માલિનીવિજયોત્તરતન્ત્રમ્ · અધ્યાય 5

અથાતઃ સંપ્રવક્ષ્યામિ ભુવનાધ્વાનમીશ્વરિ
આદૌ કાલાગ્નિભુવનં શોધિતવ્યં પ્રયત્નતઃ

અવીચિઃ કુમ્ભીપાકશ્ચ રૌરવશ્ચ તૃતીયકઃ
કૂષ્માણ્ડભુવને શુદ્ધે સર્વે શુદ્ધા ન સંશયઃ

પાતાલાનિ તતઃ સપ્ત તેષામાદૌ મહાતલમ્
રસાતલં તતશ્ચાન્યત્તલાતલમતઃ પરમ્

સુતલં નિતલં ચેતિ વિતલં તલમેવ ચ
હાટકેન વિશુદ્ધેન સર્વેષાં શુદ્ધિરિષ્યતે

તદૂર્ધ્વં પૃથિવી જ્ઞેયા સપ્તદ્વીપાર્ણવાન્વિતા
દેવાનામાશ્રયો મેરુસ્તન્મધ્યે સંવ્યવસ્થિતઃ

ભુવોલોકસ્તદૂર્ધ્વે ચ સ્વર્લોકસ્તસ્ય ચોપરિ
મહો જનસ્તપઃ સત્યમિત્યેતલ્લોકસપ્તકમ્

ચતુર્દશવિધો યત્ર ભૂતગ્રામઃ પ્રવર્તતે
સ્થાવરઃ સર્પજાતિશ્ચ પક્ષિજાતિસ્તથાપરા

મૃગસંજ્ઞશ્ચ પશ્વાખ્યઃ પઞ્ચમોઽન્યશ્ચ માનુષઃ
પૈશાચો રાક્ષસો યાક્ષો ગાન્ધર્વશ્ચૈન્દ્ર એવ ચ

સૌમ્યશ્ચ પ્રાજાપત્યશ્ચ બ્રાહ્મશ્ચાત્ર ચતુર્દશ
સર્વસ્યૈવાસ્ય સંશુદ્ધિર્બ્રાહ્મે સંશોધિતે સતિ

ભુવનં વૈષ્ણવં તસ્માન્મદીયં તદનન્તરમ્
તત્ર શુદ્ધે ભવેચ્છુદ્ધં સર્વમેતન્ન સંશયઃ

કાલાગ્નિપૂર્વકૈરેભિર્ભુવનૈઃ પઞ્ચભિઃ પ્રિયે
શુદ્ધૈઃ સર્વમિદં શુદ્ધં બ્રહ્માણ્ડાન્તર્વ્યવસ્થિતમ્

તદ્બહિઃ શતરુદ્રાણાં ભુવનાનિ પૃથક્પૃથક્
દશ સંશોધયેત્પશ્ચાદેકં તન્નાયકાવૃતમ્

અનન્તઃ પ્રથમસ્તેષાં કપાલીશસ્તથાપરઃ
અગ્નિરુદ્રો યમશ્ચૈવ નૈરૃતો બલ એવ ચ

શીઘ્રો નિધીશ્વરશ્ચૈવ સર્વવિદ્યાધિપોઽપરઃ
શંભુશ્ચ વીરભદ્રશ્ચ વિધૂમજ્વલનપ્રભઃ

એભિર્દશૈકસંખ્યાતૈઃ શુદ્ધૈઃ શુદ્ધં શતં મતમ્
ઉપરિષ્ટાત્પુરસ્તેષામષ્ટકાઃ પઞ્ચ સંસ્થિતાઃ

લકુલી ભારભૂતિશ્ચ દિણ્ઢ્યાષાઢી સપુષ્કરૌ
નૈમિષં ચ પ્રભાસં ચ અમરેશમથાષ્ટકમ્

એતત્પ્રત્યાત્મકં પ્રોક્તમતો ગુહ્યાતિગુહ્યકમ્
તત્ર ભૈરવકેદારમહાકાલાઃ સમધ્યમાઃ

આમ્રાતિકેશજલ્પેશશ્રીશૈલાઃ સહરીન્દવઃ
ભીમેશ્વરમહેન્દ્રાટ્ટહાસાઃ સવિમલેશ્વરાઃ

કનખલં નાખલં ચ કુરુક્ષેત્રં ગયા તથા
ગુહ્યમેતત્તૃતીયં તુ પવિત્રમધુનોચ્યતે

સ્થાનુસ્વર્ણાક્ષકાવાદ્યૌ ભદ્રગોકર્ણકૌ પરૌ
મહાકાલાવિમુક્તેશરુદ્રકોટ્યમ્બરાપદાઃ

સ્થૂલઃ સ્થૂલેશ્વરઃ શઙ્કુકર્ણકાલઞ્જરાવપિ
મણ્ડલેશ્વરમાકોટદ્વિરણ્ડછગલાણ્ડકૌ

સ્થાણ્વાષ્ટકમિતિ પ્રોક્તમહઙ્કારાવધિ સ્થિતમ્
દેવયોન્યષ્ટકં બુદ્ધૌ કથ્યમાનં મયા શૃણુ

પૈશાચં રાક્ષસં યાક્ષં ગાન્ધર્વં ચૈન્દ્રમેવ ચ
તથા સૌમ્યં સપ્રાજેશં બ્રાહ્મમષ્ટમમિષ્યતે

યોગાષ્ટકં પ્રધાને તુ તત્રાદાવકૃતં ભવેત્
કૃતં ચ રૈભવં બ્રાહ્મં વૈષ્ણવં તદનન્તરમ્

કૌમારમૌમં શ્રૈકણ્ઠમિતિ યોગાષ્ટકં તથા
પુરુષે વામભીમોગ્રભવેશાનૈકવીરકાઃ

પ્રચણ્ડોમાધવાજાશ્ચ અનન્તૈકશિવાવથ
ક્રોધેશચણ્ડૌ વિદ્યાયાં સંવર્તો જ્યોતિરેવ ચ

કલાતત્ત્વે પરિજ્ઞેયૌ સુરપઞ્ચાન્તકૌ પરે
એકવીરશિખણ્ડીશશ્રીકણ્ટ્ઃઆઃ કાલમાશ્રિતાઃ

મહાતેજઃ પ્રભૃતયોઃ મણ્ડલેશાનસંજ્ઞકાઃ
માયાતત્ત્વે સ્થિતાસ્તત્ર વામદેવભવોદ્ભવૌ

એકપિઙ્ગેક્ષણેશાનભુવનેશપુરઃસરાઃ
અઙ્ગુષ્ઠમાત્રસહિતાઃ કાલાનલસમત્વિષઃ

વિદ્યાતત્ત્વેઽપિ પઞ્ચાહુર્ભુવનાનિ મનીષિણઃ
તત્ર હાલાહલઃ પૂર્વો રુદ્રઃ ક્રોધસ્તથાપરઃ

અમ્બિકા ચ અઘોરા ચ વામદેવી ચ કીર્ત્યતે
ઈશ્વરે પિવનાદ્યાઃ સ્યુરઘોરાન્તા મહેશ્વરાઃ

રૌદ્રી જ્યેષ્ઠા ચ વામા ચ તથા શક્તિસદાશિવૌ
એતાનિ સકલે પઞ્ચ ભુવનાનિ વિદુર્બુધાઃ

એવં તુ સર્વતત્ત્વેષુ શતમષ્ટાદશોત્તરમ્
ભુવનાનાં પરિજ્ઞેયં સઙ્ક્ષેપાન્ન તુ વિસ્તરાત્

શુદ્ધેનાનેન શુદ્ધ્યન્તિ સર્વાણ્યપિ ન સંશયઃ
સર્વમાર્ગવિશુદ્ધૌ તુ કર્તવ્યાયાં મહામતિઃ

સકલાવધિ સંશોધ્ય શિવે યોગં પ્રકલ્પયેત્
બુભુક્ષોઃ સકલં ધ્યાત્વા યોગં કુર્વીત યોગવિત્

ઇત્યેષ કીર્તિતો માર્ગો ભુવનાખ્યસ્ય મે મતઃ