Malinivijayottara Tantra · Chapter 4

athaitadupasaṃśrutya munayo muditekṣaṇāḥ
praṇamya krauñcahantāraṃ punarūcuridaṃ vacaḥ

yogamārgavidhiṃ devyā pṛṣṭena parameṣṭhinā
tatpratijñāvatāpyuktaṃ kimarthaṃ mantralakṣaṇam

evamuktaḥ sa taiḥ samyakkārtikeyo mahāmatiḥ
idamāha vacasteṣāṃ saṃdehavinivṛttaye

yogamekatvamicchanti vastuno'nyena vastunā
yadvastu jñeyamityuktaṃ heyatvādiprasiddhaye

dvirūpamapi tajjñānaṃ vinā jñātuṃ na śakyate
tatprasiddhyai śivenoktaṃ jñānaṃ yadupavarṇitam

sabījayogasaṃsiddhyai mantralakṣaṇamapyalam
na cādhikāritā dīkṣāṃ vinā yoge'sti śāṅkare

kriyājñānavibhedena sā ca dvedhā nigadyate
dvividhā sā prakartavyā tena caitadudāhṛtam

na ca yogādhikāritvamekamevānayā bhavet
api mantrādhikāritvaṃ muktiśca śivadīkṣayā

śrutvā caitatpatervākyaṃ romāñcitaśarīriṇī
idamāha punarvākyamambā munivarottamāḥ

abhinnamālinīkāye tattvāni bhuvanāni ca
kalāḥ padāni mantrāśca yathāvadavadhāritāḥ

bhinnayonistu yā deva tvayoktā mālinī mama
tasyā aṅge yathaitāni saṃsthitāni tathā vada

evamukto mahādevyā bhairavo bhūribhogadaḥ
sphuraddhimāṃśusaṃtānaprakāśitadigantaraḥ

surāsuraśiromaulimālālālitaśāsanaḥ
uvāca madhurāṃ vācamimāmakleśitāśayām

yā mayā kathitā devi bhinnayonistu mālinī
tadaṅge saṃpravakṣyāmi sarvametadyathā sthitam

phe dharātattvamuddiṣṭaṃ dādijhānte'nupūrvaśaḥ
trayoviṃśatyabādīni pradhānāntāni lakṣayet

ṭhādau ca saptake sapta puruṣādīni pūrvavat
iṅagheṣu trayaṃ vidyādvidyātaḥ sakalāvadhi

śivatattve gakārādināntān ṣoḍaśa lakṣayet
kalāḥ padāni mantrāśca bhuvanāni ca sundari

pūrvavadveditavyāni tatsaṅkhyārṇavibhedataḥ
vidyātrayavibhāgena yathedānīṃ tathā śṛṇu

niṣkale padamekārṇaṃ tryarṇaikārṇamatha dvayam
sakale tu parijñeyaṃ pañcaikārṇadvayaṃ dvaye

caturekākṣare dve ca māyāditritaye mate
caturakṣaramekaṃ ca kālādidvitaye matam

rañjake dvyarṇamuddiṣṭaṃ pradhāne tryarṇamiṣyate
buddhau devāṣṭakavyāptyā padaṃ dvyakṣaramiṣyate

tataḥ pañcāṣṭakavyāptyā dvyekadvidvyakṣarāṇi tu
vidyāpadāni catvāri sārdhavarṇaṃ tu pañcamam

ekaikasārdhavarṇāni trīṇi tattve tu pārthive
parāṅge sarvamanyacca varṇamantrakalādikam

sārdhenāṇḍadvayaṃ vyāptamekaikena pṛthagdvayam
aparāyāḥ samākhyātā vyāptireṣā vilomataḥ

sārṇenāṇḍatrayaṃ vyāptaṃ triśūlena caturthakam
sarvātītaṃ visargeṇa parāvyāptirudāhṛtā

etatsarvaṃ parijñeyaṃ yoginā hitamicchatā
ātmano vā pareṣāṃ vā nānyathā tadavāpyate

dvāveva mokṣadau jñeyau jñānī yogī ca śāṅkari
pṛthaktvāttatra boddhavyaṃ phalakāṅkṣibhiḥ

jñānaṃ ca trividhaṃ proktaṃ tatrādyaṃ śrutamiṣyate
cintāmayamathānyacca bhāvanāmayameva ca

śāstrārthasya parijñānaṃ vikṣiptasya śrutaṃ matam
idamatredamatreti idamatropayujyate

sarvamālocya śāstrārthamānupūrvyā vyavasthitam
tadvaccintāmayaṃ jñānaṃ dvirūpamupadiśyate

mandasvabhyastabhedena tatra svabhyastamucyate
suniṣpanne tatastasmiñjāyate bhāvanāmayam

yato yogaṃ samāsādya yogī yogaphalaṃ labhet
evaṃ vijñānabhedena jñānī proktaścaturvidhaḥ

saṃprāpto ghaṭamānaśca siddhaḥ siddhatamo'nyathā
yogī caturvidho devi yathāvatpratipadyate

samāveśoktivadyogastrividhaḥ samudāhṛtaḥ
tatra prāptopadeśastu pāramparyakrameṇa yaḥ

prāptayogaḥ sa vijñeyastrividho'pi manīṣibhiḥ
cetaso ghaṭanaṃ tattvāccalitasya punaḥ punaḥ

yaḥ karoti tamicchanti ghaṭamānaṃ manīṣiṇaḥ
tadeva cetasā nānyaddvitīyamavalambate

siddhayogastadā jñeyo yogī yogaphalārthibhiḥ
yaḥ punaryatra tatraiva saṃsthito'pi yathā tathā

bhuñjānastatphalaṃ tena hīyate na kathañcana
susiddhaḥ sa tu boddhavyaḥ sadāśivasamaḥ priye

uttarottaravaiśiṣṭyameteṣāṃ samudāhṛtam
jñānināṃ yogināṃ caiva dvayoryogaviduttamaḥ

yato'sya jñānamapyasti pūrvo yogaphalojjhitaḥ
yataśca mokṣadaḥ proktaḥ svabhyastajñānavān budhaiḥ

ityetatkathitaṃ sarvaṃ vijñeyaṃ yogipūjite
tantrārthamupasaṃhṛtya samāsādyogināṃ hitam