Malinivijayottara Tantra · Chapter 21

athātaḥ paramaṃ guhyaṃ śivajñānāmṛtottamam
vyādhimṛtyuvināśāya yogināmupavarṇyate

ṣoḍaśāre khage cakre candrakalpitakarṇike
svarūpeṇa parāṃ tatra sravantīmamṛtaṃ smaret

pūrvanyāsena saṃnaddhaḥ kṣaṇamekaṃ vicakṣaṇaḥ
tatastu rasanāṃ nītvā lambake viniyojayat

sravantamamṛtaṃ divyaṃ candrabimbasitaṃ smaret
mukhamāpūryate tasya kiṃ cillavaṇavāriṇā

lohagandhena taccātra na pibetkiṃ tu nikṣipet
evaṃ samabhyasettāvadyāvattatsvādu jāyate

jarāvyādhivinirmukto jāyate tatpibaṃstataḥ
ṣaḍbhirmāsairanāyāsādvatsarānmṛtyujidbhavet

tatra svāduni saṃjāte tadāprabhṛti tatragam
yadeva cintayeddravyaṃ tenāsyāpūryate mukham

rudhiraṃ madiraṃ vātha vasāṃ vā kṣīrameva vā
ghṛtatailādikaṃ vātha dravaddravyamananyadhīḥ

athānyaṃ saṃpravakṣyāmi saṃkrāntividhimuttamam
mṛte jīvaccharīre tu praviśedyogavidyayā

nivātastho jitaprāṇo jitāsanavidhikramaḥ
kurvīta vāyunāveśamarkatūle śanaiḥ śanaiḥ

svādākṛṣṭividhiṃ yāvadguḍe nimbe ca kārayet
śrīkhaṇḍaguḍakarpūraistataḥ kṛtvākṛtiṃ śubhām

praguṇāmaguṇa[lacuna]nyaṅgeṣu saṃdadhat
nyāsaṃ kṛtvāpi tatrāpi vedhaṃ kuryācchanaiḥ śanaiḥ

nirodhaṃ tatra kurvīta ghaṭṭanaṃ tadanantaram
ghaṭṭanaṃ nāma vijñeyamaṅgapratyaṅgacālanam

evamabhyasatastasya yogayuktasya yoginaḥ
calate pratimā sā tu dhāvate cāpi saṃmukhī

punastāṃ prerayettāvadyāvatsvasthānamāgatam
patitāṃ cālayedbhūya uttānāṃ pārśvataḥ sthitaḥ

evaṃ sarvātmanastāvadyāvatsvavaśatāṃ gatām
tataḥ prabhṛtyasau yogī praviśedyatra rocate

mṛte jīvaccharīre vā saṃkrāntyākrāntibhedataḥ
prakṣipya jalavacchaktijālaṃ sarvāṅgasaṃdhiṣu

pratyaṅgamaṅgatastasya śaktiṃ tenākramedbudhaḥ
svakīyaṃ rakṣayeddehamākrāntāvanyathā tyajet

bahūnyapi śarīrāṇi dṛḍhalakṣyo yadāḻbhavet
tadāḻgṛhṇātyasaṃdehaṃ yugapatsaṃtyajannapi

athāparaṃ pravakṣyāmi sadyaḥpratyayakārakam
samādhānāmṛtaṃ divyaṃ yogināṃ mṛtyunāśanam

candrākṛṣṭikaraṃ nāma māsādvāḻyogabhogadam
śuklapakṣe dvitīyāyāṃ meṣasthe tigmarociṣi

snātaḥ śucirnirāhāraḥ kṛtapūjāvidhirbudhaḥ
nyaseccandre kalājālaṃ parayā samadhiṣṭhitam

sarvabādhāparityakte pradeśe saṃsthito budhaḥ
ekacittaḥ praśāntātmā śivasadbhāvabhāvitaḥ

tāvadālokayeccandraṃ yāvadastamupāgatam
tato bhuñjīta dugdhena candradhyānasamanvitaḥ

evaṃ dine dine kuryādyāvatpañcadaśī bhavet
śeṣāṃ rātriṃ svapeddhyāyaṃśḷcandrabimbagatāṃ parām

paurṇamāsīṃ tathā yogī ardharātra upasthitaḥ
jane niḥśabdatāṃ yāte prasupte sarvajantubhiḥ

candrakoṭikaraprakhyāṃ tārahāravibhūṣaṇām
sitāmbaraparīdhānāṃ sitacandanacarcitām

mauktikābharaṇopetaṃ surūpāṃ navayauvanām
āpyāyanakarīṃ devīṃ samantādamṛtasravām

rājīvāsanasaṃsthāṃ ca yoganidrāmavasthitām
candrabimbe parāṃ devīmīkṣate nātra saṃśayaḥ

tatastāṃ cetasā vyāpya tāvadākarṣayetsudhīḥ
yāvanmukhāgramāyātā tatra kuryātsthiraṃ manaḥ

tataḥ prasārya vadanaṃ dhyānāsaktena cetasā
nigirettāṃ samākṛṣya bhūyo hṛdi vicintayet

tayā praviṣṭayā dehaṃ yogī duḥkhavivarjitaḥ
śaktitulyabalo bhūtvā jīvedācandratārakam

eko'pyanekadhātmānaṃ saṃvibhajya nijecchayā
trailokyaṃ yaugapadyena bhunakti vaśatāṃ gatam

āsādya vipulān bhogān pralaye samupasthite
paramabhyeti nirvāṇaṃ duṣprāpamakṛtātmanām

athavā tanna śaknoti gagane paricintitum
pratibimbe tathā dhyāyedudakādiṣu pūrvavat

tatpītvāḻmanasā śeṣāṃ svapedrātrimanusmaran
pūrvoktaṃ samavāpnoti ṣaḍbhirmāsairakhaṇḍitam