Malinivijayottara Tantra · Chapter 2

athaiṣāmeva tattvānāṃ dharādīnāmanukramāt
prapañcaḥ kathyate leśādyogināṃ yogasiddhaye

śaktimacchaktibhedena dharātattvaṃ vibhidyate
svarūpasahitaṃ tacca vijñeyaṃ daśapañcadhā

śivādisakalātmāntāḥ śaktimantaḥ prakīrtitāḥ
tacchaktayaśca vijñeyāstadvadeva vicakṣaṇaiḥ

evaṃ jalādimūlāntaṃ tattvavrātamidaṃ mahat
pṛthagbhedairimairbhinnaṃ vijñeyaṃ tatphalepsubhiḥ

anenaiva vidhānena puṃstattvāttu kalāntikam
trayodaśavidhaṃ jñeyaṃ rudravatpralayākalaḥ

tadvanmāyāpi vijñeyā navadhā jñānakevalaḥ
mantrāḥ saptavidhāstadvatpañcadhā mantranāyakāḥ

tridhā mantreśvareśānāḥ śivaḥ sākṣānna bhidyate
bhedaḥ prakathito leśādananto vistarādayam

evaṃ bhuvanamālāpi bhinnā bhedairimaiḥ sphuṭam
vijñeyā yogasiddhyarthaṃ yogibhiryogapūjitā

eteṣāmeva tattvānāṃ bhuvanānāṃ ca śāṅkari
ya ekamapi jānāti so'pi yogaphalaṃ labhet

yaḥ punaḥ sarvatattvāni vettyetāni yathārthataḥ
sa gururmatsamaḥ prokto mantravīryaprakāśakaḥ

dṛṣṭāḥ saṃbhāṣitāstena spṛṣṭāśca prītacetasā
narāḥ pāpaiḥ pramucyante saptajanmakṛtairapi

ye punardīkṣitāstena prāṇinaḥ śivacoditāḥ
te yatheṣṭaṃ phalaṃ prāpya gacchanti paramaṃ padam

rudraśaktisamāveśastatra nityaṃ pratiṣṭhitaḥ
sati tasmiṃśca cihnāni tasyaitāni vilakṣayet

tatraitatprathamaṃ cihnaṃ rudre bhaktiḥ suniścalā
dvitīyaṃ mantrasiddhiḥ syātsadyaḥpratyayakārikā

sarvasattvavaśitvaṃ ca tṛtīyaṃ lakṣaṇaṃ smṛtam
prārabdhakāryaniṣpattiścihnamāhuścaturthakam

kavitvaṃ pañcamaṃ proktaṃ sālaṃkāraṃ manoharam
sarvaśāstrārthavettṛtvamakasmāccāsya jāyate

rudraśaktisamāveśaḥ pañcadhā paripaṭhyate
bhūtatattvātmamantreśaśaktibhedādvarānane

pañcadhā bhūtasaṃjñastu tathā triṃśatidhā paraḥ
ātmākhyastrividhaḥ prokto daśadhā mantrasaṃjñakaḥ

dvividhaḥ śaktisaṃjño'pi jñātavyaḥ paramārthataḥ
pañcāśadbhedabhinno'yaṃ samāveśaḥ prakīrtitaḥ

āṇavo'yaṃ samākhyātaḥ śākto'pyevaṃvidhaḥ smṛtaḥ
evaṃ śāmbhavamapyebhirbhedairbhinnaṃ vilakṣayet

uccārakaraṇadhyānavarṇasthānaprakalpanaiḥ
yo bhavetsa samāveśaḥ samyagāṇava ucyate

uccārarahitaṃ vastu cetasaiva vicintayan
yamāveśamavāpnoti śāktaḥ so'trābhidhīyate

akiṃciccintakasyaiva guruṇā pratibodhataḥ
jāyate yaḥ samāveśaḥ śāmbhavo'sāvudīritaḥ

sārdhametacchataṃ proktaṃ bhedānāmanupūrvaśaḥ
saṃkṣepādvistarādasya parisaṃkhyā na vidyate

saṃvittiphalabhedo'tra na prakalpyo manīṣibhiḥ
bhedo'paro'pi saṃkṣepātkathyamāno'vadhāryatām

jāgratsvapnādibhedena sarvāveśakramo budhaiḥ
pañcabhinnaḥ parijñeyaḥ svavyāpārātpṛthakpṛthak

tatra svarūpaṃ śaktiśca sakalaśceti tattrayam
iti jāgradavastheyaṃ bhede pañcadaśātmake

akalau dvau parijñeyau samyaksvapnasuṣuptayoḥ
mantrāditatpatīśānavargasturya iti smṛtaḥ

śaktiśaṃbhū parijñeyau turyātīte varānane
trayodaśātmake bhede svarūpamakalāvubhau

mantramantreśvareśānāḥ śaktiśaṃbhū ca kīrtitau
pralayākalabhede'pi svaṃ vijñānakalāvubhau

mantramantreśvareśānāḥ śaktīśāvapi pūrvavat
navadhā kīrtite bhede svaṃ mantrā mantranāyakāḥ

tadīśāḥ śaktiśaṃbhū ca pañcāvasthāḥ prakīrtitāḥ
pūrvavatsaptabhede'pi svaṃ mantreśeśaśaktayaḥ

śivaśceti parijñeyāḥ pañcaiva varavarṇini
svaṃ śaktiḥ sanijeśānā śaktiśaṃbhū ca pañcake

trike svaśaktiśaktīcchāśivapadaṃ vilakṣayet
svavyāpārādhipatvena taddhīnaprerakatvataḥ

icchānivṛtteḥ svasthatvādabhinnamapi pañcadhā
iti pañcātmake bhede vijñeyaṃ vastu kīrtitam

bhūyo'pyāsāmavasthānāṃ saṃjñābhedaḥ prakāśyate
piṇḍasthaḥ sarvatobhadro jāgrannāmadvayaṃ matam

dvisaṃjñaṃ svapnamicchanti padasthaṃ vyāptirityapi
rūpasthaṃ tu mahāvyāptiḥ suṣuptasyāpi taddvayam

pracayaṃ rūpātītaṃ ca samyakturyamudāhṛtam
mahāpracayamicchanti turyātītaṃ vicakṣaṇāḥ

pṛthaktattvaprabhedena bhedo'yaṃ samudāhṛtaḥ
sarvāṇi eva tattvāni pañcaitāni yathā śṛṇu

bhūtatattvābhidhānānāṃ yo'ṃśo'dhiṣṭheya iṣyate
piṇḍasthamiti taṃ prāhuḥ padasthamaparaṃ viduḥ

mantrāstatpatayaḥ seśā rūpasthamiti kīrtyate
rūpātītaṃ parā śaktiḥ savyāpārāpyanāmayā

niṣprapañco nirābhāsaḥ śuddhaḥ svātmanyavasthitaḥ
sarvātītaḥ śivo jñeyo yaṃ viditvā vimucyate

caturvidhaṃ tu piṇḍasthamabuddhaṃ buddhameva ca
prabuddhaṃ suprabuddhaṃ ca padasthaṃ ca caturvidham

gatāgataṃ suvikṣiptaṃ saṅgataṃ susamāhitam
caturdhā rūpasaṃsthaṃ tu jñātavyaṃ yogacintakaiḥ

uditaṃ vipulaṃ śāntaṃ suprasannamathāparam
manonmanamanantaṃ ca sarvārthaṃ satatoditam

pracaye tatra saṃjñeyamekaṃ tanmahati sthitam
ityevaṃ pañcadhādhvānaṃ tridhedānīṃ nigadyate

vijñānākalaparyantamātmatattvamudāhṛtam
īśvarāntaṃ ca vidyāhvaṃ śeṣaṃ śivapadaṃ viduḥ

evaṃ bhedairimairbhinnastatrādhvā parikīrtitaḥ
yugapatsarvamārgāṇāṃ prabhedaḥ procyate'dhunā

pārthivaṃ prākṛtaṃ caiva māyīyaṃ śāktameva ca
iti saṅkṣepataḥ proktametadaṇḍacatuṣṭayam

pṛthagdvayamasaṅkhyātamekamekaṃ pṛthakpṛthak
ādyaṃ dhārikayā vyāptaṃ tatraikaṃ tattvamiṣyate

ekamekaṃ pṛthakkṣārṇaṃ padārṇamanuṣu smaret
kālāgnibhuvanādyāvadvīrabhadrapurottamam

puraṣoḍaśakaṃ jñeyaṃ ṣaḍvidho'dhvā prakīrtitaḥ
āpyāyinyā dvitīyaṃ ca tatra tattvāni lakṣayet

trayoviṃśatyabādīni tadvaddhādyakṣarāṇi ca
padāni pañca mantrāśca ṣaṭpañcāśatpurāṇi ca

tattvāni sapta bodhinyā taccaturdhā purāṇi ca
tṛtīye sapta varṇāḥ syuḥ padamantradvayaṃ dvayam

utpūyinyā caturthaṃ tu tatra tattvatrayaṃ viduḥ
varṇatrayaṃ mantramekaṃ padamekaṃ ca lakṣayet

aṣṭādaśa vijānīyādbhuvanāni samāsataḥ
śivatattvaṃ paraṃ śāntaṃ kalā tatrāvakāśadā

svaraṣoḍaśakaṃ mantraṃ padaṃ caikaṃ vilakṣayet
ityevaṃ ṣaḍvidho'pyadhvā samāsātparikīrtitaḥ

śuddhāśuddhaṃ jagatsarvaṃ brahmāṇḍaprabhavaṃ yataḥ
tasmācchuddhamimaiḥ śuddhairbrahmāṇḍaiḥ sarvamiṣyate

brahmā viṣṇuśca rudraśca īśvaraśceti suvrate
pṛthageteṣu boddhavyaṃ śāntaṃ paticatuṣṭayam

yo hi yasmādguṇotkṛṣṭaḥ sa tasmādūrdhva ucyate
etatte kathitaṃ sarvaṃ kimanyatparipṛcchasi