માલિનીવિજયોત્તરતન્ત્રમ્ · અધ્યાય 12

અથૈતાં દેવદેવસ્ય શ્રુત્વા વાચમતિસ્ફુટામ્
પ્રહર્ષોત્ફુલ્લનયના જગદાનન્દકારિણી

સંતોષામૃતસંતૃપ્તા દેવી દેવગણાર્ચિતા
પ્રણમ્યાન્ધકહન્તારં પુનરાહેતિ ભારતીમ્

પૂર્વમેવ ત્વયા પ્રોક્તં યોગી યોગં સમભ્યસેત્
તસ્યાભ્યાસઃ કથં કાર્યઃ કથ્યતાં ત્રિપુરાન્તક

એવમુક્તો જગદ્ધાત્ર્યા ભૈરવો ભયનાશનઃ
પ્રાહ પ્રસન્નગમ્ભીરાં ગિરમેતામુદારધીઃ

યોગાભ્યાસવિધિં દેવિ કથ્યમાનં મયા શૃણુ
સ્થિરીભૂતેન યેનેહ યોગી સિદ્ધિમવાપ્સ્યતિ

ગુહાયાં ભૂગૃહે વાપિ નિઃશબ્દે સુમનોરમે
સર્વબાધાવિનિર્મુક્તે યોગી યોગં સમભ્યસેત્

જિતાસનો જિતમના જિતપ્રાણો જિતેન્દ્રિયઃ
જિતનિદ્રો જિતક્રોધો જિતોદ્વેગો ગતવ્યથઃ

લક્ષ્યભેદેન વા સર્વમથવા ચિત્તભેદતઃ
ધરાદિશક્તિપર્યન્તં યોગીશસ્તુ પ્રસાધયેત્

વ્યોમવિગ્રહબિન્દ્વર્ણભુવનધ્વનિભેદતઃ
લક્ષ્યભેદઃ સ્મૃતઃ ષોઢા યથાવદુપદિશ્યતે

બાહ્યાભ્યન્તરભેદેન સમુચ્ચયકૃતેન ચ
ત્રિવિધં કીર્તિતં વ્યોમ દશધા બિન્દુરિષ્યતે

કદમ્બગોલકાકારઃ સ્ફુરત્તારકસપ્રભઃ
શુક્લાદિભેદભેદેન એકોઽપિ દશધા મતઃ

ચિઞ્ચિનીચીરવાકાદિપ્રભેદાદ્દશધા ધ્વનિઃ
વિગ્રહઃ સ્વાણુભેદાચ્ચ દ્વિધા ભિન્નોઽપ્યનેકધા

ભુવનાનાં ન સઙ્ખ્યાસ્તિ વર્ણાનાં સા શતાર્ધિકા
એકસ્મિન્નપિ સાધ્યે વૈ લક્ષેદત્રાનુષઙ્ગતઃ

અન્યાન્યપિ ફલાનિ સ્યુર્લક્ષ્યભેદઃ સ ઉચ્યતે
એકમેવ ફલં યત્ર ચિત્તભેદસ્ત્વસૌ મતઃ

હોમદીક્ષાવિશુદ્ધાત્મા સમાવેશોપદેશવાન્
યં સિષાધયિષુર્યોગમાદાવેવ સમાચરેત્

હસ્તયોસ્તુ પરાબીજં ન્યસ્ય શક્તિમનુસ્મરેત્
મહામુદ્રાપ્રયોગેન વિપરીતવિધૌ બુધઃ

જ્વલદ્વહ્નિપ્રતીકાશાં પાદાગ્રાન્મસ્તકાન્તિકમ્
નમસ્કારં તતઃ પશ્ચાદ્બદ્ધ્વા હૃદિ ધૃતાનિલઃ

સ્વરૂપેણ પરાબીજમતિદીપ્તમનુસ્મરેત્
તસ્ય માત્રાત્રયં ધ્યાયેત્કખત્રયવિનિર્ગતમ્

તતસ્તાલશતાદ્યોગી સમાવેશમવાપ્નુયાત્
બ્રહ્મઘ્નોઽપિ હિ સપ્તાહાત્પ્રતિવાસરમભ્યસેત્

એવમાવિષ્ટદેહસ્તુ યથોક્તં વિધિમાચરેત્
યઃ પુનર્ગુરુણૈવાદૌ કૃતાવેશવિધિક્રમઃ

સ વાસનાનુભાવેન ભૂમિકાજયમારભેત્
ગણનાથં નમસ્કૃત્ય સંસ્મૃત્ય ત્રિગુરુક્રમમ્

સમ્યગાવિષ્ટદેહઃ સ્યાદિતિ ધ્યાયેદનન્યધીઃ
સ્વદેહં હેમસઙ્કાશં તુર્યાશ્રં વજ્રલાઞ્છિતમ્

તતો ગુરુત્વમાયાતિ સપ્તવિંશતિભિર્દિનૈઃ
દિવસાત્સપ્તમાદૂર્ધ્વં જડતા ચાસ્ય જાયતે

ષડ્ભિર્માસૈર્જિતવ્યાધિર્દ્રુતહેમનિભો ભવેત્
વજ્રદેહસ્ત્રિભિશ્ચાબ્દૈર્નવનાગપરાક્રમઃ

એષા તે પાર્થિવી શુદ્ધા ધારણા પરિકીર્તિતા
આદ્યા પૂર્વોદિતે દેવિ ભેદે પઞ્ચદશાત્મકે

સવ્યાપારં સ્મરેદ્દેહં દ્રુતહેમસમપ્રભમ્
ઉપવિષ્ટં ચ તુર્યાશ્રે મણ્ડલે વજ્રભૂષિતે

સપ્તાહાદ્ગુરુતામેતિ માસાદ્વ્યાધિવિવર્જિતઃ
ષડ્ભિર્માસૈર્ધરાન્તઃસ્થં સર્વં જાનાતિ તત્ત્વતઃ

ત્રિભિરબ્દૈર્મહીં ભુઙ્ક્તે સપ્તામ્ભોનિધિમેખલામ્
દ્વિતીયઃ કથિતો ભેદસ્તૃતીયમધુના શૃણુ

તદ્વદેવ સ્મરેદ્દેહં કિં તુ વ્યાપારવર્જિતમ્
પૂર્વોક્તં ફલમાપ્નોતિ તદ્વત્પાતાલસંયુતમ્

ચતુર્થે હૃદ્ગતં ધ્યાયેદ્દ્વાદશાઙ્ગુલમાયતમ્
પૂર્વવર્ણસ્વરૂપેણ સવ્યાપારમતન્દ્રિતઃ

પ્રાપ્ય પૂર્વોદિતં સર્વં પાતાલાધિપતિર્ભવેત્
તદેવ સ્થિરમાપ્નોતિ નિર્વ્યાપારે તુ પઞ્ચમે

સ્ફુરત્સૂર્યનિભં પીતં ષષ્ઠે કૃષ્ણઘનાવૃતમ્
નિસ્તરઙ્ગં સ્મરેત્તદ્વત્સપ્તમેઽપિ વિચક્ષણઃ

દ્વયેઽપ્યત્ર સ્થિરીભૂતે ભૂર્ભુવઃ સ્વરિતિ ત્રયમ્
વેત્તિ ભુઙ્ક્તે ચ લોકાનાં પુરોક્તૈરેવ વત્સરૈઃ

સકલં હૃદયાન્તઃસ્થમાત્માનં કનકપ્રભમ્
સ્વપ્રભાદ્યોતિતાશેષ દેહાન્તમનુચિન્તયેત્

સવ્યાપારાદિભેદેન સપ્તલોકીં તુ પૂર્વવત્
વેત્તિ ભુઙ્ક્તે સ્થિરીભૂતે ભેદેઽસ્મિન્નવમે બુધઃ

રવિબિમ્બનિભં પીતં પૂર્વવદ્દ્વિતયં સ્મરેત્
બ્રહ્મલોકમવાપ્નોતિ પૂર્વોક્તેનૈવ વર્ત્મના

અધઃપ્રકાશકં પીતં દ્વિરૂપં પૂર્વવન્મહત્
ચિન્તયેન્મત્સમો ભૂત્વા મલ્લોકમનુગચ્છતિ

સબાહ્યાભ્યન્તરં પીતં તેજઃ સર્વપ્રકાશકમ્
ચિન્તયેચ્છતરુદ્રાણામધિપત્વમવાપ્નુયાત્

ઇત્યેવં પૃથિવીતત્ત્વમભ્યસ્યં દશપઞ્ચધા
યોગિભિર્યોગસિદ્ધ્યર્થં તત્ફલાનિ બુભુક્ષયા

યોગ્યતાવશગા જાતા યસ્ય યત્રૈવ વાસના
સ તત્રૈવ નિયોક્તવ્યો દીક્ષાકાલે વિચક્ષણૈઃ

યો યત્ર યોજિતસ્તત્ત્વે સ તસ્માન્ન નિવર્તતે
તત્ફલં સર્વમાસાદ્ય શિવયુક્તોઽપવૃજ્યતે

અયુક્તોઽપ્યધ્વસંશુદ્ધિં સંપ્રાપ્ય ભુવનેશતઃ
શુદ્ધઃ શિવત્વમાયાતિ દગ્ધસંસારબન્ધનઃ