Malinivijayottara Tantra · Chapter 13

athātaḥ sampravakṣyāmi dhāraṇāṃ vāruṇīmimām
yayā saṃsiddhayogena jalāntādhipatirbhavet

jalāntaḥsthaṃ smareddehaṃ sitaṃ śītaṃ suvartulam
sabāhyābhyantaraṃ yogī nānyadastīti cintayet

evamabhyasyatastasya saptāhātklinnatā bhavet
pittavyādhiparityakto māsena bhavati dhruvam

snigdhāṅgaḥ snigdhadṛṣṭiśca nīlakuñcitamūrdhajaḥ
bhavatyabdena yogīndrastribhirvarṣati meghavat

ityeṣā vāruṇī proktā prathamā śuddhadhāraṇā
adhunā saṃpravakṣyāmi bhedairbhinnāmimāṃ punaḥ

pūrvavaccintayeddehaṃ savyāpāraṃ sitaṃ svakam
jalopari sthitaṃ devi tadgatenāntarātmanā

saptāhānmucyate rogaiḥ sarvaiḥ pittasamudbhavaiḥ
ṣaṇmāsājjāyate sthairyaṃ yadi tanmayatāṃ gataḥ

jalāvaraṇavijñānamabdairasya tribhirbhavet
nirvyāpāraprabhede'pi sarvatra varuṇopamaḥ

sa yāti vāruṇaṃ tattvaṃ bhūmikāḥ kramaśo'bhyaset
pūrvavatkaṇṭhamadhyasthamātmānaṃ dvādaśāṅgulam

saṃsmarañjalatattveśaṃ prapaśyatyacirāddhruvam
taddṛṣṭiḥ sthiratāmeti svarūpe pañcame sthire

dvibhede'pi sthirībhūte candrabimbe ghanāvṛte
tatsamānatvamabhyeti tataḥ sakalarūpiṇī

cintyate dehamāpūrya sitavarṇena tejasā
tadeva sthiratāmeti tatra susthiratāṃ gate

ghanamuktendubimbābhaṃ tataḥ samanucintayet
tatpatitvaṃ samabhyeti dvitīye sthiratāṃ vrajet

adhaḥprakāśakaṃ śuklaṃ tatastejo vicintayet
vidyeśvaratvamāpnoti jalāvaraṇasaṃbhavam

svadehavyāpini dhyāte tatrasthe śuklatejasi
sarvādhipatyamāpnoti susthire tatra susthiram

dhyeyatattvasamānatvamavasthātritaye sthire
dvitaye ca tadīśāna saṃvittirupajāyate

dvitaye'nyatra tattulyaḥ sthiro bhavati yogavit
ṣaṭke sarveśatāmeti dvitaye'nyatra tu cyutiḥ

ityayaṃ sarvatattveṣu bhede pañcadaśātmake
jñeyo vidhirvidhānajñaiḥ phalapañcakasiddhidaḥ

tatphalāntarametasmāduktaṃ yaccāpi vakṣyate
anuṣaṅgaphalaṃ jñeyaṃ tatsarvamavicārataḥ

itīyaṃ vāruṇī proktā prabhedairdaśapañcabhiḥ
yogināṃ yogasiddhyarthamāgneyīmadhunā śṛṇu

trikoṇaṃ cintayeddehaṃ raktajvālāvalīdharam
svaśarīrotthito vahnirjvalan vai sarvadāhakaḥ

saptabhirdivasairdevi taikṣṇyamasyopajāyate
vātaśleṣmabhavaiḥ sarvairmāsānmucyati sādhakaḥ

nidrāhīnaśca bahvāśī svalpaviṇmūtrakṛdbhavet
icchayā nirdahedyadyatspṛṣṭaṃ vastu ṛtukṣayāt

tryabdādagnisamo bhūtvā krīḍatyagniryathecchayā
sarvaṃ nirdahati kruddhaḥ saśailavanakānanam

trikoṇamaṇḍalārūḍhamātmānamanucintayet
savyāpārādibhedena sarvatrāpi vicakṣaṇaḥ

saptāhādvyādhibhirhīnaḥ ṣaṇmāsādagnivadbhavet
tribhirabdaiḥ sa saṃpūrṇaṃ tejastattvaṃ prapaśyati

yacchaktibhede yaddṛṣṭaṃ tattadbhede sthirībhavet
pūrvavattālumadhyasthamātmānaṃ jvalanaprabham

dhyāyan prapaśyate tejastattveśānakhilān kramāt
dhūmākrāntāgnisaṃkāśaṃ ravibimbasamākṛtim

dhyāyaṃstanmadhyatastejastattveśasamatāṃ vrajet
prabhāhatatamojālaṃ vidhūmāgnisamaprabham

tatraiva sakalaṃ dhyāyettatpatitvamavāpnuyāt
divasāgniprabhākāraṃ tatra tejo vicintayet

tanmantreśvaratāmeti tatra susthiratāṃ gataḥ
maṇipradīpasaṃkāśaṃ tejastatra prakāśayet

mantreśeśatvamabhyeti yogī tanmayatāṃ gataḥ
sabāhyābhyantaraṃ tejo dhyāyan sarvatra tadgataḥ

tasmānna cyavate sthānādāsaṃhāramakhaṇḍitaḥ
saṃhāre tu paraṃ śāntaṃ padamabhyeti śāṅkaram

ityeṣā pañcadaśadhā kathitā vahnidhāraṇā
svadehaṃ cintayetkṛṣṇaṃ vṛttaṃ ṣaḍbindulāñchitam

calaṃ sacūcūśabdaṃ ca vāyavīṃ dhāraṇāṃ śritaḥ
calatvaṃ kaphajavyādhivicchedādvāyuvadbhavet

ṣaṇmāsamabhyasedyogī tadgatenāntarātmanā
yojanānāṃ śataṃ gatvā muhūrtādetyakhedataḥ

vatsaraistu tribhiḥ sākṣādvāyurūpadharo bhavet
cūrṇayatyadrisaṃghātaṃ vṛkṣānunmūlayatyapi

kruddhaścālayate śakraṃ sabhṛtyabalavāhanam
nīlāñjananibhaṃ dehamātmīyamanucintayet

pūrvoktaṃ sarvamāpnoti ṣaṇmāsānnātra saṃśayaḥ
tryabdātprapaśyate vāyu tattvaṃ tanmayatāṃ gataḥ

bhruvormadhye smaredrūpamātmano'ñjanasaṃnibham
paśyate vāyutattveśānāśugānakhilānapi

ghanāvṛtendranīlābharavibimbasamākṛtim
dhyāyaṃstatsamatāmeti tatsaṃlīno yadā bhavet

bhinnendranīlasaṃkāśaṃ sakalaṃ tatra cintayet
tanmantreśatvamāpnoti tatastasyeśatāmapi

sarvavyāpini tadvarṇe dhyāte tejasyavāpnuyāt
tadāpradhṛṣyatāmeti tatrādhordhvavisarpiṇi

itīyaṃ kathitā divyā dhāraṇā vāyusambhavā
svadehaṃ vāyuvaddhyātvā tadabhāvamanusmaran

divasaiḥ saptabhiryogī śūnyatāṃ pratipadyate
māsamātreṇa bhogīndrairapi daṣṭo na muhyati

sarvavyādhiparityakto valīpalitavarjitaḥ
ṣaṇmāsādgaganākāraḥ sūkṣmarandhrairapi vrajet

vatsaratritayātsākṣādvyomavacca bhaviṣyati
icchayaiva mahākāyaḥ sūkṣmadehastathecchayā

acchedyaścāpyabhedyaśca cchidrāṃ paśyati medinīm
śatapuṣparasocchiṣṭamūṣāgarbhakhavannijam

dehaṃ cintayatastryabdādvyomajñānaṃ prajāyate
pūrvoktaṃ ca phalaṃ sarvaṃ saptāhādikamāpnuyāt

lalāṭe cintayettadvaddvādaśāṅgulamāyatam
tattattveśān kramātsarvān prapaśyatyagrataḥ sthitān

rāhugrastendubimbābhaṃ dhyāyaṃstatsamatāṃ vrajet
sakalaṃ candrabimbābhaṃ tatrasthamanucintayet

tanmantreśatvamāpnoti jyotsnayā cendratāmapi
tayaivādhovisarpiṇyā sabāhyābhyantaraṃ budhaḥ

mantreśvareśatāmāpya vijñānamatulaṃ labhet
tayā cordhvavisarpiṇyā jyotsnayāmṛtarūpayā

svatantratvamanuprāpya na kva citpratihanyate
ityevaṃ pañcatattvānāṃ dhāraṇāḥ parikīrtitāḥ

śuddhādyasthā tu saṃvittirbhūtāveśo'tra pañcadhā
tāsveva saṃdadhaccittaṃ viṣādikṣaya ātmanaḥ

anyasyāmapi saṃvittau yasyāmeva nijecchayā
cetaḥ samyaksthirīkuryāttayā tatphalamaśnute

ekāpi bhāvyamāneyamavāntaravibhedataḥ
antarāyatvamabhyeti tatra kuryānna saṃsthitim

saṃsthitiṃ tatra kurvanto na prāpsyantyuttamaṃ phalam
dhāraṇāpañcake siddhe piśācādyā guṇāṣṭakāḥ

aindrāntāḥ pañca siddhyanti yogināṃ bhedato'pi vā
iṣṭāḥ pañcadaśāvasthāḥ krameṇaiva samabhyasan

tryabdādādyāṃ prasādhyānyāṃ dvābhyāmekena cāparām
ṣaṇmāsātpañcabhiścānyāṃ caturbhistribhireva ca

dvābhyāmekena pakṣeṇa daśabhiḥ pañcabhirdinaiḥ
tribhirdvābhyāmathaikena vyastecchoḥ pūrvavatkramaḥ

śāśvataṃ padamāpnoti bhuktvā siddhiṃ yathepsitām