Malinivijayottara Tantra · Chapter 20

atha piṇḍādibhedena śāktaṃ vijñānamucyate
yogināṃ yogasiddhyarthaṃ saṃkṣepānna tu vistarāt

piṇḍaṃ śarīramityuktaṃ tadvacchaktiśivātmanoḥ
brahmānando balaṃ tejo vīryamojaśca kīrtyate

ajñānena niruddhaṃ tadanādyeva sadātmanaḥ
tadāvirbhūtaye sarvamaniruddhaṃ pravartate

tenāvirbhāvyamānaṃ tatpūrvāvasthāṃ parityajat
yāḥ saṃvittīravāpnoti tā adhastātprakīrtitāḥ

tadeva padamicchanti sarvārthāvagatiryataḥ
tasmātsaṃjāyate nityaṃ nityameva śivātmanoḥ

tadeva rūpamityuktamātmanaśca vinaśvaram
rūpātītaṃ tadevāhuryatokṣāviṣayaṃ param

bhāvanāṃ tasya kurvīta namaskṛtya guruṃ budhaḥ
tāvadālocayedvastu yāvatpadamanāmayam

naivaṃ na caivaṃ nāpyevaṃ nāpi caivamapi sphuṭam
cetasā yogayuktena yāvattadidamapyalam

kṛtvā tanmayamātmānaṃ sarvākṣārthavivarjitam
muhūrtaṃ tiṣṭhate yāvattāvatkampaḥ prajāyate

bhramaṇodbhavanidrāśca kiṃ cidānanda ityapi
tatra yatnena saṃdadhyāccetaḥ paraphalecchayā

tadetadātmano rūpaṃ śivena prakaṭīkṛtam
yatra tu yacca vijñeyaṃ śivātmakamapi sthitam

tadrūpodbalakatvena sthitimityavadhārayet
tatsamabhyasato nityaṃ sthūlapiṇḍādyupāśrayāt

caturbhedatvamāyāti bhaktyābhinnamapi svataḥ
sthūlapiṇḍe dvidhā proktaṃ bāhyābhyantarabhedataḥ

bhautikaṃ bāhyamicchanti dvitīyaṃ cātivāhikam
tatrādyopāśrayādyogī sasaṃvittirapi sphuṭān

bāhyārthān saṃpragṛhṇāti kiṃ cidādhyātmikānapi
dvitīyopāśrayāttattvabhāvārthān saṃprapadyate

īśate ca svadehāntaḥ pīṭhakṣetrādikaṃ sphuṭam
svarūpālocanādasya yatkiṃ cidupajāyate

tatra cetaḥ sthirīkurvaṃstadeva sakalaṃ labhet
tena tatra na kurvīta caitaduttamavāñchayā

piṇḍadvayavinirmuktā kiṃ cittadvāsanānvitā
vijñānakevalāntasthā padamityabhidhīyate

yata etāmanuprāpto vijñānakramayogataḥ
rūpodayātivijñānapadatvaṃ pratipadyate

etaccaturvidhaṃ jñeyaṃ caturdhārthapratiśrayāt
sa ca tattvādisaṃvittipūrvastatpatitāvadhiḥ

padabhāvavinirmuktā kiṃ cittadanuvarjitā
avasthā svasvarūpasya prakāśakaraṇī yataḥ

tena sārūpyamityuktā rūpasthaṃ yattadānvitam
uditādiprabhedena tadapyuktaṃ caturvidhaṃ

jñānodayā ca deveśi mamatvāttatphalapradam
amunā kramayogena antarā yeṣu saṃdadhat

cetaḥ śuddhamavāpnoti rūpātītaṃ paraṃ padam
caturvidhaṃ tadapyuktaṃ saṃvittiphalabhedataḥ

trividhaṃ tatsamabhyasya sarvasiddhiphalecchayā
caturthāttu tanuṃ vyaktvā tatkṣaṇādapavṛjyate

iti piṇḍādi bhedena śivajñānamudāhṛtam
yogābhyāsavidhānena mantravidyāgaṇaṃ śṛṇu

pūrvoktavidhisaṃnaddhaḥ pradeśe pūrvacodite
nābhyādipañcadeśānāṃ parārṇaṃ kvāpi cintayet

svarūpeṇa prabhābhāraprakāśitatanūdaram
dīptibhistasya tīvrābhirā brahmabhuvanaṃ tataḥ

evaṃ saṃsmaratastasya divasaiḥ saptabhiḥ priye
rudraśaktisamāveśaḥ sumahān saṃprajāyate

āviṣṭo bahuvākyāni saṃskṛtādīni jalpati
mahāhāsyaṃ tathā geyaṃ śivaruditameva ca

karotyāviṣṭacittastu na tu jānāti kiṃ cana
māsenaivaṃ yadā mukto yatra yatrāvalokayet

tatra tatra diśaḥ sarvā īkṣate kiraṇākulāḥ
yāṃ yāmeva diśaṃ ṣaḍbhirmāsairyuktastu vīkṣate

nānākārāṇi rūpāṇi tasyāṃ tasyāṃ prapaśyati
na teṣu saṃdadheccetaḥ na cābhyāsaṃ parityajet

kurvannetadvidhaṃ yogī bhīrurunmattako bhavet
vīraḥ śaktiṃ punaryāti pramādāttadgato'pi san

vatsarādyogasaṃsiddhiṃ prāpnoti manasepsitām
parāparāmathaitasyā aparāṃ vā yathecchayā

sadbhāvaṃ mātṛsaṃghasya hṛdayaṃ bhairavasya vā
navātmānamapi dhyāyedratiśekharameva vā

aghoryādyaṣṭakaṃ vāpi māheśyādikameva vā
amṛtādiprabhedena rudrān vā śaktayo'pi vā

sarve tulyabalāḥ proktā rudraśaktisamudbhavāḥ
athavāmṛtapūrṇānāṃ prabhedaḥ procyate paraḥ

prāṇasthaṃ parayākrāntaṃ pratyekamapi dīpitam
vidyāṃ prakalpayenmantraṃ prāṇākrāntaṃ parāsanam

dvādaśārasya cakrasya ṣoḍaśārasya vā smaret
aṣṭārasyāthavā devi tasya tredhā śatasya vā

ṣaḍarasyāthavā mantrī yathā sarvaṃ tathā śṛṇu
saṃkṣepādidamākhyātaṃ sārdhaṃ cakraśatadvayam

etattriguṇātāṃ yāti strīpuṃyāmalabhedataḥ
śāntyādikarmabhedena pratyekaṃ dvādaśātmatām

dakṣaścaṇḍo haraḥ śauṇḍī pramatho bhīmamanmathau
śakuniḥ sumatirnando gopālo'tha pitāmahaḥ

nandā bhadrā jayā kālī karālī vikṛtānanā
kroṣṭakī bhīmamudrā ca vāyuvegā hayānanā

gambhīrā ghoṣaṇī caiva dvādaśaitāḥ prakīrtitāḥ
āgneyyādicatuṣkoṇā brahmāṇyādyā api priye

siddhirṛddhistathā lakṣmīrdīptirmālā śikhā śivā
sumukhī vāmanī nandā harikeśī hayānanā

viśveśī ca sumākhyā ca etā vā dvādaśa kramāt
etāsāṃ vācakā jñeyāḥ svarāḥ ṣaṇṭhavivarjitāḥ

ṣoḍaśāre'mṛtādyāśca strīpuṃpāṭhaprabhedataḥ
śrīkaṇṭho'nantasūkṣmau ca trimūrtiḥ śarvarīśvaraḥ

argheśo bhārabhūtiśca sthitiḥ sthāṇurharastathā
jhiṇṭhīśo bhautikaścaiva sadyojātastathāparaḥ

anugraheśvaraḥ krūro mahāseno'tha ṣoḍaśa
siddhirṛddhirdyutirlakṣmī meghā kāntiḥ svadhā dhṛtiḥ

dīptiḥ puṣṭirmatiḥ kīrtiḥ saṃsthitiḥ sugatiḥ smṛtiḥ
suprabhā ṣoḍaśī ceti śrīkaṇṭhādikaśaktayaḥ

ṣoḍaśāre svarā jñeyā vācakatvena sarvataḥ
aghorādyāstathāṣṭāre aghoryādyāśca devatāḥ

māheśyādyāstathā devi caturviṃśatyataḥ śṛṇu
nandādikāḥ kramātsarvā brahmāṇyādyāstathaiva ca

saṃvarto lakulīkaśca bhṛguḥ śveto bakastathā
khaḍgī pinākī bhujago navamo balireva ca

mahākālo dviraṇḍaśca cchagalāṇḍaḥ śikhī tathā
lohito meṣamīnau ca tridaṇḍyāṣāḍhināmakau

umākānto'rdhanārīśo dāruko lāṅgalī tathā
tathā someśaśarmāṇau caturvimśatyamī matāḥ

kādibhāntāḥ parijñeyā aṣṭāre yādyamaṣṭakam
makāro bindurūpasthaḥ sarveṣāmupari sthitaḥ

juṃkāro'tha tathā svāhā ṣaḍare ṣaṭkrameṇa tu
baliśca balinandaśca daśagrīvo haro hayaḥ

mādhavaśca mahādevi ṣaṣṭhaḥ saṃparikīrtitaḥ
viśvā viśveśvarī caiva hārādrī vīranāyikā [hāraudrī?]

ambā gurveti yoginyo bījaistaireva ṣaṭsmṛtāḥ
anyonyavalitāḥ sarve svāmyāvaraṇabhedataḥ

akārādikṣakārāntāḥ sarvasiddhiphalapradāḥ
dhyānārādhanayuktānāṃ yogināṃ mantriṇāmapi

athavā sarvacakrāṇāṃ madhye vidyāṃ yathepsitām
mantraṃ vā pūrvamuddiṣṭaṃ japan dhyāyan prasiddhyati

iti saṃkṣepataḥ proktaṃ sarvakāmaphalapradam