Malinivijayottara Tantra · Chapter 18

śṛṇu devi paraṃ guhyamaprāpyamakṛtātmanām
yanna kasya cidākhyātaṃ tadadya kathayāmi te

sarvamanyatparityajya cittamatra niveśayet
mṛcchailadhāturatnādibhavaṃ liṅgaṃ na pūjayet

yajedādhyātmikaṃ liṅgaṃ yatra līnaṃ carācaram
bahirliṅgasya liṅgatvamanenādhiṣṭhitaṃ yataḥ

ataḥ prapūjayedetatparamādvaitamāśritaḥ
anudhyānena deveśi pareṇa paramāṇunā

yo'nudhyātaḥ sa evaitalliṅgaṃ paśyati nāparaḥ
yadetatspandanaṃ nāma hṛdaye samavasthitam

tatra cittaṃ samādhāya kampa udbhava eva ca
tatra praśāntimāpnoti māsenaikena yogavit

hṛdayādutthitaṃ liṅgaṃ brahmarandhrāntamīśvari
svaprabhoddyotitāśeṣadehāntamamaladyuti

tatraiva paśyate sarvaṃ mantrajālaṃ mahāmatiḥ
tanmastakaṃ samāruhya māsamātramananyadhīḥ

tatastatra suniṣpanne ṣaṇmāsātsarvasiddhayaḥ
etalliṅgamavijñāya yo liṅgī liṅgamāśrayet

vṛthāḻpariśramastasya na liṅgaphalamaśnute
śaivametanmahāliṅgamātmaliṅge [na] siddhyati

siddhe'tra liṅgavalliṅgī liṅgastho liṅgavarjitaḥ
bhavatīti kimāśrayametasmālliṅgaliṅitaḥ

anena liṅgaliṅgena yadā yogī bahirvrajet
tadā liṅgīti vijñeyaḥ purāntaṃ liṅgamiṣyate

etasmālliṅgavijñānādyogino liṅgitāḥ smṛtāḥ
anenādiṣṭhitāḥ mantrāḥ śāntaraudrādibhedataḥ

bhavantīti kimāścaryaṃ tadbhāvagatacetasaḥ
raudraṃ bhāvaṃ samśritya yadi yogaṃ samabhyaset

durnirīkṣyo bhavetsarvaiḥ sadevāsuramānuṣaiḥ
gamāgamavinirmuktaḥ sarvadṛṣṭirakātaraḥ

muhūrtaṃ tiṣṭhate yāvattāvadeveśamāpnuyāt
āviṣṭaḥ paśyate sarvaṃ sūryakoṭisamadyuti

yattadakṣaramavyaktaṃ śaivaṃ bhairavamityapi
taṃ dṛṣṭvā vatsarārdhena yogī sarvajñatāmiyāt

ya evainaṃ samāsādya yastṛptimadhigacchati
na ca kṛtrimayogeṣu sa muktaḥ sarvabandhanaiḥ

prāṇāyāmādikairliṅgairyogāḥ syuḥ kṛtrimā matāḥ
tena te'kṛtakasyāsya kalāṃ nārhanti ṣoḍaśīm

etatsamabhyasan yogī divyacihnāni paśyati
upaviṣṭa ṛjuryogī na kiñcidapi cintayet

muhūrtānnirdahetsarvaṃ dehasthamakṛtaṃ kṛtam
dahyamānasya tasyeha prakampānubhavo bhavet

tatastatra sthirībhūte jyotirantaḥ prakāśate
tāṃ dṛṣṭvā paramāṃ dīptiṃ divyajñānaṃ pravartate

svatantraśivatāmeti bhuñjāno viṣayānapi
animīlitadivyākṣo yāvadāste muhūrtakam

tasmātsarvagataṃ bhāvamātmanaḥ pratipadyate
tameva bhāvayedyatnātsarvasiddhiphalepsayā

tatastaṃ bhāvayedyogī kampamāno'tyanulbaṇam
tataḥ prapaśyate tejo lalāṭāgre samantataḥ

dṛṣṭvā tatparamaṃ tejo divyajñānamavāpnuyāt
ṣaḍbhirmāsairanāyāsādvatsareṇa prasiddhyati

śivatulyabalo bhūtvā yatreṣṭaṃ tatra gacchati
cetaḥ sarvagataṃ kṛtvā muhūrtādeva yogavit

śakyāveśamavāpnoti prakampānubhavātmakam
tatastatra sthirībhūte māsamātreṇa yogavit

śāktaṃ prapaśyate tejaḥ sabāhyābhyantare sthiram
tatra samyaksuniṣpanne sarvendriyajamādarāt

tatra sphuṭamavāpnoti vijñānamanivāritam
sarvagaṃ cātra vijñeyaṃ yadakṣarthena saṃgatam

evamevedamākhyātaṃ tattvaṃ paryāyabhedataḥ
karmendriyāṇi buddhyantaṃ parityajya samastakam

bhāvayetparamāṃ śaktiṃ sarvatraiva vicakṣaṇaḥ
niścalaṃ tu manaḥ kṛtvā yāvattanmayatāṃ gataḥ

tāvatsarvagata bhāvaṃ kṣaṇamātrātprapadyate
nirdahya pāśajālāni yatheṣṭaṃ phalamāpnuyāt

tasmātsamabhyasedenaṃ kṛtvā niścayamātmanaḥ
yatrādhāravinirmukto jīvo layamavāpsyati

tatsthānaṃ sarvamantrāṇāmutpattikṣetramiṣyate
dvividhaṃ tatparijñeyaṃ bāhyābhyantarabhedataḥ

prayātavādhikāḻmātrā sā jñeyā sarvasiddhidā
athavā gacchatastasya svapnavṛttyā vicakṣaṇaḥ

nirodhaṃ madhyame sthāne kurvīta kṣaṇamātrakam
paśyate tatra cicchaktiṃ tuṭimātrāmakhaṇḍitām

tadeva paramaṃ tattvaṃ tasmājjātamidaṃ jagat
sa eva mantradehastu sidhhayogīśvarīmate

tenaivāliṅgitā mantrāḥ sarvasiddhiphalapradāḥ
īṣadvyāvṛttavarṇastu heyopādeyavarjitaḥ

yāṃ saṃvittimavāpnoti śivatattvaṃ taducyate
tatra cittaṃ sthirīkurvan sarvajñatvamavāpnuyāt

tatraiva divyacihnāni paśyate ca na saṃśayaḥ
yatraiva kutra cidgātre vikāra upajāyate

saṃkalpapūrvako devi tattattvaṃ tattvamuttamam
tadabhyasenmahāyogī sarvajñatvajigīṣayā

prāpnoti paramaṃ sthānaṃ bhuktvā siddhiṃ yathepsitām
gandhapuṣpādibhiryogī nityamātmānamādarāt

brahmarandhrapradeśe tu pūjayedbhāvato'pi vā
dravaddravyasamāyogātsnapanaṃ tasya jāyate

gandhapuṣpādigandhasya grahaṇaṃ yajanaṃ matam
ṣaḍrasāsvādanaṃ tasya naivedyāya prakalpate

yamevoccārayedvarṇaṃ sa japaḥ parikīrtitaḥ
tatra cetaḥ samādhāya dahyamānasya vastunaḥ

jvālanatastiṣṭhate yāvattāvaddhomaḥ kṛto bhavet
yadeva paśyate rūpaṃ tadeva dhyānamiṣyate

prasaṅgādidamuddiṣṭamadvaitayajanaṃ mahat
udayārkasamābhāsamūrdhvadvāre manaḥ sthiram

hṛdi vāḻtattathā kuryāddvādaśānte'thavāpnuyāt
tato māsārdhamātreṇa tadrūpamupalabhyate

upalabdhaṃ tadabhyasya sarvajñatvāya kalpate
vastreṇa mukhamācchādya yogī lakṣye niyojayet

nābhikandādadhastāttu yāvattattvaṃ śikhāvadhi
sūkṣmatārakasaṃkāśaṃ raśmijvālākarālitam

prāṇaśaktyavasāne tu paśyate rūpamātmanaḥ
tadevābhyāsato devi vikāsamupagacchati

tanmukhaṃ sarvamantrāṇāṃ sarvatantreṣu paṭhyate
tato'sya māsamātreṇa kā citsaṃvittiriṣyate

yataḥ sarvaṃ vijānāti hṛdaye saṃvyavasthitaṃ
tāṃ jñātvā kasya cidyogī na samyakpratipādayet

adhyāyātkathanaṃ kuryānnākāle mṛtyumāpnuyāt
mṛto'pi śvabhrasaṃghāte krameṇa paripacyate

evaṃ jñātvāḻmahādevi svahitaṃ samupārjayet
śiṣyo'pyanyāyato gṛhṇannarakaṃ pratipadyate

na ca tatkālamāpnoti vacastvavitathaṃ mama
nyāyena jñānamāsādya paścānna pratipadyate

tadā tasya prakurvīta vijñānāpahṛtiṃ budhaḥ
dhyātvā tamagrataḥ sthāpya svarūpeṇaiva yogavit

ṣaḍvidhaṃ vinyasenmārgaṃ tasya dehe puroktavat
tatastaṃ dīpamālokya tadaṅguṣṭhāgrataḥ kramāt

nayettejaḥ samāhṛtya dvādaśāntamananyadhīḥ
tatastaṃ tatra saṃcintya śivenaikatvamāgatam

tatra dhyāyettamorūpaṃ tirobhāvanaśīlanam
patantīṃ tena mārgeṇa hyaṅguṣṭhāgrāntamāgatām

sabāhyābhyantaraṃ dhyāyenniviḍāñjanasaprabhām
anena vidhinā tasya mūḍhabuddherdurātmanaḥ

vijñānamantravidyādyā na kurvantyupakāritām
cittābhisandhimātreṇa hyadṛṣṭasyāpi jāyate

kathaṃ cidupalabdhasya nityamevāpakāriṇaḥ
athavā sūryabimbābhaṃ dhyātvā vicchedyamagrataḥ

svarbhānurūpayā śaktyā grastaṃ tamanucintayet
aparādhasahasraistu kopena mahtānvitah

vidhimenaṃ prakurvīta krīḍārthaṃ na tu jātu cit
anena vidhinā bhraṣṭo vijñānādapareṇa ca

na śakyo yojituṃ bhūyo yāvattenaiva noddhṛtaḥ
karuṇākṛṣṭacittastu tasya kṛtvā viśodhanam

prāṇāyāmādibhistīvraiḥ prāyaścittaiṛ vidhiśrutaiḥ
tatastasya prakurvīta dīkṣāṃ pūrvoktavartmanā

tataḥ sarvamavāpnoti phalaṃ tasmādananyadhīḥ
evaṃ jñātvā prayatnena gurumāsādayetsudhīḥ

yataḥ saṃtoṣa utpannaḥ śivajñānāmṛtātmakaḥ
na tasyānveṣayedvṛttaṃ śubhaṃ vā yadi vāśubham

sa eva tadvijānāti yuktaṃ vāyuktameva vā
akāryeṣu yadā saktaḥ prāṇadvayāpahāriṣu

tadā nivāraṇīyo'sau praṇatena vipaścitā
tenātivāryamāṇo'pi yadyasau na nivartate

tadānyatra kva cidgatvā śivamevānucintayet
eṣa yogavidhiḥ proktaḥ samāsādyogināṃ hitaḥ

nātra śuddhirna cāśuddhirna bhakṣyādivicāraṇam
na dvaitaṃ nāpi cādvaitaṃ liṅgapūjādikaṃ na ca

na cāpi tatparityāgo niṣparigrahatāpi vā
saparigrahatā vāpi jaṭābhasmādisaṃgrahaḥ

tattyāgo na vratādīnāṃ caraṇācaraṇaṃ ca yat
kṣetrādisaṃpraveśaśca samayādiprapālanam

parasvarūpaliṅgādi nāmagotrādikaṃ ca yata
nāsmin vidhīyate kiṃ cinna cāpi pratiṣidhyate

vihitaṃ sarvamevātra pratiṣiddhamathāpi vā
kiṃ tvetadatra deveśi niyamena vidhīyate

tattve cetaḥ sthirīkāryaṃ suprayatnena yoginā
tacca yasya yathaiva syātsa tathaiva samācaret

tattve niścalacittastu bhuñjāno viṣayānapi
na saṃspṛśyeta doṣaiḥ sa padmapatramivāmbhasā

viṣāpahārimantrādisaṃnaddho bhakṣayannapi
viṣaṃ na muhyate tena tadvadyogī mahāmatiḥ

ityetatkathitaṃ devi kimanyatparipṛcchasi