Malinivijayottara Tantra · Chapter 7

athātaḥ saṃpravakṣyāmi mudrākhyāḥ śivaśaktayaḥ
yābhiḥ saṃrakṣito mantrī mantrasiddhimavāpnuyāt

triśūlaṃ ca tathā padmaṃ śaktiścakraṃ savajrakam
daṇḍadaṃṣṭre mahāpretā mahāmudrā khageśvarī

mahodayā karālā ca khaṭvāṅgaṃ sakapālakam
halaṃ pāśāṅkuśā ghaṇṭā mudgarastriśikho'paraḥ

āvāhasthāpanīrodhā dravyadā natireva ca
amṛtā yogamudreti vijñeyā vīravandite

tarjanīmadhyamānāmā dakṣiṇasya prasāritāḥ
kaṇiṣṭhāṅguṣṭhakākrāntāstriśūlaṃ parikīrtitam

padmākārau karau kṛtvā padmamudrāṃ pradarśayet
saṃmukhau prasṛtau kṛtvā karāvantaritāṅgulī

prasṛte madhyame lagne kaumāryāḥ śaktiriṣyate
uttānavāmamuṣṭestu dakṣa

kṣipenmuṣṭiṃ cakraṃ nārāyaṇīpriyam
uttānavāmakasyordhvaṃ nyaseddakṣamadhomukham

kaniṣṭhāṅguṣṭhakau śliṣṭau śeṣāḥ syurmaṇibandhagā
vajramudreti vikhyātā aindrīsaṃtoṣakārikā

ūrdhvaprasārito muṣṭirdakṣiṇo'ṅguṣṭhagarbhagaḥ
daṇḍamudreti vikhyātā vaivasvatakulapriyā

vāmato vaktragāṃ kuryādvāmamuṣṭeḥ kaniṣṭhikām
daṃṣṭreyaṃ kīrtitā devi cāmuṇḍākulanandinī

vāmajānugataṃ pādaṃ buthastau pṛṣṭhapralambinau
vikṛte locane grīvā bhagnā jihvā prasāritā

sarvayogigaṇasyeṣṭā pretā yogīśvarī matā
hastāvadhomukhau padbhyāṃ hṛdayāntaṃ nayedbudhaḥ

tiryagmukhāntamupari saṃmukhāvūrdhvagau nayet
mahāmudreti vikhyātā dehaśodhanakarmaṇi

sarvakarmakarī caiṣā yogināṃ yogasiddhaye
baddhvā padmāsanaṃ yogī nābhāvakṣeśvaraṃ nyaset

daṇḍākāraṃ tu taṃ tāvannayedyāvatkakhatrayam
nigṛhya tatra tattūrṇaṃ prerayetkhatrayeṇa tu

etāṃ baddhvā mahāvīraḥ khe gatiṃ pratipadyate
adhomukhasya dakṣasya vāmamuttānamūrdhvataḥ

anāmāmadhyame tasya vāmāṅguṣṭhena pīḍayet
tarjanyā tatkaniṣṭhāṃ ca tarjanīṃ ca kaniṣṭhayā

madhyamānāmikābhyāṃ ca tadaṅguṣṭhaṃ nipīḍayet
mudrā mahodayākhyeyaṃ mahodayakarī nṛṇām

anāmikākaniṣṭhābhyāṃ sṛkviṇyau pravidārayet
jihvāṃ ca lālayenmantrī hāhākāraṃ ca kārayet

kruddhadṛṣṭiḥ karāleyaṃ mudrā duṣṭabhayaṅkarī
vāmaskandhagato vāma muṣṭirucchritatarjanī

khaṭvāṅgākhyā smṛtā mudrā kapālamadhunā śṛṇu
nimnaṃ pāṇitalaṃ dakṣamīṣatsaṃkucitāṅguli

kapālamiti vijñeyamadhunā halamucyate
muṣṭibaddhasya dakṣasya tarjanī vāmamuṣṭinā

vakratarjaninā grastā halamudreti kīrtitā
muṣṭyā pṛṣṭhagayordakṣa vāmayostarjanīdvayam

vāmāṅguṣṭhāgrasaṃlagnaṃ pāśaḥ prasṛtakuñcitaḥ
hale muṣṭiryathā vāmo dakṣahīnastathāṅkuśaḥ

adhomukhasthite vāme dakṣiṇāṃ tarjanīṃ budhaḥ
cālayenmadhyadeśasthāṃ ghaṇṭāmudrā priyā matā

karāvūrdhvamukhau kāryāvanyonyāntaritāṅgulī
anāme madhyapṛṣṭhasthe tarjanyau mūlaparvage

madhyame dve yute kārye kaniṣṭhe puruṣāvadhi
tarjanyau madhyapārśvasthe virale parikalpite

mudgarastriśikho hyeṣa kṣaṇādāveśakārakaḥ
karābhyāmañjaliṃ kṛtvā anāmāmūlaparvagau

aṅguṣṭhau kalpayedvidvānmantrāvāhanakarmaṇi
muṣṭī dvāvunnatāṅguṣṭhau sthāpanī parikīrtitā

dvāveva garbhagāṅguṣṭhau vijñeyā saṃnirodhinī
dravyadā tu samākhyātā tra saṃmukhī

hṛdaye saṃmukhau hastau saṃlagnau prasṛtāṅgulī
namaskṛtiriyaṃ mudrā mantravandanakarmaṇi

anyonyāntaritāḥ sarvāḥ karayoraṅgulīḥ sthitāḥ
kaniṣṭhāṃ dakṣiṇāṃ vāme'nāmikāgre niyojayet

dakṣiṇe ca tathā vāmaṃ tarjanīmadhyame tathā
aṅguṣṭhau madhyamūlasthau mudreyamamṛtaprabhā

dakṣiṇaṃ nābhimūle tu vāmasyopari saṃsthitam
tarjanyaṅguṣṭhakau lagnau ucchritau yogakarmaṇi

evaṃ mudrāgaṇaṃ mantrī badhnīyaddhṛdaye budhaḥ
sarvāsāṃ vācakāścāsāmoṃ hrīṃ nāma tato namaḥ