Malinivijayottara Tantra · Chapter 3

evamuktā mahādevī jagadānandakāriṇā
praṇipatya punarvākyamidamāha jagatpatim

evametanmahādeva nānyathā samudāhṛtam
yathākhyātaṃ tathā jñātamāditaḥ samanukramāt

śivādivasturūpāṇāṃ vācakān parameśvara
sāṃprataṃ śrotumicchāmi prasādādvaktumarhasi

ityuktaḥ sa maheśānyā jagadārtiharo haraḥ
vācakānavadanmantrān pāramparyakramāgatān

yā sā śaktirjagaddhātuḥ kathitā samavāyinī
icchātvaṃ tasya sā devi sisṛkṣoḥ pratipadyate

saikāpi satyanekatvaṃ yathā gacchati tacchṛṇu
evametaditi jñeyaṃ nānyatheti suniścitam

jñāpayantī jagatyatra jñānaśaktirnigadyate
evaṃbhūtamidaṃ vastu bhavatviti yadā punaḥ

jātā tadaiva tattadvatkurvatyatra kriyocyate
evameṣā dvirūpāpi punarbhedairanantatām

arthopādhivaśādyāti cintāmaṇiriveśvarī
tatra tāvatsamāpannā mātṛbhāvaṃ vibhidyate

dvidhā ca navadhā caiva pañcāśaddhā ca mālinī
bījayonyātmakādbhedāddvidhā bījaṃ svarā matāḥ

kādibhiśca smṛtā yonirnavadhā vargabhedataḥ
pṛthagvarṇavibhedena śatārdhakiraṇojjvalā

bījamatra śivaḥ śaktiryonirityabhidhīyate
vācakatvena sarvāpi śaṃbhoḥ śaktiśca śasyate

vargāṣṭakamiha jñeyamaghorādyamanukramāt
tadeva śaktibhedena māheśvaryādi cāṣṭakam

māheśī brāhmaṇī caiva kaumārī vaiṣṇavī tathā
aindrī yāmyā ca cāmuṇḍā yogīśī ceti tā matāḥ

śatārdhabhedabhinnānāṃ tatsaṃkhyānāṃ varānane
rudrāṇāṃ vācakatvena kalpitāḥ parameṣṭhinā

tadvadeva ca śaktīnāṃ tatsaṃkhyānāmanukramāt
sarvaṃ ca kathayiṣyāmi tāsāṃ bhedaṃ yathā śṛṇu

amṛto'mṛtapūrṇaśca amṛtābho'mṛtadravaḥ
amṛtaugho'mṛtormiśca amṛtasyandano'paraḥ

amṛtāṅgo'mṛtavapuramṛtodgāra eva ca
amṛtāsyo'mṛtatanustathā cāmṛtasecanaḥ

tanmūrtiramṛteśaśca sarvāmṛtadharo'paraḥ
ṣoḍaśaite samākhyātā rudrabījasamudbhavāḥ

jayaśca vijayaścaiva jayantaścāparājitaḥ
sujayo jayarudraśca jayakīrtirjayāvahaḥ

jayamūrtirjayotsāho jayado jayavardhanaḥ
balaścātibalaścaiva balabhadro balapradaḥ

balāvahaśca balavān baladātā baleśvaraḥ
nandanaḥ sarvatobhadro bhadramūrtiḥ śivapradaḥ

sumanāḥ spṛhaṇo durgo bhadrakālo manonugaḥ
kauśikaḥ kālaviśveśau suśivaḥ kopavardhanaḥ

ete yonisamudbhūtāścatustriṃśatprakīrtitāḥ
strīpāṭhavaśamāpannā eta evātra śaktayaḥ

bījayonisamudbhūtā rudraśaktisamāśrayāḥ
vācakānāmanantatvātparisaṃkhyā na vidyate

sarvaśāstrārthagarbhiṇyā ityevaṃvidhayānayā
aghoraṃ bodhayāmāsa svecchayā parameśvaraḥ

sa tayā saṃprabuddhaḥ san yoniṃ vikṣobhya śaktibhiḥ
tatsamānaśrutīn varṇāṃstatsaṃkhyānasṛjatprabhuḥ

te tairāliṅgitāḥ santaḥ sarvakāmaphalapradāḥ
bhavanti sādhakendrāṇāṃ nānyathā vīravandite

tairidaṃ saṃtataṃ viśvaṃ sadevāsuramānuṣam
tebhyaḥ śāstrāṇi vedāśca saṃbhavanti punaḥ punaḥ

anantasyāpi bhedasya śivaśaktermahātmanaḥ
kāryabhedānmahādevi traividhyaṃ samudāhṛtam

viṣayeṣveva saṃlīnānadho'dhaḥ pātayantyaṇūn
rudrāṇūnyāḥ samāliṅgya ghorataryo'parāḥ smṛtāḥ

miśrakarmaphalāsaktiṃ pūrvavajjanayanti yāḥ
muktimārganirodhinyāstāḥ syurghorāḥ parāparāḥ

pūrvavajjantujātasya śivadhāmaphalapradāḥ
parāḥ prakathitāstajjñairaghorāḥ śivaśaktayaḥ

etāḥ sarvāṇusaṃghātamapi niṣṭhā yathā sthitāḥ
tathā te kathitāḥ śaṃbhoḥ śaktirekaiva śāṅkarī

asyā vācakabhedena bhedo'nyaḥ saṃpracakṣyate
yatheṣṭaphalasaṃsiddhyai mantratantrānuvartinām

viśeṣavidhihīneṣu nyāsakarmasu mantravit
nyasecchāktaśarīrārthaṃ bhinnayoniṃ tu mālinīm

na śikhā ṛ.ṛḻṭca śiromālā tha mastakam
netrāṇi cadha vai nāsā ī samudre ṇuṇū śrutī

bakavarga iā vaktradantajihvāsu vāci ca
vabhayāḥ kaṇṭhadakṣādiskandhayorbhujayorḍaḍhau

ṭho hastayorjhañau śākhā jraṭau śūlakapālake
pa hṛcchalau stanau kṣīramā sa jīvo visargayuk

tatparaḥ kathitaḥ prāṇaḥ ṣakṣāvudaranābhigau
maśaṃtāḥ kaṭiguhyoru yugmagā jānunī tathā

eaikārau tathā jaṅghe tatparau caraṇau daphau
ato vidyāśca mantrāśca samuddhāryā yathā śṛṇu

sabindukāṃ dakṣajaṅghāṃ tato vācaṃ prakalpayet
tayaiva jaṅghayā yuktaṃ caturthaṃ daśanaṃ tataḥ

dakṣajānuyutaṃ daṇḍaṃ prāṇaṃ daṇḍasthamīryutam
pṛthagghṛddaṇḍakaṭigā dvijadaṇḍau ca pūrvavat

usthitaṃ binduyukprāṇaṃ pūrvavaddaśanaṃ tataḥ
daṇḍaṃ kevalamuddhṛtya vāmamudrānvitaṃ punaḥ

dakṣajānuyutaṃ hṛcca prāṇaṃ jīvātmanā yutam
daśanaṃ purvavannyasya daṇḍaṃ kevalameva ca

nitambaṃ dakṣamudretaṃ dvitīyaṃ jihvayā dvijam
sanāsaṃ dakṣaśikharaṃ nitambaṃ kevalaṃ tataḥ

punastathaiva śikharaṃ jaṭharaṃ kevalaṃ tataḥ
dakṣajānuyutaṃ karṇaṃ kaṇṭhaṃ kevalameva ca

nitambaṃ kevalaṃ nyasya hṛdayaṃ jihvayā yutam
vaktraṃ kevalamuddhṛtya prāṇamādyena jānunā

śūladaṇḍacatuṣkaṃ ca tatrādyaṃ dvayamusthitam
vāmapādaṃ ca tasyānte kapālaṃ patitaṃ nyaset

tataḥ paramaghorāntaṃ pādyakādye ca pūrvavat
parāparā samākhyātā aparā ca prakathyate

aghorāntaṃ nyasedādau prāṇaṃ binduyutaṃ punaḥ
vāmamudrānvitaṃ nyasya pādyaṃ kādyena pūrvavat

apareyaṃ samākhyātā rudraśaktiṃ parāṃ śṛṇu
mantrāḥ saṃmukhatāṃ yānti yayoccāritamātrayā

kampate gātrayaṣṭiśca drutaṃ cotpatanaṃ bhavet
mudrābandhaṃ ca geyaṃ ca śivāruditameva ca

atītānagatārthasya kuryādvā kathanādikam
vāmajaṅghānvito jīvaḥ pāramparyakramāgataḥ

pareyamanayā siddhiḥ sarvakāmaphalapradā
nāśiṣyāya pradeyeyaṃ nābhaktāya kadā cana

rudraśca rudraśaktiśca guruśceti trayaṃ samam
bhaktyā prapaśyate yastu tasmai deyā varānane

śiṣyenāpi tadā grāhyā yadā saṃtoṣito guruḥ
śarīradravyavijñānaśuddhikarmaguṇādibhiḥ

bodhitā tu yadā tena guruṇā hṛṣṭacetasā
tadā siddhipradā jñeyā nānyathā vīravandite

parāparāṅgasaṃbhūtā yoginyo'ṣṭau mahābalāḥ
pañca ṣaṭpañca catvāri dvitridvyarṇāḥ krameṇa tu

jñeyāḥ saptaikādaśārṇā ekārdhārṇadvayānvitā
jīvo dīrghasvaraiḥ ṣaḍbhiḥ pṛthagjātivibheditaḥ

vidyātrayasya gātrāṇi hrasvairvaktrāṇi pañcabhiḥ
oṃkāraiḥ pañcabhirmantro vidyāṅgahṛdayaṃ bhavet

omamṛte tejomālini svāhā padāni bhūṣitam
ekādaśākṣaraṃ proktametadbrahmaśiraḥ priye

vedavedini hūṃphaṭca ca praṇavādisamanvitā
rudrāṇyaṣṭākṣarā jñeyā śikhā vidyāgaṇasya tu

vajriṇe vajradharāya svāhāntaṃ praṇavādikam
ekādaśākṣaraṃ varma puruṣṭutamiti smṛṭam

ślīpadaṃ paśuśabdaṃ ca hūṃphaḍantaṃ bhavādikam
etatpāśupataṃ proktamardhasaptākṣaraṃ param

laraṭakṣavayairdīrghaiḥ sūmāyuktaiḥ sabindukaiḥ
indrādīn kalpayeddhrasvaistadastrāṇi vicakṣaṇaḥ

tadvannāsāpayobhyāṃ tu kalpyau viṣṇuprajāpatī
svarāvādyatṛtīyau tu vācakau padmacakrayoḥ

iti mantragaṇaḥ proktaḥ sarvakāmaphalapradaḥ
yogināṃ yogasiddhyarthaṃ kimanyatparipṛcchasi