Malinivijayottara Tantra · Chapter 19

athainaṃ paramaṃ yogavidhimākarṇya śāṅkarī
punarāha prasannāsyā praṇipatya jagadgurum

sādhyatvena śrutā deva bhinnayonistu mālinī
vidyātrayaṃ savidyāṅgaṃ vidhivaccāvadhāritam

adhunā śrotumicchāmi hyabhinnā sādhyate katham
hitāya sādhakendrāṇāṃ prasādādvaktumarhasi

evamukto maheśānyā jagatāṃ patirādarāt
vikasadvadanāmbhojaḥ pratyuvāca vaco'mṛtam

ārirādhayiṣuḥ śaṃbhuṃ kuloktavidhinā budhaḥ
kulacakraṃ yajedādau budho dīkṣoktavartmanā

tato japetparāṃ śaktiṃ lakṣamekamakhaṇḍitam
parābījapuṭāntaḥsthāṃ na drutāṃ na vilambitām

tadvatkhaṇḍāṣtakaṃ cāsyā lakṣaṃ lakṣamakhaṇḍitam
japetkuleśvarasyāpi lakṣaṣaṭkamananyadhīḥ

homayitvā daśāṃśena dravyaṃ pūrvoditaṃ budhaḥ
nityānusmṛtiśīlasya vāksiddhiḥ saṃprajāyate

svakule japayuktasya aśaktasyāpi sādhane
bhavanti kanyasā devi saṃsāre bhogasaṃpadaḥ

śaktastu sādhayetsiddhiṃ madhyamāmuttamāmapi
kṛtasevāvidhiḥ pṛthvīṃ bhramedudbhrāntapantrivat

nagare pañcarātraṃ tu trirātraṃ pattane tu vai
grāme'pi caikarātraṃ tu sthitvainaṃ vidhimācaret

yannāmādyakṣaraṃ yatra varge tattasya vastunaḥ
kulamuktaṃ vidhānajñairnagarāderna saṃśayaḥ

yā yatra devatā varge vācyatve saṃvyavasthitā
saiva tasya patitvena dhyeyā pūjyā ca sādhakaiḥ

tasya kiṃ citsamāsādya nagarādikamādarāt
svadigvargasthito bhūtvā cakraṃ yojya nijodaye

avā [lacuna] samekaika udite [lacuna]
devatā māheśvara [lacuna]

krameṇaiva yathā rātrau [lacuna] tathāḻdivā
svadiśi svodaye vargaṃ tamevānusmaredbudhaḥ

tiṣṭhedanyodayaṃ yāvattataḥ svāṃ diśamāśrayet
svakulaṃ cintayan yāyāttaddeśakulameva vā

yāvadanyāṃ diśaṃ mantrī tatastadanucintayet
evaṃ yāvatsvakaṃ sthānaṃ kulacakroktavartmanā

bhramitvā punarāyāti pūrvakālakrameṇa ca
tāvadāgatya deveśi tadeśakulanāyikā

dadedbhakṣyādikaṃ kiṃ ciddāpayedvātha kena cit
anena vidhinā yukto guptācāro dṛḍhavrataḥ

yoginīmelakaṃ prāpya ṣaṇmāsenaiva siddhyati
duṣkaro'yaṃ vidhirdevi sattvahīnairnarādhamaiḥ

sarvasiddhikaro mukhyaḥ kulaśāstreṣu sarvataḥ
athaikasminnapi grāme pattane nagare'pi vā

taddigbhāgaṃ samāśritya tadevajapate kulam
tribhirabdairanāyāsātsādhayeduttamaṃ phalam

lokayātrāparityakto grāsamātraparigrahaḥ
athavā nābhicakre tu dhyānacakraṃ kulātmakam

cetasā bhramaṇaṃ kuryātsarvakālakrameṇa tu
tato'sya vatsarārdhena dehāntaṃ yoginīkulam

āvirbhavatyasaṃdehātsvavijñānaprakāśakam
tenāvirbhūtamātreṇa yogī yogikule kulī

bhavedapi patirdevi yogināṃ parameśvari
athavā cintayeddevi yakārādikramāṣṭakam

svarūpeṇa prabhākārakarālākulavigraham
tasya madhye kuleśānaṃ svabodhakamanusmaran

sarvameva ca tatpaścāccakraṃ dīpaśikhākṛtim
saṃbhūtaṃ cintayedyogī yoginīpadakāṅkṣayā

etasmin vyaktimāpanne piṇḍasthaṃ buddha ucyate
tato'syākasmikī devi mahāmudropajāyate

śṛṅgāravīrakāruṇyaśokakopādayastathā
prabuddhametaduddiṣṭaṃ piṇḍasthamamarārcite

divasairabhiyuktasya tato'sya bahubhirdinaiḥ
dharāditattvabhāvānāṃ saṃvittirupajāyate

suprabuddhaṃ tadicchanti piṇḍasthaṃ jñānamuttamam
cakraṃ ca triguṇāṣṭāramathavā tatra cintayet

kādihāntākṣarākrāntaṃ pūrvarūpaṃ sabindukam
tatrāpi pūrvavatsarvaṃ kurvannetadphalaṃ labhet

ādivarṇānvitaṃ vātha ṣoḍaśāramanusmaran
madhyakrameṇa vā yogī pañcamaṃ cumbakādibhiḥ

dvāsaptatisahasrāṇi nāḍīnāṃ nābhicakrake
yataḥ piṇḍatvamāyānti tenāsau piṇḍa ucyate

tatra sthitaṃ tu yajjñeyaṃ piṇḍasthaṃ tadudāhṛtam
a [lacuna] mala [lacuna] tkeśa [lacuna] kam

vijvaratvamavāpnoti vatsareṇa yadṛcchayā
cakrapañcakametaddhi pūrvavaddhṛdaye sthitam

padasthamiti śaṃsanti caturvhedaṃ vicakṣaṇāḥ
yatrārthāvagatirdevi tatsthānaṃpadamucyante

catuṣkamatra vijñeyaṃ bhedaṃ pañcadaśātmakam
sarvatobhadrasaṃsiddhau sarvatobhadratāṃ vrajet

jarāmaraṇanairguṇyanirmukto yogacintakaḥ
vyāptāvapi prasiddhāyāṃ māyādhastattvagocaraḥ

vetti tatpatitulyatvaṃ tadīśatvaṃ ca gacchati
padasthe kiṃ tu candrābhaṃ pradīpābhaṃ na cintayet

etadevāmṛtaughena dehamāpūrayatsvakam
cintitaṃ mṛtyunāśāya bhavatīti kimadbhutam

upalakṣaṇametatte candrabimbādyudīritam
yena yenaiva rūpeṇa cintyate parameśvarī

piṇḍasthādiprabhedeṣu tenaiveṣṭaphalapradā
rūpamaiśvaramicchanti śivasyāśivahāriṇaḥ

yadbhrūmadhyasthitaṃ yasmāttena tatravyavasthitam
pañcakaṃ sūryasaṃkāśaṃ rūpasthamabhidhīyate

tatrāpi pūrvavatsiddhirīśvarāntapadodbhavā
rūpātītaṃ tu deveśi prāgevoktamanekadhā

ityeṣā kulacakrasya samāsādvyāptiruttamā
kathitā sarvasiddhyarthaṃ siddhayogīśvarīmate

sarvadātha vibhedena pṛthagvarṇavibhedataḥ
vidyādisarvasaṃsiddhyai yogināṃ yogamicchanti

bhūyo'pi saṃpradāyena varṇabhedaśca kīrtyate
strīrūpāṃ hṛdi saṃcintya sitavastrādibhūṣitām

nābhicakropaviṣṭāṃ tu candrakoṭisamaprabhām
bījaṃ yatsarvaśāstrāṇāṃ tattadā syādanāratam

svakīyenaiva vaktreṇa nirgacchatpravicintayet
tārahāralatākāraṃ visphuratkiraṇākulam

varṇaistārakasaṃkāśairārabdhamamitādyuti
māsārdhācchāstrasaṃghātamudgiratyanivāritam

svapne māsātsamādhisthaḥ ṣaḍbhirmāsairyathecchayā
ucchinnānyapi śāstrāṇi granthataścārthato'pi vā

jānāti vatsarādyogī yadi tanmayatāṃ gataḥ
anuṣaṅgaphalaṃ caitatsamāsādupavarṇitam

vidyeśvarasamānatvasiddhiranyāśca siddhayaḥ
prativarnavibhedena yathedānīṃ tathocyate

dhyātavyā yogibhirnityaṃ tattatphalabubhukṣubhiḥ
vinyāsakramayogena trividhenāpi vartmanā

yo yatrāṅge sthito varṇaḥ kulaśaktisamudbhavaḥ
taṃ tatraiva samādhāya svarūpeṇaiva yogavit