Mahāsubhāṣitasaṃgraha 1-9979 · Verses 9675-9694

kāmo nāsti napuṃsakasya kulaṭāvargasya nāsti trapā toyaṃ nāsti marīcakāsu satataṃ nāsti sthiratvaṃ striyaḥ /
dharmo nāsti ca nāsti kasya vibhavo nāsti pramattātmanaḥ snehānāṃ kaṇikāpi nāsti gaṇikālokasya ca prāyaśaḥ //

kāmopabhogasāphalyaphalo rājñāṃ mahījayaḥ /
ahaṅkāreṇa jīyante dviṣantaḥ kiṃ nayaśriyā //

kāmo vāmadṛśāṃ nidhirnayajuṣāṃ kālānalo vidviṣāṃ svaḥśākhī viduṣāṃ gururguṇavatāṃ pārtho dhanurdhāriṇām /
līlāvāsagṛhaṃ kulākulajuṣāṃ karṇaḥ suvarṇārthināṃ śrīmān vīravaraḥ kṣitīśvaravaro varvarti sarvopari //

kāmbojāḥ kambujanmākaraśaraṇakṛtaḥ sahyakāntārakacchā- nvicchāyāḥ kacchavāhā vidadhati katame kāmarūpāḥ kurūpāḥ /
kurvāṇe tvayyakasmāt karakamalahṛtaṃ kārmukaṃ kūrmapṛṣṭho- tkṛṣṭaṃ karṇāntakṛṣṭaṃ narapakulamaṇe karṇamākarṇayanti //

kāmyāḥ kriyās tathā kāmān mānuṣānabhivāñchati /
striyo dānaphalaṃ vidyāṃ māyāṃ kupyaṃ dhanaṃ divam //

devatvamamareśatvaṃ rasāyanacayaḥ kriyāḥ /
marutprapatanaṃ yajñaṃ jalādyāveśanaṃ tathā //

śrāddhānāṃ sarvadānānāṃ phalāni niyamāṃs tathā /
tathopavāsāt pūrttāc ca devatābhyarccanādapi //

tebhyas tebhyaśca karmabhya upasṛṣṭo'bhivāñchati /
cittamitthaṃ varttamānaṃ yatnādyogī nivarttayet //

kāmyānāṃ katicit samāparimitasvargaikasaṃdāyināṃ sadyaḥ svāntanitāntamohanakṛtāṃ kartā janaḥ karmaṇām /
ātmānandamananyavedyamaparicchinnaṃ na jānāti taṃ vikretā lavaṇasya vetti kimu tatkarpūramūlyaṃ param //

kāmyānāṃ karmaṇāṃ nyāsaṃ saṃnyāsaṃ kavayo viduḥ /
sarvakarmaphalatyāgaṃ prāhus tyāgaṃ vicakṣaṇāḥ //

kāyaṃ matvā naśvaraṃ cañcalābhaṃ cāyurbuddhvā bhaṅgurān sarvabhogān /
pāraṃ gantuṃ viśvasindhorvidagdhā yogābhyāse sādhubuddhiṃ vidadhvam //

kāyaḥ kaṇṭakadūṣito na ca ghanacchāyā kutaḥ pallavāḥ puṣpāṇi cyutasaurabhāṇi na dalaśreṇī manohāriṇī /
kiṃ brūmaḥ phalapākamasya yadupanyāse'pi lajjāmahe tad bhoḥ kena guṇena śālmalitaro jāto'si somadrumaḥ //

kāyaḥ saṃnihitāpāyaḥ saṃpadaḥ padamāpadām /
samāgamāḥ sāpagamāḥ sarvamutpādi bhaṅguram //
kālaklamair yaś ca tapo'bhidhānaiḥ pravṛttimākāṅkṣati kāmahetoḥ /
saṃsāradoṣānaparīkṣamāṇo duḥkhena so'nvicchati duḥkhameva //

kāyakleśena mahatā puruṣaḥ prāpnuyāt phalam /
tat sarvaṃ labhate nārī sukhena patipūjayā //

kāyacchinnāstu ṛṣikā marmaghnā guravas tathā /
tīkṣṇāśchedasahā vāṅgā dṛḍhā śūrpārakodbhavāḥ //
kāyavāṅmanasāṃ duṣṭapraṇidhānamanādaraḥ /
smṛtyanupasthāpanaṃ ca smṛtāḥ sāmāyikavrate //

kāyasthasya ca śalyasya kāyasthasya ca sā gatiḥ /
yābhyāmanupraviṣṭābhyāṃ dūṣyante sarvadhātavaḥ //

kāyasthenodarasthena māturāmiṣaśaṅkayā /
antrāṇi yanna bhuktāni tasya heturadantatā //

kāyasthairyaṃ karaṇapaṭutāṃ bandhusampattimarthaṃ cāturyaṃ vā kimiva hi balaṃ bibhrato nirbharāḥ smaḥ /
antyaḥ śvāsaḥ kimayamathavopāntya ityāmṛśanto vismṛtyeśaṃ nimiṣamapi kiṃ vartituṃ pārayāmaḥ //

kāyena kurute pāpaṃ manasā sampradhārya ca /
anṛtaṃ jihvayā cāha trividhaṃ karma pātakam //

kāyena trividhaṃ caiva vācā caiva caturvidham /
manasā trividhaṃ nityaṃ daśādharmapathāṃs tyajet //