માલિનીવિજયોત્તરતન્ત્રમ્ · અધ્યાય 10

અથ લક્ષણસંપન્નં સિદ્ધિસાધનતત્પરમ્
શાસ્ત્રજ્ઞં સંયતં ધીરમલુબ્ધમશઠં દૃઢમ્

અપરીક્ષ્ય ગુરુસ્તદ્વત્સાધકત્વે નિયોજયેત્
સમભ્યર્ચ્ય વિધાનેન પૂર્વવત્પરમેશ્વરમ્

દ્વિતીયે પૂર્વવત્કુમ્ભં હેમાદિમયમવ્રણમ્
સર્વત્ર મધ્યપદ્મસ્ય દક્ષિણં દલમાશ્રિતમ્

નાયકાનાં પૃથઙ્મન્ત્રાન્ પૂજયેત્કુસુમાદિભિઃ
તં સંતર્પ્ય સહસ્રેણ પ્રકુર્યાદભિષેચનમ્

ભદ્રપીઠે શુભે સ્થાપ્ય શ્રીપર્ણે દારુનિર્મિતે
પૂર્વામુખમુદગ્વક્ત્રં સ્નાતં પુષ્પાદ્યલઙ્કૃતમ્

કૃતમન્ત્રતનુઃ સમ્યક્સમ્યક્ચ કૃતમઙ્ગલઃ
શઙ્ખભેર્યાદિનિર્ઘોષૈર્વેદમઙ્ગલનિસ્વનૈઃ

સર્વરાજોપચારેણ કૃત્વા તસ્યાભિષેચનમ્
સદાશિવસમં ધ્યાત્વા તતસ્તમપિ ભૂષયેત્

પુનઃ સંપૂજ્ય દેવેશં મન્ત્રમસ્મૈ દદેદ્બુધઃ
પુષ્પાક્ષતતિલોપેતઃ સજલ[લચુન]શ્વરં ન્યસેત્

સોઽપિ મૂર્ધનિ તં તદ્વન્મૂર્તિમાશ્રિત્ય દક્ષિણમ્
અભિષિચ્ય તતોઽસ્ત્રેણ રુદ્રશક્તિં પ્રકાશયેત્

સ તયાલિઙ્ગ્ય તન્મન્ત્રં સહસ્રેણ પ્રતર્પયેત્
તદા પ્રભૃતિ તન્નિષ્ઠસ્તત્સમાનગુણો ભવેત્

આચાર્યસ્યાભિષેકોઽયં સ[લચુન]મન્ત્રવિધિં વિના
કિં તુ તસ્ય [લચુન] અધિવાસપદાન્વિતમ્

એવમેતત્પદં પ્રાપ્યં દુષ્પ્રાપ્યમકૃતાત્મનામ્
સાધકો મન્ત્રસિદ્ધ્યર્થં મન્ત્રવ્રતમુપાચરેત્

એવં કૃત્વાભિષેકોક્તં સ્નાત્વા વિદ્યાધિપં જપેત્
લક્ષમેકં દશાંશેન તસ્ય તર્પણમાચરેત્

પૂર્વવચ્ચાભિષેકં ચ કૃત્વા બ્રહ્મશિરો જપેત્
તલ્લક્ષ્યસ્તન્મયો ભૂત્વા લક્ષદ્વયમતન્દ્રિતઃ

લક્ષદ્વયં ચ રુદ્રાણીં ચતુષ્કં તુ પુરુષ્ટુતમ્
લક્ષાણાં પઞ્ચકં દેવિ મહાપાશુપતં જપેત્

સિતરક્તપીતકૃષ્ણ વિચિત્રામ્બરભૂષણઃ
તતઃ સંરક્ષિતો મન્ત્રૈરેભિરપ્રતિમો ભવેત્

અવાચ્યઃ સર્વદુષ્ટાનાં મન્ત્રતેજોપબૃંહિતઃ
એવં ચીર્ણવ્રતો ભૂત્વા યં સાધયિતુમિચ્છતિ

દત્ત્વાર્ઘં તસ્ય લક્ષાણાં જપેન્નવકમાદરાત્
ઉત્તમદ્રવ્યહોમાચ્ચ તદ્દશાંશેન તર્પણમ્

મહાક્ષ્માપપલાન્યાહુરુત્તમાદીનિ તદ્વિદઃ
મધ્યમે દ્વિગુણં કૃત્વા ત્રિગુણં કન્યસેઽપિ ચ

આજ્યગુગ્ગુલનૃસ્નેહા મહામાંસસમાઃ મતાઃ
દધિબિલ્વપયઃપદ્માઃ ક્ષ્માસમાઃ પરિકીર્તિતાઃ

ધાત્રીદુર્વામૃતામીનાઃ સમ્યગાજ્યસમા મતાઃ
તિલાદ્યૈરથ કુર્વીત નવષટ્ત્રિગુણં ક્રમાત્

પૂર્વમેવમિમં કૃત્વા સિદ્ધેરર્ઘં દદેદ્બુધઃ
દત્ત્વાર્ઘં તુ જપેત્તાવદ્યાવત્સિદ્ધિરભીપ્સિતા

લક્ષેણૈકેન પૃથ્વીશઃ સભૃત્યબલવાહનઃ
વશમાનીયતે દેવિ દ્વાભ્યાં રાજ્યમવાપ્નુયાત્

ત્રિભિર્નિધાનસંસિદ્ધિશ્ચતુર્ભિર્બલસિદ્ધયઃ
પઞ્ચભિર્મેદિની સર્વા ષડ્ભિરપ્સરસાં ગણઃ

સપ્તભિઃ સપ્ત લોકાશ્ચ દશભિસ્તત્સમો ભવેત્
પઞ્ચાશદ્ભિસ્તતો ગચ્છેદવ્યક્તાન્તં મહેશ્વરિ

માયાન્તં ષષ્તિભિર્લક્ષૈરીશ્વરાન્તમશીતિભિઃ
સકલાવનિપર્યન્તં કોટિજપ્તસ્ય સિદ્ધ્યતિ

અથવા વીરચિત્તઃ સ્યાત્કૃત્વા સેવાં યથોદિતામ્
કૃષ્ણભૂતદિને રાત્રૌ વિધિમેનં સમાચરેત્

કૃત્વા પૂર્વોદિતં યાગં હુત્વા દ્રવ્યમથોત્તરમ્
ઊર્ધ્વકાયો જપેન્મન્ત્રી સુનિષ્કમ્પોત્તરામુખઃ

તાવદ્યાવત્સમાયાતા યોગેશ્વર્યઃ સમન્તતઃ
કૃત્વા કલકલારાવમતિઘોરં સુદારુણમ્

ભૂમૌ નિપત્ય તિષ્ઠન્તિ વેષ્ટ્યાન્તઃ સાધકેશ્વરમ્
તાસાં કૃત્વા નમસ્કારં ભિત્ત્વા વામાઙ્ગમાત્મનઃ

તદુત્થેન તતસ્તાસાં દત્ત્વાર્ઘં તત્સમો ભવેત્
આચાર્યોઽપિ ચ ષણ્માસં મૌની પ્રતિદિનં ચરેત્

દશ પઞ્ચ ચ યે મન્ત્રાઃ પૂર્વમુક્તા મયા તવ
પૂર્વન્યાસેન સંનદ્ધસ્ત્રિકાલં વહ્નિકાર્યકૃત્

ધ્યાયેત્પૂર્વોદિતં શૂલં બ્રહ્મચર્યં સમાશ્રિતઃ
કૃત્વા પૂર્વોદિતં યાગં ત્રિશક્તિપરિમણ્ડલમ્

અભિષિઞ્ચેત્તદાત્માનમાદાવન્તે ચ દૈશિકઃ
એવં ચીર્ણવ્રતો ભૂત્વા મન્ત્રી મન્ત્રવિદુત્તમઃ

નિગ્રહાનુગ્રહં કર્મ કુર્વન્ન પ્રતિહન્યતે
શુદ્ધયોર્વિન્યસેન્મૂલ મધ્યાદિત્રિતયે ત્રયમ્

વામાઙ્ગુષ્ઠે તુલે નેત્રે તર્જન્યામસ્ત્રમેવ ચ
અક્ષહ્રીમિતિ ખણ્ડેન શબ્દરાશિં નિવેશયેત્

નફહ્રીમિત્યનેનાપિ શક્તિમૂર્તિં વિચક્ષણઃ
વિપરીતમહામુદ્રા પ્રયોગાન્મૂલમેવ ચ

સ્વસ્થાનેષુ તથાઙ્ગાનિ ન્યાસઃ સામાન્ય ઇત્યયમ્