Mahāsubhāṣitasaṃgraha 1-9979 · Verses 9735-9754

kāryakālocitā pāpair matibuddhirvihīyate /
sānukūlā tu vaidaivāt puṃsaḥ sarvatra jāyate //

kāryagatervaicitryā- nnīco'pi kvacidalaṃ na jātu mahān /
kāṃsyenaivādarśaḥ kriyate rājñāmapi na hemnā //

kāryajñaḥ praṣṭavyo na punarmānyo mama priyo veti /
gururapyāsanasevyaḥ priyānitambaḥ kadā mantrī //

kāryate yacca kriyate saccāsacca kṛtaṃ tataḥ /
tatrāśvasīta satkṛtvā asatkṛtvā na viśvaset //

kāryamālocitāpāyaṃ matimadbhirviceṣṭitam /
na kevalaṃ hi sampattau vipattāvapi śobhate //

kāryamityeva yat karma niyataṃ kriyate'rjuna /
saṅgaṃ tyaktvā phalaṃ caiva sat tyāgaḥ sāttviko mataḥ //

kāryasya hi garīyastvān nīcānāmapi kālavit /
sato'pi doṣān pracchādya guṇānapyasato vadet //

kāryasyāpekṣayā bhuktaṃ viṣamapyamṛtāyate /
sarveṣāṃ prāṇināṃ yatra nātra kāryā vicāraṇā //

kāryākāryamanāryair unmārganirargalairgalanmatibhiḥ /
nākarṇyate vikarṇair nayoktibhiryuktamuktamapi //

kāryākārye kimapi satataṃ naiva kartṛtvamasti jīvanmuktasthitiravagato dagdhavastrāvabhāsaḥ /
evaṃ dehe pravilayagate tiṣṭhamāno vimukto nistraiguṇye pathi vicarataḥ ko vidhiḥ ko niṣedhaḥ //

kāryākārye tulayati sarvas tṛpto na jātu tṛṣṇārtaḥ /
svādu śuci vā ca toyaṃ marupathikaḥ ko vicārayati //

kāryākāryeṣu kākolaḥ praśastaḥ syād yathā kila /
na tathā vāyasā jñeyā grāhyāstu tadabhāvataḥ //

kāryāṇāṃ karmaṇā pāraṃ yo gacchati sa buddhimān /
... ... ... ... ... ... //

kāryāṇāṃ gatayo bhujaṃgakuṭilāḥ strīṇāṃ manaścañcalaṃ naiśvaryaṃ sthitimattaraṃgacapalaṃ n ṇāṃ vayo dhāvati /
saṃkalpāḥ samadāṅganākṣitaralā mṛtyuḥ paraṃ niścito matyaivaṃ matisattamā vidadhatāṃ dharme matiṃ tattvataḥ //

kāryāṇyarthopamardena svānurakto'pi sādhayan /
nopekṣyaḥ sacivo rājñā sa taṃ mathnātyupekṣitaḥ //

kāryāṇyuttamadaṇḍasāhasaphalānyāyāsasādhyāni ye prītyā saṃśamayanti nītikuśalāḥ sāmnai'va te mantriṇaḥ /
niḥsārālpaphalāni ye tvavidhinā vāñchanti daṇḍodyamais teṣāṃ durnayaceṣṭitairnarapaterāropyate śrīs tulām //

kāryā na pratikūlatā na ca bahirgantavyamasmād gṛhāt kopaśca kṣaṇamātramāhitaruṣā kāryaḥ praṇāmāvadhiḥ /
ityevaṃ pramadāvrataṃ yadi bhavān gṛhṇāti nātyantikaṃ tatrāhaṃ dayitībhavāmi śaṭha he kopānubandhena kim //

kāryāntaritotkaṇṭhaṃ dinaṃ mayā nītamanatikṛcchreṇa /
avinodadīrghayāmā kathaṃ nu rātrirgamayitavyā //

kāryāntareṣvapyanugamyamānā śreyaḥpradā śāntadiśi pradiṣṭā /
śivā pradīpte tu diśaḥpradeśe samāraṭantī mahate bhayāya //

kāryāpekṣī janaḥ prāyaḥ prītimāviṣkarotyalam /
lomārthī śauṇḍikaḥ śaṣpair meṣaṃ puṣṇāti peśalaiḥ //