Malinivijayottara Tantra · Chapter 14

atha gandhādipūrvāṇāṃ tanmātrāṇāmanukramāt
dhāraṇāḥ saṃpravakṣyāmi tatphalānāṃ prasiddhaye

pītakaṃ gandhatanmātraṃ turyāśraṃ parvasaṃmitam
nāsārandhrāgragaṃ dhyāyedvajralāñchanalāñchitam

daśamāddivasādūrdhvaṃ yogino'nanyacetasaḥ
kvāpi gandhaḥ samāyāti dvidhābhūto'pyanekadhā

tato'sya ṛtumātreṇa śuddho gandhaḥ sthirībhavet
ṣaḍbhirmāsaiḥ svayaṃ gandha maya eva bhaviṣyati

yo yatra rocate gandhastaṃ tatra kurute bhṛśam
tryabdātsiddhimavāpnoti prepsitāṃ pāñcabhautikīm

tadūrdhvamātmano rūpaṃ tatra saṃcintayedyadi
gandhāvaraṇavijñānaṃ tribhirabdairavāpnuyāt

īṣaddīptiyutaṃ tatra tanmaṇḍalavivarjitam
dhyāyan prapaśyate sarvān gandhāvaraṇavāsinaḥ

dharātattvoktabimbābhaṃ tatraivamanucintayan
tatsamānatvamabhyeti pūrvavaddvitaye sthire

svarūpaṃ tatra saṃcintya bhāsayantamadhaḥsthitam
tadīśatvamavāpnoti pūrvoktenaiva vartmanā

dharātattvoktavatsarvamata ūrdhvamanusmaran
tadrūpaṃ phalamāpnoti gandhāvaraṇasaṃsthitam

rasarūpāmato vakṣye dhāraṇāṃ yogisevitām
yayā sarvarasāvāptiryoginaḥ saṃprajāyate

jalabudbudasaṃkāśaṃ rājanāḍyagrasaṃsthitaṃ
cintayedrasatanmātraṃ jihvāgrādhāramātmanaḥ

suśītaṃ ṣaḍrasaṃ snigdhaṃ tadgatenāntarātmanā
tato'sya māsamātreṇa rasāsvādaḥ pravartate

lavaṇādīn parityajya yadā madhuratāṃ gataḥ
tadā tannigiran yogī ṣaṇmāsānmṛtyujidbhavet

jarāvyādhivinirmuktaḥ kṛṣṇakeśo'cyutadyutiḥ
jīvedācandratārārkamabhyasyaṃśca kva citkva cit

pūrvoktabudbudākāraṃ svarūpamanucintayan
nīrāvaraṇavijñānamāpnotīti kimadbhutam

tameva dyutisaṃyuktaṃ dhyāyannādhāravarjitam
paśyate vatsaraiḥ sarvaṃ rasāvaraṇamāśritam

jalatattvoktabimbādi tadūrdhvamanucintayan
pūrvoktaṃ sarvamāpnoti rasāvaraṇajaṃ sphuṭam

ato rūpavatīṃ vakṣye divyadṛṣṭipradāṃ śubhām
dhāraṇāṃ sarvasiddhyarthaṃ rūpatanmātramāśritām

ekāntastho yadā yogī bahirmīlitalocanaḥ
śaratsaṃdhyābhrasaṃkāśaṃ yattatkiṃ citprapaśyati

tatra cetaḥ samādhāya yāvadāste daśāhnikam
tāvatsa paśyate tatra bindūn sūkṣmatamānapi

ke cittatra sitā raktāḥ pītā nīlāstathāpare
tān dṛṣṭvā teṣu saṃdadhyānmano'tyantamananyadhīḥ

ṣaṇmāsātpaśyate teṣu rūpāṇi subahūni ca
tryabdāttānyeva tejobhiḥ pradīptāni sthirāṇi ca

tānyabhyasyaṃstato dvyabdādbimbākārāṇi paśyati
tato'bdātpaśyate tejaḥ ṣaṇmāsātpuruṣākṛti

trimāsādvyāpakaṃ tejo māsātsarvaṃ visarpitam
kālakramācca pūrvoktaṃ rūpāvaraṇamāśritam

sarvaṃ phalamavāpnoti divyadṛṣṭiśca jāyate
itīyaṃ kalpanāśūnyā dhāraṇākṛtakoditā

daśapañcavidho bhedaḥ svayamevātra jāyate
ato'syāṃ niścayaṃ kuryātkimanyaiḥ śāstraḍambaraiḥ

ataḥ sparśavatīmanyāṃ kathayāmi tavādhunā
dhāraṇāṃ tu yayā yogī vajradehaḥ prajāyate

ṣaṭkoṇamaṇḍalāntaḥsthamātmānaṃ paribhāvayet
rūkṣamañjanasaṃkāśaṃ pratyaṅgasphuritākulam

tato'sya daśabhirdevi divasaistvaci sarvataḥ
bhavetpipīlikāsparśastatastamanucintayan

vajradehatvamāsādya pūrvoktaṃ pūrvavallabhet
pūrvoktamaṇḍalākāraṃ pūrvarūpaṃ vicintayan

sparśatattvāvṛtijñānaṃ labhan kena nivāryate
hīnamaṇḍalamātmānaṃ dhyāyettatpatisiddhaye

yayā saṃsiddhayā sarva sparśavedī bhaviṣyati
karṇau pidhāya yatnena nimīlitavilocanaḥ

saṃśṛṇoti mahāghoṣaṃ cetastatrānusaṃdadhet
dīpyate jāṭharo vahnistato'sya daśabhirdinaiḥ

dūrācchravaṇavijñānaṃ ṣaṇmāsādupajāyate
yastasyānte dhvanirmandaḥ kiṃ citkiṃ cidvibhāvyate

sakalātmā sa vijñeyastadabhyāsādananyadhīḥ
śabdāvaraṇavijñānamāpnoti sthiratāṃ gatam

yaḥ punaḥ śrūyate śabdastadante śaṅkhanādavat
pralayākalarūpaṃ tadabhyasyaṃ tatphalepsubhiḥ

sa evātitarāmanyaśabdapracchādako yadā
vijñānākala ityuktastadāsāvaparājite

manohlādakaro yo'nyastadante saṃvibhāvyate
sa mantra iti vijñeyo yogibhiryogakāṅkṣibhiḥ

tatastu śrūyate yo'nyaḥ śāntaghaṇṭāninādavat
sa mantreśa iti proktaḥ sarvasiddhiphalapradaḥ

ghaṇṭānādavirāmānte yaḥ śabdaḥ saṃprajāyate
mantreśeśapadaṃ taddhi siddhīnāṃ kāraṇaṃ mahat

anilenāhatā vīṇā yādṛṅnādaṃ vimuñcati
tādṛśo yo dhvanistatra taṃ vidyācchāmbhavaṃ padaṃ

pṛthagvā kramaśo vāpi sarvānetān samabhyaset
prāpnoti sarvavitsiddhīḥ śabdāvaraṇamāśritāḥ

ityetāḥ kathitāḥ pañca tanmātrāṇāṃ tu dhāraṇāḥ