Malinivijayottara Tantra · Chapter 15

atha vāgindriyādīnāṃ manontānāmanukramāt
dhāraṇāḥ saṃpravakṣyāmi daśaikāñca samāsataḥ

vadanāntarnamaḥśabdamātmanaścintayedbudhaḥ
gṛhītavāktvamabhyeti maunena madhusūdani

sarvatrāskhalitā vāṇī ṣaḍbhirmāsaiḥ pravartate
sarvaśāstrārthavettṛtvaṃ vatsarādupajāyate

vāgevāsya pravarteta kāvyālaṅkārabhūṣitā
tribhirabdaiḥ svayaṃ kartā śāstrāṇāṃ saṃprajāyate

tatraiva cintayeddehaṃ svakīyamanurūpataḥ
bhūyastameva dhavalamīṣattejovabhāsitam

rasāntaḥsomabimbāditejontaṃ tamanusmaret
sarvaṃ phalamavāpnoti vāgāvaraṇajaṃ kramāt

pāṇau cittaṃ samādāya ṣaṇmāsāddūrasaṃsthitam
vastu gṛhṇātyasaṃdehāttryabdātpāre'pi vāridheḥ

tatrātmadehapūrvaṃ tu padmābhamanucintayan
savyāpārādibhedena caturdaśakamādarāt

puroktakālaniyamātpūrvoktenaiva vartmanā
sarvaṃ phalamavāpnoti hastāvṛtisamāśritam

pādāvevaṃvidhau dhyāyan vatsaratrayamādarāt
muhūrtena samudrāntāmaśrānto bhramati kṣitim

caturdaśa samabhyarcya svadehādikamabhyasan
prāpnoti pūrvavatsarvaṃ phalaṃ pādāvṛtisthitam

pāyāvapi manastattvaṃ sthirīkurvannavāpsyati
māsena tadbhavavyādhi vimuktimavilambataḥ

puṇyaślokatvamāpnoti tribhirabdairanādarāt
caturdaśavidhaṃ cātra pūrvavatphalamāpsyati

svarūpataḥ smarelliṅgaṃ māsamātrājjitendriyaḥ
ṣaḍbhirmāsairanāyāsādicchākāmitvamāpnuyāt

caturdaśavidhe bhede tatrābhyaste mahāmatiḥ
liṅgāvaraṇajaṃ sarvaṃ pūrvavallabhate phalam

svajihvāminduvarṇābhāṃ cintayeddaśabhirdinaiḥ
prāpnotyanubhavaṃ yogī jihvābhāvamivātmanaḥ

āsvādayati dūrasthaṃ ṣaṇmāsādekamānasaḥ
vatsaraistu tribhiḥ sākṣālleḍhyasau paramāmṛtam

yenāsau bhavate yogī jarāmaraṇavarjitaḥ
apeyādiprasakto'pi na pāpaiḥ paribhūyate

pūrvavatsarvamanyacca svadehādyanucintayan
phalamāpnotyasaṃdehādrasanāvṛtisaṃbhavam

kanakābhaṃ svakaṃ ghrāṇamanucintayataḥ śanaih
divasairdaśabhirghrāṇaśunyatānubhavo bhavet

ṣaṇmāsādgandhamāghrāti dūrasthasyāpi vastunaḥ
ghātayedgandhamāghrāya yasya ruṣṭo bhaviṣyati

vatsaraistu tribhirdivyaṃ gandhamāsādya yogavit
jarāmaraṇanairguṇyayukto divyatvamarhati

sarvamanyadyathoddiṣṭaṃ tathaiva ca vicintayet
kramikaṃ phalamāpnoti ghrāṇāvaraṇamāsthitam

udayādityasaṃkāśe cintayaṃścakṣuṣī nije
daśāhāccakṣuṣo raktasrāvānubhavamāpsyati

vedanā mahatī cāsya lalāṭe saṃprajāyate
na bhetavyaṃ mahādevi na cābhyāsaṃ parityajet

saṃtyajannandhatāmeti tena yatnātsamabhyaset
ṣaḍbhirmāsairmahāyogī divyadṛṣṭiḥ prajāyate

chidrāṃ prapaśyate bhūmiṃ kaṭāhāntāmatandritaḥ
ādhruvāntamathordhvaṃ ca karāmalakavadbudhaḥ

vatsaraistu tribhiryogī brahmāṇḍāntaṃ prapaśyati
tadantaryoginījñānaṃ śarīrasthaṃ prajāyate

svadehādikamanyacca pūrvoktaṃ pūrvavatsmaran
nayanāvṛtijaṃ sarvamāpnotīti kimadbhutam

sarvatrāñjanapatrābhāṃ nistaraṅgāṃ tvacaṃ smaran
śastrairapi na māsena chettuṃ śakyo bhaviṣyati

ṣaṇmāsādatitīvreṇa nāgnināpyeṣa dahyate
vatsaratritayādyogī vajropalaviṣāhibhiḥ

pīḍyate na kadā citsyādajarāmaratāṃ gataḥ
sparśāvṛtijavijñāna gītavacca caturdaśa

bhedāḥ saha phalairjñeyāḥ pūrvakālānusārataḥ
kiṃ tvatra cintayeddehaṃ svadehādibhirāvṛtam

saṃdadhānaḥ svakaṃ cetaḥ śrotrākāśe vicakṣaṇaḥ
dūrācchravaṇavijñānaṃ ṣaṇmāsādupajāyate

tribhiḥ saṃvatsarairdevi brahmāṇḍāntarudīritam
śṛṇoti sa sphuṭaṃ sarvaṃ jarāmaraṇavarjitaḥ

tatrākāśoktavatsarvaṃ svadehādyanucintayet
śrotrāvaraṇajaṃ sarvaṃ phalamāpnoti pūrvavat

manovatīmato vakṣye dhāraṇāṃ sarvasiddhidām
yayā saṃsiddhayā devi sarvasiddhiphalaṃ labhet

mana eva manuṣyāṇāṃ kāraṇaṃ bandhamokṣayoḥ
tasmāttadabhyasenmantrī yadīcchenmokṣamakṣayam

tadardhacandrasaṃkāśamadhovaktraṃ hṛdi sthitam
cintayanmāsamātreṇa pratibhāṃ pratipatsyate

akasmātpaśyate kiṃ cidakasmācchṛṇute tathā
sarvendriyātmakaṃ jñānamakasmācca kva citkva cit

svasvakendriyavijñānaṃ saṃpaśyedvatsaratrayāt
bhavate yogayuktasya yoginaḥ suparisphuṭam

svadehādikamapyatra pūrvoktavadanusmaran
cittāvaraṇavijñānaṃ prāpya somaguṇaṃ labhet

ityekādaśa gītāni samabhyasyāni te tathā
indriyāṇi yataḥ sarvaṃ phalameṣu pratiṣṭhitam

bandhamokṣāvubhāvetāvindriyāṇi jagurbudhāḥ
vigṛhītāni bandhāya vimuktāni vimuktaye

etāni vyāpake bhāve yadā syurmanasā saha
vimuktānīti vidvadbhirjñātavyāni tadā priye

yadā tu viṣaye kvāpi pradeśāntaravartini
saṃsthitāni tadā tāni baddhānīti pracakṣate

ityayaṃ dvividho bhāvaḥ śuddhāśuddhaprabhedataḥ
indriyāṇāṃ samākhyātaḥ siddhayogīśvarīmate