Malinivijayottara Tantra · Chapter 17

athaitatsarvamuddiṣṭaṃ yadi na sphuṭatāṃ vrajet
sphuṭīkṛte'sthire tatra na manastiṣṭhate sphuṭam

gatibhaṅgaṃ tatastasya prāṇāyāmena kārayet
sa ca pañcavidhaḥ proktaḥ pūrakādiprabhedataḥ

pūrakaḥ kumbhakaścaiva recako hyapakarṣakaḥ
utkarṣaḥ pañcamo jñeyastadabhyāsāya yogibhiḥ

pūrakaḥ pūraṇādvāyordvedhā ṣoḍhā ca gīyate
svabhāvapūraṇādeko virecyānyaḥ prapūritaḥ

nāsāmukhordhvatālūnāṃ randhrabhedādvibhidyate
bhinnaḥ ṣoḍhātvamabhyeti punarbhedairanantatām

kumbhaḥ pañcavidho jñeyastatraikaḥ pūritādanu
vidhṛto recakātpaścāddvitīyaḥ parikīrtitaḥ

dvayorante dvayaṃ cānyatsvabhāvasthaśca pañcamaḥ
sthānāntaraprabhedena gacchatyeṣo'pyanantatām

recakaḥ pūrvavajjñeyo dvidhābhūtaḥ ṣaḍātmakaḥ
sthānasaṃstambhito vāyustasmādutkṛṣya nīyate

yo'nyapradeśasaṃprāptyai sa utkarṣaka iṣyate
tasmādapi punaḥ sthānaṃ yato nītastadāhṛtaḥ

apakarṣaka ityukto dvāvapyetāvanekadhā
eṣāmabhyasanaṃ kuryātpadmakādyāsanasthitaḥ

adhamaḥ sakṛdudghāto madhyamo dviguṇo mataḥ
jyeṣṭhaḥ syādyastrirudghātaḥ sa ca dvādaśamātrakaḥ

trirjānuveṣṭanānmātrā triguṇācchoṭikātrayāt
ajitāṃ nākramenmātrāṃ vāyudoṣanivṛttaye

pratyaṅgadhāraṇādvāyuṃ na ca cakṣuṣi dhārayet
nābhihṛttālukāntasthe vidhṛte maruti kramāt

catasro dhāraṇā jñeyāḥ śikhyambvīśāmṛtātmikāḥ
yadyatra cintayeddravyaṃ tattatsarvagataṃ smaret

bindunādātmakaṃ rūpamīśānī dhāraṇā śritā
amṛtāyāṃ smaredinduṃ kālatyāgoktavartmanā

dhāraṇābhirihaitābhiryogī yogapathe sthitaḥ
heyaṃ vastu parityajya yāyātpadamanāmayam

trivedadvīndusaṅkhyātasamudghātāstvimā matāḥ
etābhirapyadho'pyuktaṃ phalaṃ prāpnotyanuttamam

yogāṅgatve samāne'pi tarko yogāṅgamuttamam
heyādyālocanāttasmāttatra yatnaḥ praśasyate

mārge cetaḥ sthirībhūtaṃ heye'pi viṣayecchayā
prerya tenānayettāvadyāvatpadamanāmayam

tadarthabhāvanāyuktaṃ mano dhyānamudāhṛtam
tadeva paramaṃ jñānaṃ bhāvanāmayamiṣyate

muhūrtādeva tatrasthaḥ samādhiṃ pratipadyate
tatrāpi ca suniṣpanne phalaṃ prāpnotyabhīpsitam

yatkiṃ ciccintayedvastu nānyatvaṃ pratipadyate
tena tanmayatāmāpya bhavetpaścādabhāvavat

pañcatāmiva saṃprāptastīvrairapi na cālyate
tataḥ śabdādibhiryogī yoginīkulanandanaḥ

ityanena vidhānena pratyāhṛtya mano muhuḥ
prāṇāyāmādikaṃ sarvaṃ kuryādyogaprasiddhaye

sarvamapyathavā bhogaṃ manyamāno virūpakam
svaśarīraṃ parityajya śāśvataṃ padamṛcchati

tadā pūrvoditaṃ nyāsaṃ kālānalasamaprabham
viparītavidhānena kuryātskṛkchindiyuggatam

āgneyīṃ dhāraṇāṃ kṛtvā sarvamarmapratāpinīm
pūrayedvāyunā dehamaṅguṣṭhānmastakāntikam

tamutkṛṣya tato'ṅguṣṭhādbrahmarandhrāntamānayet
chedayetsarvamarmāṇi mantreṇānena yogavit

jīvamādidvijārūḍhaṃ śiromālādisaṃyutam
kṛtvā tadagre kurvīta dvijamādyamajīvakam

ityeṣā kathitā kāla rātrirmarmanikṛntanī
naināṃ samuccareddevi ya iccheddīrghajīvitam

śatārdhoccārayogena jāyate mūrdhni vedanā
evaṃ pratyayamālocya mṛtyujiddhyānamāśrayet

nipīḍya taṃ tatastatra bindunādādicintakaḥ
vegādutkṛṣya tatrasthaṃ kālarātryā visarjayet

anena kramayogena ane yojitaḥ parame pade
samayyapi mahādevi dīkṣoktaṃ phalamaśnute

[lacuna] siddhayogeśvarīmate
tatsakāśādbhavetsiddhiḥ sarvamantroktalakṣaṇā

tadeva mantrarūpeṇa manuṣyaiḥ samupāsyate
eṣa te jñeyasadbhāvaḥ kathitaḥ suravandite

abhaktasya guhasyāpi nākhyeyo jātucittvayā
udaraṃ sarvamāpūrya brahmarandhrāntamāgatam

vāyuṃ bhramaṇayogena tatastaṃ prerayettathā
yāvatprāṇapradeśāntaṃ yogināṃ manasepsitam

prāpyate punarāvṛtya tathaiva nābhimaṇḍalam
evaṃ samabhyasettāvadyāvadvāsarasaptakam

tadāprabhṛti saṃyuktaḥ karṣayettridaśānapi
anenākṛṣya vijñānaṃ sarvayoginiṣevitam

gṛhṇīyādyogayuktātmā kimanyaiḥ kṣudraśāsanaiḥ
prathamaṃ mahatī ghūrṇirabhyāsāttasya jāyate

tataḥ prakampo deveśi jvalatīva tato'pyaṇuḥ