Malinivijayottara Tantra · Chapter 5

athātaḥ saṃpravakṣyāmi bhuvanādhvānamīśvari
ādau kālāgnibhuvanaṃ śodhitavyaṃ prayatnataḥ

avīciḥ kumbhīpākaśca rauravaśca tṛtīyakaḥ
kūṣmāṇḍabhuvane śuddhe sarve śuddhā na saṃśayaḥ

pātālāni tataḥ sapta teṣāmādau mahātalam
rasātalaṃ tataścānyattalātalamataḥ param

sutalaṃ nitalaṃ ceti vitalaṃ talameva ca
hāṭakena viśuddhena sarveṣāṃ śuddhiriṣyate

tadūrdhvaṃ pṛthivī jñeyā saptadvīpārṇavānvitā
devānāmāśrayo merustanmadhye saṃvyavasthitaḥ

bhuvolokastadūrdhve ca svarlokastasya copari
maho janastapaḥ satyamityetallokasaptakam

caturdaśavidho yatra bhūtagrāmaḥ pravartate
sthāvaraḥ sarpajātiśca pakṣijātistathāparā

mṛgasaṃjñaśca paśvākhyaḥ pañcamo'nyaśca mānuṣaḥ
paiśāco rākṣaso yākṣo gāndharvaścaindra eva ca

saumyaśca prājāpatyaśca brāhmaścātra caturdaśa
sarvasyaivāsya saṃśuddhirbrāhme saṃśodhite sati

bhuvanaṃ vaiṣṇavaṃ tasmānmadīyaṃ tadanantaram
tatra śuddhe bhavecchuddhaṃ sarvametanna saṃśayaḥ

kālāgnipūrvakairebhirbhuvanaiḥ pañcabhiḥ priye
śuddhaiḥ sarvamidaṃ śuddhaṃ brahmāṇḍāntarvyavasthitam

tadbahiḥ śatarudrāṇāṃ bhuvanāni pṛthakpṛthak
daśa saṃśodhayetpaścādekaṃ tannāyakāvṛtam

anantaḥ prathamasteṣāṃ kapālīśastathāparaḥ
agnirudro yamaścaiva nairṛto bala eva ca

śīghro nidhīśvaraścaiva sarvavidyādhipo'paraḥ
śaṃbhuśca vīrabhadraśca vidhūmajvalanaprabhaḥ

ebhirdaśaikasaṃkhyātaiḥ śuddhaiḥ śuddhaṃ śataṃ matam
upariṣṭātpurasteṣāmaṣṭakāḥ pañca saṃsthitāḥ

lakulī bhārabhūtiśca diṇḍhyāṣāḍhī sapuṣkarau
naimiṣaṃ ca prabhāsaṃ ca amareśamathāṣṭakam

etatpratyātmakaṃ proktamato guhyātiguhyakam
tatra bhairavakedāramahākālāḥ samadhyamāḥ

āmrātikeśajalpeśaśrīśailāḥ saharīndavaḥ
bhīmeśvaramahendrāṭṭahāsāḥ savimaleśvarāḥ

kanakhalaṃ nākhalaṃ ca kurukṣetraṃ gayā tathā
guhyametattṛtīyaṃ tu pavitramadhunocyate

sthānusvarṇākṣakāvādyau bhadragokarṇakau parau
mahākālāvimukteśarudrakoṭyambarāpadāḥ

sthūlaḥ sthūleśvaraḥ śaṅkukarṇakālañjarāvapi
maṇḍaleśvaramākoṭadviraṇḍachagalāṇḍakau

sthāṇvāṣṭakamiti proktamahaṅkārāvadhi sthitam
devayonyaṣṭakaṃ buddhau kathyamānaṃ mayā śṛṇu

paiśācaṃ rākṣasaṃ yākṣaṃ gāndharvaṃ caindrameva ca
tathā saumyaṃ saprājeśaṃ brāhmamaṣṭamamiṣyate

yogāṣṭakaṃ pradhāne tu tatrādāvakṛtaṃ bhavet
kṛtaṃ ca raibhavaṃ brāhmaṃ vaiṣṇavaṃ tadanantaram

kaumāramaumaṃ śraikaṇṭhamiti yogāṣṭakaṃ tathā
puruṣe vāmabhīmograbhaveśānaikavīrakāḥ

pracaṇḍomādhavājāśca anantaikaśivāvatha
krodheśacaṇḍau vidyāyāṃ saṃvarto jyotireva ca

kalātattve parijñeyau surapañcāntakau pare
ekavīraśikhaṇḍīśaśrīkaṇṭḥāḥ kālamāśritāḥ

mahātejaḥ prabhṛtayoḥ maṇḍaleśānasaṃjñakāḥ
māyātattve sthitāstatra vāmadevabhavodbhavau

ekapiṅgekṣaṇeśānabhuvaneśapuraḥsarāḥ
aṅguṣṭhamātrasahitāḥ kālānalasamatviṣaḥ

vidyātattve'pi pañcāhurbhuvanāni manīṣiṇaḥ
tatra hālāhalaḥ pūrvo rudraḥ krodhastathāparaḥ

ambikā ca aghorā ca vāmadevī ca kīrtyate
īśvare pivanādyāḥ syuraghorāntā maheśvarāḥ

raudrī jyeṣṭhā ca vāmā ca tathā śaktisadāśivau
etāni sakale pañca bhuvanāni vidurbudhāḥ

evaṃ tu sarvatattveṣu śatamaṣṭādaśottaram
bhuvanānāṃ parijñeyaṃ saṅkṣepānna tu vistarāt

śuddhenānena śuddhyanti sarvāṇyapi na saṃśayaḥ
sarvamārgaviśuddhau tu kartavyāyāṃ mahāmatiḥ

sakalāvadhi saṃśodhya śive yogaṃ prakalpayet
bubhukṣoḥ sakalaṃ dhyātvā yogaṃ kurvīta yogavit

ityeṣa kīrtito mārgo bhuvanākhyasya me mataḥ