Malinivijayottara Tantra · Chapter 6

athāsya vastujātasya yathā dehe vyavasthitiḥ
kriyate jñānadīkṣāsu tathedānīṃ nigadyate

pādādhaḥ pañcabhūtāni vyāptyā dvyaṅgulayā nyaset
dharātattvaṃ ca gulphāntamabādīni tataḥ kramāt

tadvattundopariṣṭāttu parvaṣaṭkāvasānakam
puṃstattvātkalātattvāntaṃ tattvaṣaṭkaṃ vicintayet

tato māyāditattvāni catvāri susamāhitaḥ
caturaṅgulayā vyāptyā sakalāntāni bhāvayet

śivatattvaṃ tataḥ paścāttejorūpamanākulam
sarveṣāṃ vyāpakatvena sabāhyābhyantaraṃ smaret

ṣaṭtriṃśattattvabhedena nyāso'yaṃ samudāhṛtaḥ
adhunā pañca tattvāni yathā dehe tathocyate

nābherūrdhvaṃ tu yāvatsyātparvaṣaṭkamanukramāt
dharātattvena gulphāntaṃ vyāptaṃ śeṣamihāmbunā

dvāviṃśatiśca parvāṇi tadūrdhvaṃ tejasāvṛtam
tasmāddvādaśa parvāṇi vāyuvyāptirudāhṛtā

ākāśāntaṃ paraṃ śāntaṃ sarveṣāṃ vyāpakaṃ smaret
śaktyādipañcakhaṇḍādhvavidhiṣvapyevamiṣyate

trikhaṇḍe kaṇṭhaparyantamātmatattvamudāhṛtam
vidyātattvamatordhvaṃ ca śivatattvaṃ tu pūrvavat

evaṃ tattvavidhiḥ prokto bhuvanādhvā tathocyate
kālāgnervīrabhadrāntaṃ puraṣoḍaśakaṃ tataḥ

gulphāntaṃ vinyaseddhyātvā yathāvadanupūrvaśaḥ
tasmādekāṅgulavyāptyā lakulīśāditaḥ kramāt

vinyasettu dviraṇḍāntaṃ tryaṅgulaṃ chagalāṇḍakam
tataḥ pādāṅgulavyāptyā devayogāṣṭakaṃ pṛthak

tato'pyardhāṅgulavyāptyā puraṣaṭkamanukramāt
catuṣkaṃ tu dvaye'nyasminnekamekatra cintayet

uttarādikramāddvyekabhedo vidyādike traye
kāle pratyekamuddiṣṭamekaikaṃ tu yathākramaṃ

maṇḍalādhipatīnāṃ tu vyāptirardhāṅgulā matā
tribhāganyūnaparvākhyā tritayasya tathopari

dvitayasya ca saṃpūrṇā pañcakaṃ samudāhṛtam
aṣṭakaṃ pañcakaṃ cānyadevameva vilakṣayet

bhuvanādhvavidhāvatra pūrvavaccintayecchivam
padāni dvividhānyatra vargavidyāvibhedataḥ

teṣāṃ tanmantravadvyāptiryathedānīṃ tathā śṛṇu
caturaṅgulamādyaṃ tu dve cānye'ṣṭāṅgule pṛthak

daśāṅgulāni trīṇyasmādekaṃ pañcadaśāṅgulam
caturbhiradhikaiścānyadvyāpakaṃ navamaṃ mahat

ūnaviṃśatike bhede padānāṃ vyāptirucyate
ekaikaṃ dvyaṅgulaṃ jñeyaṃ tatra pūrvaṃ padatrayam

aṣṭāṅgulāni catvāri daśāṅgulamataḥ param
dvyaṅgule dve pade cānye ṣaḍaṅgulamataḥ param

dvādaśāṅgulamanyacca dve'nye pañcāṅgule pṛthak
padadvayaṃ catuṣparva tathānye dve dviparvaṇī

vyāpakaṃ padamanyacca pūrvavatparikīrtitaṃ
aparo'yaṃ vidhiḥ proktaḥ parāparamataḥ śṛṇu

pūrvavatpṛthivītattvaṃ vijñeyaṃ caturaṅgulam
sārdhadvyaṅgulamānāni dhiṣaṇāntāni lakṣayet

pradhānaṃ tryaṅgulaṃ jñeyaṃ śeṣaṃ pūrvavadādiśet
pare'pi pūrvavatpṛthvī tryaṅgulānyaparāṇi ca

catuṣparva pradhānaṃ ca śeṣaṃ pūrvavadāśrayet
dvividho'pi hi varṇānāṃ ṣaḍvidho bheda ucyate

tattvamārgavidhānena jñātavyaḥ paramārthataḥ
padamantrakalādīnāṃ pūrvasūtrānusārataḥ

tritayatvaṃ prakurvīta tattvavarṇoktavartmanā
itthaṃ bhūtaśarīrasya guruṇā śivamūrtinā

prakartavyā vidhānena dīkṣā sarvaphalapradā