Scripture Library

Malinivijayottara Tantra · Chapter 11

11.1

athātaḥ saṃpravakṣyāmi dīkṣāṃ paramadurlabhām
bhuktimuktikarīṃ samyaksadyaḥpratyayakārikām

11.2

nāsyāṃ maṇḍalakuṇādi kiṃ cidapyupayujyate
na ca nyāsādikaṃ pūrvaṃ snānādi ca yathecchayā

11.3

praviśya yāgasadanaṃ sūpaliptaṃ sucarcitam
prāṅmukhodaṅmukho vāpi supuṣpāmbarabhūṣitaḥ

11.4

dīptāṃ śaktimanusmṛtya pādāgrānmastakāvadhi
mahāmudrāprayogena nirdagdhāṃ cintayettanum

11.5

anulomaprayogācca mālinīmamṛtaprabhām
cintayettanuniṣpattyai taddhyānagatamānasaḥ

11.6

śodhyādhvānaṃ tato dehe pūrvoktamanucintayet
tataḥ saṃśodhya vastūni śaktyaivāmṛtatāṃ nayet

11.7

parāsaṃpuṭamadhyasthāṃ mālinīṃ sarvakarmasu
yojayetvidhānajñaḥ parāṃ vā kevalāṃ priye

11.8

gaṇeśaṃ pūjayitvā tu purā vighnapraśāntaye
tataḥ svagurumārabhya pūjayedgurupaddhatim

11.9

gaṇeśādhastataḥ sarvaṃ yajenmantrakadambakam
tatpatīnāṃ tato'rghaṃ tatraiva paripūjayet

11.10

antyādhaḥ pūjayedvidyāṃ tadvadvidyāṃ maheśvarīm
mantravidyāgaṇasyāntaḥ kulaśaktiṃ niveśayet

11.11

pūrvayāmyāparodakṣu māheśyādicatuṣṭayam
indrāṇīpūrvakaṃ tadvadaiśādidala antagam

11.12

tatropari nyaseddevaṃ kūṭarūpāṇunāmunā
jīvaṃ daṇḍasamākrāntaṃ śūlasyopari saṃsthitam

11.13

dakṣāṅguliṃ tato'dhastāttato vāmapayodharam
nābhikaṇṭhau tatodhastādvāmaskandhavibhūṣaṇau

11.14

śivajihvānvitaḥ paścāttadūrdhvoṣṭhena copari
sarvayoginicakrāṇāmadhipo'yamudāhṛtaḥ

11.15

asyāpyuccāraṇādeva saṃvittiḥ syātparoditā
tato vīrāṣṭakaṃ paścācchaktyuktavidhinā yajet

11.16

prabhūtairvividhairiṣṭvā gandhadhūpaiḥ sragādibhiḥ
śrīkārapūrvakaṃ nāma pādāntaṃ parikalpayet

11.17

tataḥ śiṣyaṃ samāhūya bahudhā suparīkṣitam
rudraśaktyā tu saṃprokṣya devāgre viniveśayet

11.18

bhujau tasya samālokya rudraśaktyā pradīpayet
tathaivāpyarpayetpuṣpaṃ karayorgandhadigdhayoḥ

11.19

nirālambau tu tau dhyātvā śaktyākṛṣṭau vicintayet
śaktimantritanetreṇa baddhvā netre tu pūrvavat

11.20

tataḥ prakṣepayetpuṣpaṃ sā śaktistatkarasthitā
yatra tatpatate puṣpaṃ tatkulaṃ tasya lakṣayet

11.21

mukhamudghāṭya taṃ paścātpādayoḥ pratipātayet
tato'sya mastake cakraṃ hastayoścārcya yogavit

11.22

taddhastau prerayecchaktyā yāvanmūrdhāntamāgatau
śivahastavidhiḥ proktaḥ sadyaḥpratyayakārakaḥ

11.23

carukaṃ dāpayetpaścāṭkharjūrādiphalodbhavam
śaktyālambāṃ tanuṃ kṛtvā sthāpayedagrataḥ śiśoḥ

11.24

puṣpakṣepaprayogena hastamākṛṣya dakṣiṇam
carukaṃ grāhayenmantrī taddhyānagatamānasaḥ

11.25

śivahastaprayogena samāropya mukhaṃ nayet
anenaiva vidhānena kṣīravṛkṣasamudbhavam

11.26

dantakāṣṭhaṃ dadetdevi ṣoḍaśāṅgulamāyatam
eteṣāṃ cālanānmantrī śaktipātaṃ parīkṣayet

11.27

mandatīvrādibhedena mandatīvrādikān budhaḥ
ityayaṃ samayī proktaḥ saṃsthitoktena vartmanā

11.28

cikīrṣuśca yadāḻdīkṣāmasyaivārpitamānasaḥ
tadiṣṭvā pūrvavadyogī kuleśaṃ tamanukramāt

11.29

saṃpūjya pūrvavacchiṣyamṛjudehe vilokayet
śaktiṃ saṃcintya pādāgrānmastakāntaṃ vicakṣaṇaḥ

11.30

śodhyādhvānaṃ tato nyasya sarvādhvavyāptibhāṣanām
śaktitattvādibhedena pūrvoktena ca vartmanā

11.31

upaviśya tatastasya vidhānamidamācaret
mūlaśodhyātsamārabhya śaktiṃ dīptānalaprabhām

11.32

yojayecchodhyasaṃśuddhi bhāvanāgatamānasaḥ
evaṃ sarvāṇi śodhyāni nirdahantīmanāmayām

11.33

śive saṃcintayellīnāṃ niṣkale sakale'pi vā
yoginā yojitā mārge svajātīyasya poṣaṇam

11.34

kurute nirdahatyanyadbhinnajātikadambakam
anayā śodhyamānasya śiṣyasyāsya mahāmatiḥ

11.35

lakṣayeccihnasaṃghātamānandādikamādarāt
ānanda udbhavaḥ kampo nidrā ghūrṇiśca pañcamī

11.36

evamāviṣṭayā śaktyā mandatīvrādibhedataḥ
pāśastobhapaśugrahau prakurvīta yathecchayā

11.37

gṛhītasya punaḥ kuryānniyogaṃ śeṣabhuktaye
athavā kasya cinnāyamāveśaḥ saṃprajāyate

11.38

tadenaṃ yugapacchaktyā sabāhyābhyantare dahet
tayā saṃdahyamāno'sau cchinnamūla iva drumaḥ

11.39

patate kāśyapīpṛṣṭhe ākṣepaṃ vā karotyasau
yasya tvevamapi syānna taṃ caivopalavattyajet

11.40

pṛthaktattvavidhau dīkṣāṃ yogyatāvaśyavarjinaḥ
tattvābhyāsavidhānena vakṣyamāṇena kārayet

11.41

iti saṃdīkṣitasyāsya mumukṣoḥ śeṣavartanam
kulakrameṣṭirādeśyā pañcāvasthāsamanvitā

11.42

bubhukṣostu prakurvīta samyagyogābhiṣecanam
tatreṣṭvā pūrvavaddehaṃ vistīrṇairvibudhairbudhaiḥ [?]

11.43

hemādidīpakānaṣṭau ghṛtenāruṇavartikān
kulāṣṭakena saṃbodhya śivaṃ śaṅkhe prapūjayet

11.44

sarvaratnauṣadhīgarbhe gandhāmbuparipūrite
tenābhiṣecayettaṃ tu śivahastoktavartmanā

11.45

ācāryasyābhiṣeko'yamadhikārapadānvitaḥ
kuryātpiṇḍādibhistadvaccatuḥṣaṣṭiṃ pradīpakān

11.46

abhiṣiktavidhāveva sarvayogigaṇena tu
viditau bhavatastatra gururmokṣaprado bhavet

11.47

anayoḥ kathayejjñānaṃ trividhaṃ sarvamapyalam
svakīyājñāṃ dadedyogī svakriyākaraṇaṃ prati

Original text: mālinīvijayottaratantram · Sanskrit Wikisource contributors · Sanskrit Wikisource · CC BY-SA 4.0