Malinivijayottara Tantra · Chapter 22

athānyaṃ paramaṃ guhyaṃ kathayāmi tava priye
yanna kasya cidākhyātaṃ yogāmṛtamanuttamam

sūryākṛṣṭikaraṃ nāma yogināṃ yogasiddhidam
samyaṅmāsacatuṣkeṇa dināṣṭābhyadhikena tu

praharsyāṣṭamo bhāgo nāḍiketyabhidhīyate
tatpādakramavṛddhyā tu prativāsaramabhyaset

udayāstamayaṃ yāvadyatra sūryaḥ pradṛśyate
pradeśe tatra vijane sarvabādhāvivarjite

ahorātroṣito yogī makarasthe divākare
śucirbhūtvā kṛtanyāsaḥ kṛtaśītapratikriyaḥ

bhānubimbe nyaseccakramaṣṭaṣaḍdvādaśārakam
śivaśaktighanopetaṃ bhairavāṣṭakasaṃyutam

varṣādiṛtusaṃyuktaṃ māsairṛkṣādibhiryutam
aṣṭāraṃ cintayedbimbe śeṣaṃ raśmiṣu cintayet

tatra cittaṃ samādhāya proktakālaṃ vicakṣaṇaḥ
animīlitanetrastu bhānubimbaṃ nirīkṣayet

tataḥ kāle vyatikrānte sunimīlitalocanaḥ
praviśedandhakārāntarbhuvanaṃ nirupadravam

tatronmīlitanetrastu bimbākāraṃ prapaśyati
saṃdhāya tatra caitanyaṃ tiṣṭhedyāvanna paśyati

naṣṭe'pi cetasā śeṣaṃ tiṣṭhetkālamanusmaran
evaṃ māsena deveśi sthiraṃ tadupajāyate

māsadvayena sarvatra prekṣate nātra saṃśayaḥ
tribhiḥ samīkṣate sarvaṃ ravibimbasamākulam

proktakālāvasānena vṛṣasthe tigmarociṣi
prekṣate sūryabimbāntaḥ sacakraṃ parameśvaram

upalabdhaṃ samākṛṣya mukhāgre sthiratāṃ nayet
āpīya pūrvavatpaścādvṛttiṃ niścalatāṃ nayet

tatra tena sahātmānamekīkṛtya muhūrtakam
yāvattiṣṭhati deveśi tāvatsaṃtyajati kṣitim

paśyato janavṛndasya yāti sūryena caikataḥ
anena vidhinā devi siddhayogīśvareśvaraḥ

śivādyavaniparyantaṃ na kva citpratihanyate
bhuktvā tu vipulān bhogānniṣkale līyate pare

tadetatkhecarīcakraṃ yatra khecaratāṃ vrajet
siddhayogeśvarītantre sarahasyamudāhṛtam

athavā cakrarūpeṇa sabāhyābhyantaraṃ svakam
dehaṃ cintayataḥ pūrvaṃ phalaṃ syānniścitātmanaḥ

uccaran phādināntāṃ vā dhvanijyotirmaruddyutām
viśrāmya mastake cittaṃ kṣaṇamekaṃ vicakṣaṇaḥ

triśūlena prayogena sadyastyajati medinīm
evaṃ samabhyasanmāsāccakravadbhramati kṣitau

muhūrtaṃ spṛśate bhūmiṃ muhūrtācca nabhastalam
śivārāvādi kurute valanāsphoṭanāni ca

mudrābandhādikaṃ vātha bhāṣā vāḻvaktyanekadhā
ṣaṇmāsānmedinīṃ tyaktvā samādhistho dṛḍhendriyaḥ

tiṣṭhate hastamātreṇa gagane yogacintakaḥ
paśyate yoginīvṛndamanekākāralakṣaṇam

saṃvatsareṇa yuktātmā tatsamānaḥ prajāyate
paśyatāmeva lokānāṃ tejobhirbhāsayan diśaḥ

yātyutkṛṣya mahīpṛṣṭhātkhecarīṇāṃ patirbhavet
mudrā khageśvarī nāma kathitā yoginīmate

jāgaritvātha vā yogī tryahorātramatandritaḥ
caturthe'hni niśārambhe pūjayitvā maheśvaram

tato'ndhakāre bahule kṛtarakṣāvidhirbudhaḥ
bhruvormadhye samādhāya kṣaṇaṃ cetaḥ prapaśyati

tejo rūpapratīkāśaṃ paryaṅkāsanamāsthitaḥ
prayogaṃ tveva satataṃ yogayuktaḥ samabhyaset

paśyate māsamatreṇa gṛhāntarvastu yatsthitam
dvābhyāṃ bahiḥ sthitaṃ sarvaṃ tribhiḥ pattanasaṃsthitam

caturbhirviṣayāntaḥsthaṃ pañcabhirmaṇḍalāvadhi
ṣaḍbhirmāsairmahāyogī cchidraṃ paśyati medinīm

sarvajñatvamavāpnoti vatsarānnātra saṃśayaḥ
yoginīsiddhasaṅghasya sadbhāvavyāptisaṃsthitam

paśyate yogayuktātmā tatsamānaśca jāyate
anenaiva vidhānena svastikāsanasaṃsthitaḥ

binduṃ nānāvidhaṃ tyaktvā śuddharūpamanusmaret
tenāpi sarvaṃ purvoktaṃ vyāpnoti phalamuttamam