્ગેન કુશોદકમ્
મુદ્રે દ્રવ્યામૃતં બદ્ધ્વા તત્ત્વં તસ્ય વિચિન્તયેત્

તેન સંપ્રોક્ષયેદ્ભૂમિં સ્વલ્પેનાન્યન્નિધાપયેત્
વાસ્તુયાગં તતઃ કુર્યાન્માલિન્યુચ્ચારયોગતઃ

પુષ્પૈરઞ્જલિમાપૂર્ય ફકારાદિ સમુચ્ચરેત્
ધ્યાત્વા શક્ત્યન્તમધ્વાનં નકારાન્તે વિનિક્ષિપેત્

ગન્ધધૂપાદિકં દત્ત્વા ગણેશાનં પ્રપૂજયેત્
ષડુત્થમાસનં ન્યસ્ય પ્રણવેન તતોપરિ

ગામિત્યનેન વિઘ્નેશં ગન્ધપુષ્પાદિભિર્યજેત્
અસ્યાઙ્ગાનિ ગકારેણ ષડ્દીર્ઘસ્વરયોગતઃ

ત્રિનેત્રં મુદિતં ધ્યાત્વા ગજાસ્યં વામનાકૃતિમ્
વિસર્જ્ય સિદ્ધિકામસ્તુ મહાસ્ત્રમનુપૂજયેત્

દત્ત્વાનન્તં તથા ધર્મં જ્ઞાનં વૈરાગ્યમેવ ચ
ઐશ્વર્યં કર્ણિકાં ચેતિ ષડુત્થમિદમાસનમ્

અસ્યોપરિ ન્યસેદ્ધ્યાત્વા ખડ્ગખેટકધારિણમ્
વિકરાલં મહાદંષ્ટ્રં મહોગ્રં ભ્રૂકુટીમુખમ્

સ્વાઙ્ગષટ્કસમોપેતં દિઙ્માતૃપરિવારિતમ્
સ્વાર્ણૈરેવાઙ્ગષટ્કં તુ ફટ્કારપરિદીપિતમ્

તદ્રૂપમેવ સંચિન્ત્ય તતો માત્રષ્ટકં યજેત્
ઇન્દ્રાણીં પૂર્વપત્રે તુ સવજ્રાં યુગપત્સ્મરેત્

આગ્નેયિં શક્તિહસ્તાં તુ યામ્યાં દણ્ડકરાં તતઃ
નૈરૃતીં વરુણાનીં ચ વાયવીં ચ વિચક્ષણઃ

ખડ્ગપાશધ્વજૈર્યુક્તાં ચિન્તયેદ્યુગપત્પ્રિયે
કૌવેરીં મુદ્ગરકરામીશાનીં શૂલસંયુતામ્

ગન્ધપુષ્પાદિભિઃ પૂજ્ય સ્વતન્ત્રે હોમમાચરેત્
આદૌ ચ કલશં કુર્યાત્સહસ્રાધિકમન્ત્રિતમ્

સહસ્રં હોમયેત્તત્ર તતો જપ્ત્વા વિસર્જયેત્
શતમષ્ટોત્તરં પૂર્ણં પશ્ચાદ્યજનમારભેત્

તત્રાદૌ કુમ્ભમાદાય હેમાદિમયમવ્રણમ્
સર્વમન્ત્રૌષધીગર્ભં ગન્ધામ્બુપરિપૂરિતમ્

ચૂતપલ્લવવક્ત્રં ચ સ્રક્સૂત્રસિતકણ્ઠકમ્
રક્ષોઘ્નતિલકાક્રાન્તં સિતવસ્ત્રયુગાવૃતમ્

શતાષ્ટોત્તરસંજપ્તં મૂલમન્ત્રપ્રપૂજિતમ્
વાર્ધાન્યપિ તથાભૂતા કિં તુ સાસ્ત્રેણ પૂજિતા

વિકિરૈરાસનં દત્ત્વા પૂર્વોક્તં તુ વિચક્ષણઃ
ઇન્દ્રાદીન્ પૂજયેત્પશ્ચાત્સ્વદિક્ષુ પ્રોક્તસસ્વરૈઃ

અવિચ્છિન્નાં તતો ધારાં વાર્ધાન્યા પ્રતિપાદયેત્
ભ્રામયેત્કલશં પશ્ચાદ્બ્રૂયલ્લોકેશ્વરાનિદમ્

ભો ભોઃ શક્ર ત્વયા સ્વસ્યાં દિશિ વિઘ્નપ્રશાન્તયે
સાવધાનેન કર્માન્તં ભવિતવ્યં શિવાજ્ઞયા

નીત્વા તત્રાસને પૂર્વં મૂર્તિભૂતં ઘટં ન્યસેત્
તસ્ય દક્ષિણદિગ્ભાગે વાર્ધાનીં વિનિવેશયેત્

આત્મમૂર્ત્યાદિપૂજ્યાન્તં કુમ્ભે વિન્યસ્ય મન્ત્રવિત્
ગન્ધપુષ્પાદિભિઃ પૂજ્ય વાર્ધાન્યાં પૂજયેદિમમ્

ગન્ધૈર્મણ્ડલકં કૃત્વા બ્રહ્મસ્થાને વિચક્ષનઃ
તત્ર સંપૂજયેત્ષટ્કં ત્રિકં વાપ્યેકમેવ વા

કુણ્ડસ્યોલ્લેખનં લેખઃ કુટ્ટનં ચોપલેપનમ્
ચતુષ્પથાક્ષવાટં ચ વજ્રસંસ્થાપનં તથા

કુશાસ્તરણપરિધિવિષ્ટરાણાં ચ કલ્પનમ્
સર્વમસ્ત્રેણ કૂર્વીત વિદ્યામોં હ્રીમિતિ ન્યસેત્

શિવમોમિતિ વિન્યસ્ય સંપૂજ્ય દ્વિતયં પુનઃ
તામ્રપાત્રે શરાવે વા આનયેજ્જાતવેદસમ્

શિવશુક્રમિતિ ધ્યાત્વા વિદ્યાયોનૌ વિનિક્ષિપેત્
તતસ્ત્વાહૂતયઃ પઞ્ચ વિદ્યાઙ્ગૈરેવ હોમયેત્

જનનાદિ તતઃ કર્મ સર્વમેવંકૃતે કૃતમ્
પરાપરામનુસ્મૃત્ય દદ્યાત્પૂર્ણાહુતિં પુનઃ

સંપૂજ્ય માતરં વહ્નેઃ પિતરં ચ વિસર્જયેત્
ચર્વાદિસાધનાયાગ્નિં સમુદ્ધૃત્ય તતઃ પુનઃ

જ્વલિતસ્યાથવા વહ્નેશ્ચિતિં વામેન વાયુના
આકૃષ્ય હૃદિ સંકુમ્ભ્ય દક્ષિણેન પુનઃ ક્ષિપેત્

પૂર્ણાં ચ પૂર્વવદ્દદ્યાચ્છિવાગ્નેરપરો વિધિઃ
શિવરૂપં તમાલોક્ય તસ્યાત્માન્તઃકૃતિઃ ક્રમાત્

કુર્યાદન્તઃકૃતિં મન્ત્રી તતો હોમં સમારભેત્
મૂલં શતેન સંતર્પ્ય તદઙ્ગાનિ ષડઙ્ગતઃ

શેષાણાં મન્ત્રજાતીનાં દશાંશેનૈવ તર્પણમ્
તતઃ પ્રવેશયેચ્છિષ્યાઞ્શુચીન્ સ્નાતાનુપોષિતાન્

પ્રણમ્ય દેવદેવેશં ચતુષ્ટયગતં ક્રમાત્
પઞ્ચગવ્યં ચરું દદ્યાદ્દન્તધાવનમેવ ચ

હૃદયેન ચરોઃ સિદ્ધિર્યાજ્ઞિકૈઃ ક્ષીરતણ્ડુલૈઃ
સંપાતં સપ્તભિર્મન્ત્રૈસ્તતઃ ષડ્ભાગભાજિતમ્

શિવાગ્નિગુરુશિષ્યાણાં વાર્ધાનીકુમ્ભયોઃ સમમ્
દન્તકાષ્ઠં તતો દદ્યાત્ક્ષીરવૃક્ષસમુદ્ભવમ્

તસ્ય પાતઃ શુભઃ પ્રાચીસૌમ્યૈશાપ્યોર્ધ્વદિગ્ગતઃ
અશુભોઽન્યત્ર તત્રાપિ હોમોઽષ્ટશતિકો ભવેત્

બહિઃકર્મ તતઃ કુર્યાદ્દિક્ષુ સર્વાસુ દૈશિકઃ
ઓં ક્ષઃ ક્ષઃ સર્વભૂતેભ્યઃ સ્વાહેતિ મનુનામુના

સમાચમ્ય કૃતન્યાસઃ સમભ્યર્ચ્ય ચ શઙ્કરમ્
[લચુન] ગૃહે શુચિઃ

ન્યાસં કૃત્વા તુ શિષ્યાણામાત્મનશ્ચ વિશેષતઃ
પ્રભાતે નિત્યકર્માદિ કૃત્વા સ્વપ્નં વિચારયેત્

શુભં પ્રકાશયેત્તેષામશુભે હોમમાચરેત્
તતઃ પુષ્પફલાદીનાં સુવેશાભરણાઃ સ્ત્રિયઃ

આપદુત્તરણં ચૈવ શુભદેશાવરોહણમ્
મદ્યપાનં શિરશ્છેદમામમાંસસ્ય ભક્ષણમ્

દેવતાદર્શનં સાક્ષાત્તથા વિષ્ટાનુલેપનમ્
એવંવિધં શુભં દૃષ્ટ્વા સિદ્ધિં પ્રાપ્નોત્યભીપ્સિતામ્

એતદેવાન્યથાભૂતં દુઃસ્વપ્ન ઇતિ કીર્ત્યતે
પક્વમાંસાશનાભ્યઙ્ગગર્તાદિપતનાદિકમ્

તન્ત્રોક્તાં નિષ્કૃતિં કૃત્વા દ્વિજત્વાપાદનં તતઃ
દેવાગ્નિગુરુદેવીનાં પૂજાં કૃત્વા સદા બુધઃ

એતેષામનિવેદ્યૈવ ન કિં ચિદપિ ભક્ષયેત્
દેવદ્રવ્યં ગુરુદ્રવ્યં ચણ્ડીદ્રવ્યં ચ વર્જયેત્

નિષ્ફલં નૈવ ચેષ્ટેત મુહૂર્તમપિ મન્ત્રવિત્
યોગાભ્યાસરતો ભૂયાન્મન્ત્રાભ્યાસરતોઽપિ વા

ઇત્યેવમાદિસમયાઞ્શ્રાવયિત્વા વિસર્જયેત્
દેવદેવં તતઃ સ્નાનં શિષ્યાણામાત્મનોઽપિ વા

કારયેચ્છિવકુમ્ભેન સર્વદુષ્કૃતહારિણા
ઇત્યેતત્સામયં કર્મ સમાસાત્પરિકીર્તિતમ્