Malinivijayottara Tantra · Chapter 23

athātaḥ paramaṃ guhyaṃ kathayāmi tavādhunā
sadyopalabdhijanakaṃ yogināṃ yogasiddhaye

pūrvanyāsena saṃnaddhaścittaṃ śrotre niveśayet
nivāte svalpavāte vā bāhyaśabdavivarjite

tatastatra śṛṇotyeṣa yogī dhvanimanāvṛtam
suviśuddhasya kāṃsyasya hatasyeha muhurmuhuḥ

yamākrṇya mahādevi puṇyapāpaiḥ pramucyate
tatra saṃdhāya caitanyaṃ ṣaṇmāsādyogavittamaḥ

rutaṃ pakṣigaṇasyāpi prasphuṭaṃ vettyayatnataḥ
dūrācchravaṇavijñānaṃ vatsareṇāsya jāyate

sarvakāmaphalāvāptirvatsaratritayena ca
siddhyatīti kimāścāryamanāyāsena siddhyati

athavā grahaṇe māsi kṛtvā sūryaṃ tu pṛṣṭhataḥ
pūrvanyāsena saṃnaddhaḥ kiṃ cidbhittimadāśritaḥ

lakṣayedātmanaśchāyāṃ mastakordhvamanāhatam
dhūmavartiviniṣkrāntāṃ tadgatenāntarātmanā

yāti tanmayatāṃ tatra yogayukto yathā yathā
tathā tathāsya mahatī sāḻvittirupajāyate

tatastatra mahātejahsphuratkiraṇasaṃnibham
paśyate yatra dṛṣṭe'pi sarvapāpakṣayo bhavet

tadasyābhyāsato māsātsarvatra pravisarpati
jvālāmālākulākārā diśaḥ sarvāḥ prapaśyati

ṣaṇmāsamabhyasan yogī sarvajñatvamavāpnuyāt
abdaṃ divyatanurbhūtvā śivavanmodate ciram

atha jātyaḥ pravakṣyante sapūrvāsanaśāśvatāḥ
hrīṃ kṣlāṃ kṣvīṃ vaṃ tathāḻkṣaṃ ca pañcakasya yathākramam

haṃ yaṃ raṃ laṃ tathā vaṃ ca pañcakasyāparasya ca
ṛṃ .ṛṃ ḻaṃ .ḻṃ tathā omauṃ haḥ amākarṇikāvadhau

kesareṣu bhakārāntā haṃ hāṃ hiṃ hīṃ ca huṃ tathā
hūṃ heṃ haiṃ ca daleṣvevaṃ svasaṃjñābhiśca śaktayaḥ

maṇḍalatritaye śeṣaṃ sūkṣmaṃ pretasya kalpayet
jrakāraṃ śūlaśṛṅgāṇāmityetatparikīrtitam

anuktāsanayogeṣu sarvatraiva prakalpayet
namaḥ svāhā tathā vauṣaṭhuṃ vaṣaṭphaṭca

prāyaścitteṣu sarveṣu japenmālāmakhaṇḍitām
bhinnāṃ vāpyathavābhinnāmatikramabalābalam

sakṛjjapātsamārabhya yāvallakṣatrayaṃ priye
prāṇavṛttinirodhena tataḥ parataraṃ kva cit

sadā bhramaṇaśīlānāṃ pīṭhakṣetrādikaṃ bahiḥ
prayogaṃ saṃpravakṣyāmi sukhasiddhiphalapradam

nāsākrāntaṃ mahāprāṇaṃ daṇḍarūpaṃ sabindukam
tadvadguhyaṃ ca kurvīta vidyeyaṃ dvyakṣarā matā

asyāḥ pūrvoktavidhinā kṛtasevaḥ prasannadhīḥ
pīṭhādikaṃ bhrametsiddhyai nānyathā vīravandite

tatpradeśaṃ samāsādya mantrairātmānamādarāt
vidyayā veṣtayetsthānaṃ raktasūtrasamānayā

bahudhānanyacittastu sabāhyābhyantaraṃ budhaḥ
tatastatra kva citkṣetre yoginyo bhīmavikramāḥ

samāgatya prayacchanti saṃpradāyaṃ svakaṃ svakam
yenāsau labdhamātreṇa saṃpradāyena suvrate

tatsamānabalo bhūtvā bhuṅkte bhogān yathepsitān
athavā kṛtasevastu lakṣamekaṃ japetsudhīḥ

tarpayitvā daśāṃśena kṣudrakarmasu yojayet
tatroccāritamātreyaṃ viṣakṣayakarī bhavet

cakravabhramamāṇaiṣā yonau raktāṃ vicintayet
gamāgamakramādvāpi vinda[lacuna]vāritā

tatrasthaścāśu saṃghātavighātākuñcanena tu
kṣaṇādananyacittastu kṣobhayedurvaśīmapi

kṛtasevavidhirvātha lakṣatrayajapena tu
mahatīṃ śriyamādhatte padmaśrīphalatarpitā

ṣaḍutthāsanasaṃsthānā sādhitāpyuktavartmanā
sarvasiddhikarī devī mantriṇāmupajāyate

śūlapadmavidhiṃ muktvā navātmādyaṃ ca saptakam
ṣaḍutthamāsanaṃ dadyātsarvacakravidhau budhaḥ

kudrā ca mahatī yojyā hṛdbījenopacārakam
athānyatsaṃpravakṣyāmi svapnajñānamanuttamam

hṛccakre tanmayo bhūtvā rātrau rātrāvananyadhīḥ
māsādūrdhvaṃ mahādevi svapne yatkiṃcidīkṣate

tattathyaṃ jāyate tasya dhyānayuktasya yoginaḥ
tatraiva yadi kālasya niyamena rato bhavet

tadā prathamayāme tu vatsareṇa śubhāśubham
ṣaṭtrimāsena kramaśo dvitīyādiṣvanukramāt

aruṇodayavelāyāṃ daśāhena phalaṃ labhet
saṃkalpapūrvake'pyevaṃ pareṣāmātmano'pi vā

kva citkārye samutpanne suptajñānamupākramet
ityetatkathitaṃ devi siddhayogīśvarīmatam

nātaḥ parataraṃ jñānaṃ śivādyavanigocare
ya evaṃ tattvato veda sa śivo nātra saṃśayaḥ

tasya pādarajaḥ mūrdhni dhṛtaṃ pāpapraśāntaye
etacchrutvā mahādevī paraṃ saṃtoṣamāgatā

evaṃ kṣamāpayāmāsa praṇipatya punaḥ punaḥ
iti vaḥ sarvamākhyātaṃ mālinīvijayottaram

mamaitatkathitaṃ devyā yogāmṛtamanuttamam
bhavadbhirapi nākhyeyamaśiṣyāṇāmidaṃ mahat

na cāpi paraśiṣyāṇāmaparīkṣya prayatnataḥ
sarvathaitatsamākhyātaṃ yogābhyāsaratātmanām

prayātānāṃ vinītānāṃ śivaikārpitacetasām
kārtikeyātsamāsādya jñānāmṛtamidaṃ mahat

manayo yogamabhyasya parāṃ siddhimupāgatāḥ