Mahāsubhāṣitasaṃgraha 1-9979 · Verses 9365-9654

kāmānusārī puruṣaḥ kāmānanu vinaśyati /
kāmān vyudasya dhunute yatkiñcit puruṣo rajaḥ //

kāmān vyudasya dhunute yatkiṃcit puruṣo rajaḥ /
kāmakrodhodbhavaṃ duḥkham ahrīraratireva ca //

kāmābhibhūtaḥ krodhādvā yo mithyā pratipadyate /
sveṣu cānyeṣu vā tasya na sahāyā bhavantyuta //

kāmā manuṣyaṃ prasajanta eva dharmasya ye vighnamūlaṃ narendra /
pūrvaṃ narastān dhṛtimān vinighnan loke praśaṃsāṃ labhate'navadyām //

kāmāya spṛhayatyātmā saṃyato'pi manīṣiṇaḥ /
vīthīniyamito'pyukṣā śaṣpamāsādya dhāvati //

kāmārtāṃ svayamāyātāṃ yo na bhuṅkte nitambinīm /
so'vaśyaṃ narakaṃ yāti tanniḥśvāsahato naraḥ //

kāmārtāṃ svastriyaṃ dīnāṃ prārthayantīṃ punaḥ punaḥ /
na bhajed bhajamānāṃ yaḥ sa vai cāṇḍāladarśanaḥ //
kāmārtā gharmataptā vety aniścayakaraṃ vacaḥ /
yuvānamākulīkartum iti dūtyāha narmaṇā //
kāmārthamajñaḥ kṛpaṇaṃ karoti prāpnoti duḥkhaṃ vadhabandhanādi /
kāmārthamāśākṛpaṇas tapasvī mṛrtyu śramaṃ cācchati jīvalokaḥ //

kāmārthau lipsamānastu dharmamevāditaścaret /
na hi dharmādapaityarthaḥ kāmo vāpi kadācana //
kāmāllobhād bhayāt krodhāt sākṣivādāttathaiva ca /
mithyā vadati yatpāpaṃ tadasatyaṃ prakīrtitam //
kāmāveśaḥ kaitavasyopadeśaḥ māyākośo vañcanāsanniveśaḥ /
nirdravyāṇāmaprasiddhapraveśo ramyakleśaḥ supraveśo'stu veśaḥ //

kāmijanaparamabhogye kāmasukhe dhārayanti bībhatsam /
santaḥ śamasukharasikāḥ sudhāśanāḥ sūkarānna iva //

kāminaḥ kṛtaratotsavakāla- kṣepamākṛlavadhūkarasaṅgi /
mekhalāguṇavilagnamasūyāṃ dīrghasūtramakarot paridhānam //

kāminaś caritairebhiḥ kurvanto niśi jāgaram /
kurvantyapriyamātmānaṃ kecinmūḍhāḥ priyā api //
kāmināṃ kāminīnāṃ ca saṅgāt kāmī bhavet pumān /
dehāntare tataḥ krodhī lobhī mohī ca jāyate //

kāmināmasakalāni vibhugnaiḥ svedavārimṛdubhiḥ karajāgraiḥ /
akriyanta kaṭhineṣu kathaṃcit kāminīkucataṭeṣu padāni //

kāminīṃ prathamayauvanānvitāṃ mandavalgumṛdupīḍitasvanām /
utstanīṃ samavalambya yā ratiḥ sā na dhātṛbhavane'sti me matiḥ //

kāminīkāyakāntāre kucaparvatadurgame /
mā saṃcara manaḥpāntha tatrāste smarataskaraḥ //
kāminījanavilocanapātā- nunmiṣatkaluṣān pratigṛhṇan /
mandamandamuditaḥ prayayau khaṃ bhītabhīta iva śītamayūkhaḥ //

kāminīnayanakajjalapaṅkād utthito madanamattavarāhaḥ /
kāmimānasavanāntaracārī mūlamutkhanati mānalatāyāḥ //

kāminīvadananirjitakāntiḥ śobhituṃ na hi śaśāka śaśāṅkaḥ /
lajjayeva vimalaṃ vapurāptuṃ śīdhupūrṇacaṣakeṣu mamajja //

kāminīvargasaṃsargair na kaḥ saṃkrāntapātakaḥ /
nāśnāti snāti hā mohāt kāmakṣāmavrataṃ jagat //

kāminīsahacarasya kāminas tasya veśmasu mṛdaṅganādiṣu /
ṛddhimantamadhikarddhiruttaraḥ pūrvamutsavamapohadutsavaḥ //

kāmino hanta hemantaniśi śītajvarāturāḥ /
jīvanti hariṇākṣīṇāṃ vakṣojāśleṣarakṣitāḥ //

kāminyāḥ kucadurgaparvatabhuvi tvaṃ mā manaḥpānthaka saṃcāraṃ kuru romarājigahane tatrāsti nābhyāṃ guhā /
tallīno madhusūdanamya tanayas tenātra caureṇa bho nirvastrīkriyate divāpi hi naro rātrau tu kiṃ kathyate //