Malinivijayottara Tantra · Chapter 12

athaitāṃ devadevasya śrutvā vācamatisphuṭām
praharṣotphullanayanā jagadānandakāriṇī

saṃtoṣāmṛtasaṃtṛptā devī devagaṇārcitā
praṇamyāndhakahantāraṃ punarāheti bhāratīm

pūrvameva tvayā proktaṃ yogī yogaṃ samabhyaset
tasyābhyāsaḥ kathaṃ kāryaḥ kathyatāṃ tripurāntaka

evamukto jagaddhātryā bhairavo bhayanāśanaḥ
prāha prasannagambhīrāṃ girametāmudāradhīḥ

yogābhyāsavidhiṃ devi kathyamānaṃ mayā śṛṇu
sthirībhūtena yeneha yogī siddhimavāpsyati

guhāyāṃ bhūgṛhe vāpi niḥśabde sumanorame
sarvabādhāvinirmukte yogī yogaṃ samabhyaset

jitāsano jitamanā jitaprāṇo jitendriyaḥ
jitanidro jitakrodho jitodvego gatavyathaḥ

lakṣyabhedena vā sarvamathavā cittabhedataḥ
dharādiśaktiparyantaṃ yogīśastu prasādhayet

vyomavigrahabindvarṇabhuvanadhvanibhedataḥ
lakṣyabhedaḥ smṛtaḥ ṣoḍhā yathāvadupadiśyate

bāhyābhyantarabhedena samuccayakṛtena ca
trividhaṃ kīrtitaṃ vyoma daśadhā binduriṣyate

kadambagolakākāraḥ sphurattārakasaprabhaḥ
śuklādibhedabhedena eko'pi daśadhā mataḥ

ciñcinīcīravākādiprabhedāddaśadhā dhvaniḥ
vigrahaḥ svāṇubhedācca dvidhā bhinno'pyanekadhā

bhuvanānāṃ na saṅkhyāsti varṇānāṃ sā śatārdhikā
ekasminnapi sādhye vai lakṣedatrānuṣaṅgataḥ

anyānyapi phalāni syurlakṣyabhedaḥ sa ucyate
ekameva phalaṃ yatra cittabhedastvasau mataḥ

homadīkṣāviśuddhātmā samāveśopadeśavān
yaṃ siṣādhayiṣuryogamādāveva samācaret

hastayostu parābījaṃ nyasya śaktimanusmaret
mahāmudrāprayogena viparītavidhau budhaḥ

jvaladvahnipratīkāśāṃ pādāgrānmastakāntikam
namaskāraṃ tataḥ paścādbaddhvā hṛdi dhṛtānilaḥ

svarūpeṇa parābījamatidīptamanusmaret
tasya mātrātrayaṃ dhyāyetkakhatrayavinirgatam

tatastālaśatādyogī samāveśamavāpnuyāt
brahmaghno'pi hi saptāhātprativāsaramabhyaset

evamāviṣṭadehastu yathoktaṃ vidhimācaret
yaḥ punarguruṇaivādau kṛtāveśavidhikramaḥ

sa vāsanānubhāvena bhūmikājayamārabhet
gaṇanāthaṃ namaskṛtya saṃsmṛtya trigurukramam

samyagāviṣṭadehaḥ syāditi dhyāyedananyadhīḥ
svadehaṃ hemasaṅkāśaṃ turyāśraṃ vajralāñchitam

tato gurutvamāyāti saptaviṃśatibhirdinaiḥ
divasātsaptamādūrdhvaṃ jaḍatā cāsya jāyate

ṣaḍbhirmāsairjitavyādhirdrutahemanibho bhavet
vajradehastribhiścābdairnavanāgaparākramaḥ

eṣā te pārthivī śuddhā dhāraṇā parikīrtitā
ādyā pūrvodite devi bhede pañcadaśātmake

savyāpāraṃ smareddehaṃ drutahemasamaprabham
upaviṣṭaṃ ca turyāśre maṇḍale vajrabhūṣite

saptāhādgurutāmeti māsādvyādhivivarjitaḥ
ṣaḍbhirmāsairdharāntaḥsthaṃ sarvaṃ jānāti tattvataḥ

tribhirabdairmahīṃ bhuṅkte saptāmbhonidhimekhalām
dvitīyaḥ kathito bhedastṛtīyamadhunā śṛṇu

tadvadeva smareddehaṃ kiṃ tu vyāpāravarjitam
pūrvoktaṃ phalamāpnoti tadvatpātālasaṃyutam

caturthe hṛdgataṃ dhyāyeddvādaśāṅgulamāyatam
pūrvavarṇasvarūpeṇa savyāpāramatandritaḥ

prāpya pūrvoditaṃ sarvaṃ pātālādhipatirbhavet
tadeva sthiramāpnoti nirvyāpāre tu pañcame

sphuratsūryanibhaṃ pītaṃ ṣaṣṭhe kṛṣṇaghanāvṛtam
nistaraṅgaṃ smarettadvatsaptame'pi vicakṣaṇaḥ

dvaye'pyatra sthirībhūte bhūrbhuvaḥ svariti trayam
vetti bhuṅkte ca lokānāṃ puroktaireva vatsaraiḥ

sakalaṃ hṛdayāntaḥsthamātmānaṃ kanakaprabham
svaprabhādyotitāśeṣa dehāntamanucintayet

savyāpārādibhedena saptalokīṃ tu pūrvavat
vetti bhuṅkte sthirībhūte bhede'sminnavame budhaḥ

ravibimbanibhaṃ pītaṃ pūrvavaddvitayaṃ smaret
brahmalokamavāpnoti pūrvoktenaiva vartmanā

adhaḥprakāśakaṃ pītaṃ dvirūpaṃ pūrvavanmahat
cintayenmatsamo bhūtvā mallokamanugacchati

sabāhyābhyantaraṃ pītaṃ tejaḥ sarvaprakāśakam
cintayecchatarudrāṇāmadhipatvamavāpnuyāt

ityevaṃ pṛthivītattvamabhyasyaṃ daśapañcadhā
yogibhiryogasiddhyarthaṃ tatphalāni bubhukṣayā

yogyatāvaśagā jātā yasya yatraiva vāsanā
sa tatraiva niyoktavyo dīkṣākāle vicakṣaṇaiḥ

yo yatra yojitastattve sa tasmānna nivartate
tatphalaṃ sarvamāsādya śivayukto'pavṛjyate

ayukto'pyadhvasaṃśuddhiṃ saṃprāpya bhuvaneśataḥ
śuddhaḥ śivatvamāyāti dagdhasaṃsārabandhanaḥ