Mahāsubhāṣitasaṃgraha 1-9979 · Verses 9655-9674

kāminyāḥ kucayoḥ kāntiḥ pīnatvena puraskṛtā /
suvarṇācalaśṛṅgābhāṃ vinirjetuṃ samudyatā //

kāminyāḥ stanabhāramantharagaterlīlācalaccakṣuṣaḥ kandarpaikavilāsanityavasateḥ kīdṛk pumān vallabhaḥ /
helākṛṣṭakṛpāṇapāritagajānīkāt kutas te'rayaḥ śvrāsāyāsaviśuṣkakaṇṭhakuharā niryānti jīvārthinaḥ //

kāminyo nīcagāminyas taṭinya iva niścitam /
dārā rājño'pi yattārāḥ praṇayaṃ yānti gopateḥ //

kāmī kāmavraṇaparigataḥ kāminīreva hitvā bhuṅkte paścādapagatabhayaṃ kāminīnāṃ sahasram /
itthaṃkāraṃ viṣayasukhabhogaikatānairnarairapy asmin dehe katipayadinānyeṣa bhogo vivarjyaḥ //

kāmukāḥ syuḥ kathā nīcāḥ sarvaḥ kasmin pramodate /
arthinaḥ prāpya puṇyāhaṃ kariṣyadhve vasūni kim //

kāmuke nūtanāsaṅgagāḍhāliṅganakātare /
gaṇikā gehagaṇanāṃ karoti dhyānamāsthitā //

kāmuke bhramaraḥ proktaḥ kāminyāṃ cūtamañjarī /
tathāhvānāṅkurāścāpi prākāro vāraṇe smṛtaḥ //

kāmujjahāra harirambudhimadhyalagnāṃ kīdṛk śrutaṃ bhavati nirmalamāgamānām /
āmantrayasva vanamagniśikhāvalīḍhaṃ yac cāpi ko dahati ke madayanti bhṛṅgān //

kāmekapatnīvrataduḥkhaśīlāṃ lolaṃ manaś cārutayā praviṣṭām /
nitambinīmicchasi muktalajjāṃ kaṇṭhe svayaṃgrāhaniṣaktabāhum //

kā me gatiriti pṛcchati caramaśvāse'pi yaḥ svārtham /
tasya janasyāpi kṛte pāpāḥ pāpāni kurvanti //

kā meghādupayāti, kṛṣṇadayitā kā vā, sabhā kīdṛśī, kāṃ rakṣatyahihā, śarad vikacayet kaṃ, dhairyahantrī ca kā /
kaṃ dhatte gaṇanāyakaḥ karatale, kā cañcalā kathyatām, ārohādavarohataśca nipuṇairekaṃ dvayoruttaram //

kāmena kāmaṃ prahitā javena prāvṛṭ cacāla trijagad vijetum /
kiṃ candrabimbaṃ dadhi bhakṣayatnī saṃdhārayantī haritaḥ śubhāya //

kāmenākṛṣya cāpaṃ hatapaṭupaṭahaṃ valgubhirmāravīrair bhrūbhaṅgotkṣepajṛmbhāsmitalalitadṛśā divyanārījanena /
siddhaiḥ prahvottamāṅgaiḥ pulakitavapuṣā vismayād vāsavena dhyāyanyo yogapīṭhādacalita iti vaḥ pātu dṛṣṭo munīdraḥ //

kāmenāpi na bhettuṃ kimu hṛdayamapāri bālavanitānām /
mūḍhaviśikhaprahāro- cchūnamivābhāti yadvakṣaḥ //

kāmeṣuṇā kāmaripormano'pi kallolitaṃ kā manujeṣu vārtā /
āṣāḍhavāte calati dvipendre cūlīvato vāridhireva kāṣṭhā //

kāmais taistair hṛtajñānāḥ prapadyante'nyadevatāḥ /
taṃ taṃ niyamamāsthāya prakṛtyā niyatāḥ svayā //

kāmo'kṣamā dakṣiṇatānukampā hrīḥ sādhvasaṃ krauryamanāyaitā ca /
dambho'bhimāno'tha ca dhārmikatvaṃ dainyaṃ svayūthasyavimānanaṃ ca //

droho bhayaṃ śaśvadupekṣaṇaṃ ca śītoṣṇavarṣāsvasahiṣṇutā ca /
etāni kāle samupāhitāni kurvantyavaśyaṃ khalu siddhivighnam //

kāmottaptaṃ marakatamahāgrāvahāro gabhīre magnaṃ nābhīsarasi hṛdayaṃ jagrase'nekapaṃ me /
lilāveśapracalitakaraḥ ko'pyahīnāriketus tadbhaṅgena pratividhimihaivānurūpaṃ vyatānīt //

kāmodvegagṛhītaṃ dhūrtairupahasyamānaśṛṅgāram /
dāridryahataṃ yauvanam abudhānāṃ kevalaṃ vipade //