Mahāsubhāṣitasaṃgraha 1-9979 · Verses 9615-9634

kāmavṛttas tvayaṃ lokaḥ kṛtsnaḥ samupavartate /
yadvṛttāḥ santi rājānas tadvṛttāḥ santi hi prajāḥ //

kāmavyāghre kumatiphaṇini svāntadurvāranīḍe māyāsiṃhīviharaṇamahīlobhabhallūkabhīme /
janmāraṇye na bhavati ratiḥ sajjanānāṃ kadācit tattvajñānāṃ viṣayatuṣitākaṇṭakākīrṇapārśve //

kāmavyādhaśarāhatirna gaṇitā saṃjīvanī tvaṃ smṛtā no dagdho virahānalena jhaṭiti tvatsaṃgamāśābhṛtaiḥ /
nīto'yaṃ divaso vicitralikhitaiḥ samkalparūpairmayā kiṃ vānyad hṛdaye sthitāsi nanu me tatra svayaṃ sākṣiṇī //

kāmasaṅgaravidhau mṛgīdṛśaḥ prauḍhapeṣaṇadhare payodhare /
svedarājirudiyāya sarvataḥ puṣpavṛṣṭiriva puṣpadhanvanaḥ //
kāyas tapasviṣu jayatyadhikārakāmo viśvasya cittavibhurindriyavājyadhīśaḥ /
bhūtāni bibhrati mahāntyapi yasya śiṣṭiṃ vyāvṛttamaulimaṇiraśmibhiruttamāṅgaiḥ //

kāmastu tasya naivāsti pratyakṣeṇopalakṣyate /
dampatyoḥ sahadharmeṇa trayīdharmamavāpnuyāt //

kāmas tu bāṇāvasaraṃ pratīkṣya pataṅgavad vahnimukhaṃ vivikṣuḥ /
umāsamakṣaṃ harabaddhalakṣyaḥ śarāsanajyāṃ muhurāmamarśa //

kāmasya kaścic caturaḥ śarāṃśced vilaṅghayāmāsa kathaṃcidanyān /
unmajjatā kokilakaṇṭhayantrāt na pañcamāstreṇa vaśīvabhūva //

kāmasya jetukāmasya milanāya mahīpateḥ /
divo mīnaṃ tviṣāmīśo dvārīkartumivāyayau //

kāmasya veṣaśobhā peśalatā cārutā guṇotkarṣaḥ /
nānāvidhāśca līlāś cittajñānaṃ ca kāntānām //

kāmasyāpi nidānamāhurapare māyāṃ mahāśāsanāṃ niścitkāṃ sakalaprapañcaracanācāturyalīlāvatīm /
yatsaṅgād bhagavānapi prabhavati pratyaṅmahāmohahā śrīraṅgo bhuvanodayāvanalayavyāpāracakre'kriyaḥ //

kāmasvabhāvo yo yasya na sa śakyaḥ pramārjitum /
na hi duṣṭātmanāmārya mā vasatyālaye ciram //

kāmāgniḥ parivardhito virahiṇīśvāsānilairnirbharaṃ tūrṇaṃ tena kṛśānunā kṛśatanurmugdhā na dagdhā katham /
bālā lolavilocanāmbujagalatsadvāridhārābharaiḥ siktā samprati tena jīvasi hare tāṃ tvaṃ samullāsaya //

kāmaturo nādhigacchen mahāpuruṣakāminīm /
sahasrayonideho'bhūd indro'halyāparigrahāt //

kāmāt krodhād bhayādanyair lobhymāno na lumpati /
yayā śaktyā yutaḥ kārye mantraśaktistu sā smṛtā //

kāmāt klāmyasi kā rītir nārīti narakābhidhā /
malamajjāmayī māṃsasthagī kiṃ na vigīyate //

kāmātmatā na praśastā na caivāstyakāmatā /
kāmyo hi vedādhigamaḥ karmayogaśca vaidikaḥ //

kāmāditrikameva mūlamakhilakleśasya māyodbhavaṃ martyānāmiti devamaulivilasadbhrājiṣṇucūḍāmaṇiḥ /
śrīkṛṣṇo bhagavānavocadakhilaprāṇipriyo matprabhur yasmāt tat trikamudyatena manasā heyaṃ pumarthārthinā //

kāmādhikaraṇagrāhyakulādibalaśālinaḥ /
ahīne'pi narendrasya śaktayaḥ siddhihetavaḥ //

kāmānāmapi dātāraṃ kartāraṃ mānasāntvayoḥ /
rakṣitāraṃ na mṛṣyanti bhartāraṃ paramaṃ striyaḥ //

kāmānuśāsanaśate sutarāmadhītī so'yaṃ raho nakhapadairmahatu stanau te /
ruṣṭādrijācaraṇakuṅkumapaṅkarāga saṃkīrṇaśaṅkaraśaśāṅkakalāṅka kāraiḥ //