Mahāsubhāṣitasaṃgraha 1-9979 · Verses 9555-9574

kāmaṃ vaneṣu hariṇās tṛṇena jīvantyayatnasulabhena /
vidadhati dhaniṣu na dainyaṃ te kila paśavo vayaṃ sudhiyaḥ //

kāmaṃ vapuḥ pulakitaṃ nayane dhṛtāsre vācaḥ sagadgadapadāḥ sakhi kampi vakṣaḥ /
jñātaṃ mukundamuralīravamādhurī te cetaḥ sudhāṃśuvadane taralīkaroti //

kāmaṃ vācaḥ katicidaphalāḥ santu loke kavīnāṃ santyevānyā madhuripukathāsaṃstavāt kāmadogdhryaḥ /
vittaṃ kāmaṃ bhavatu viphalaṃ dattamaśrotriyebhyaḥ pātre dattairbhavati hi dhanairdhanyatā bhūridātuḥ //

kāmaṃ viṣaṃ ca viṣayāśca nirīkṣyamāṇāḥ śreyo viṣaṃ na viṣayāḥ parisevyamānāḥ /
ekatra janmani viṣaṃ vinihanti pītaṃ janmāntareṣu viṣayāḥ paritāpayanti //

kāmaṃ śivena śamitaṃ punarujjagāra dṛṣṭis taveti kimiyaṃ janani stutiste /
līlāprasūtapuruṣārthacatuṣṭayāyās tasyāḥ paraṃ tu sa bhavatyavayuktyavādaḥ //

kāmaṃ śīrṇapalāśapatraracitāṃ kanthāṃ vasāno vane kuryāmambubhirapyayācitasukhaiḥ prāṇānubandhasthitim /
sāṅgaglāni savepitaṃ sacakitaṃ sāntarnidāghajvaraṃ vaktuṃ na tvahamutsahe sakṛpaṇaṃ dehīti dīnaṃ vacaḥ //

kāmaṃ śunako nṛpati- prasādataḥ syād gajendramaulisthaḥ /
bhavateva tena saha re nārdayituṃ śakyate jātu //

kāmaṃ śyāmatanus tathā malinayatyāvāsavastrādikaṃ lokaṃ rodayate bhanakti janatāgoṣṭhīṃ kṣaṇenāpi yaḥ /
mārge'pyaṅgulilagna eva bhavataḥ svābhāvinaḥ śreyase hā svāhāpriya dhūmamaṅgajamimaṃ sūtvā na kiṃ lajjitaḥ //

kāmaṃ santu sahasraśaḥ katipaye sārasyadhaureyakāḥ kāmaṃ vā kamanīyatāparimalasvārājyabaddhavratāḥ /
naivaivaṃ vivadāmahe na ca vayaṃ deva priyaṃ brūmahe yatsatyaṃ ramaṇīyatāpariṇatistvayyeva pāraṃ gatā //

kāmaṃ sarvo'pyalaṃkāro rasamarthe niṣiñcati /
tathāpyagrāmyataivainaṃ bhāraṃ vahati bhūyasā //
kāmaṃ sudhākarakarāmṛtadivyarūpa- saudhāgrapīṭhavasatiḥ sukhamastu kākaḥ /
śrīsundarīramaṇasaṅgamakaṇṭhalagna- pūryatsudhāmaṇitajit kimasau kapotaḥ //

kāmaṃ striyo niṣeveta pānaṃ vā sādhu mātrayā /
na dyūtamṛgaye vidvān atyantavyasane hi te //

kāmaṃ harirbhava vimūḍha bhavātha candraś candrārdhamauliratha vā hara eva bhūyāḥ /
vidyāpraṇāśaparivardhitaghoradīpteḥ krodhānalasya mama nendhanatāṃ prayāsi //

kāmaḥ kamanīyatayā kimapi nikāmaṃ karoti saṃmoham /
viṣamiva viṣamaṃ sahasā madhuratayā jīvanaṃ harati //

kāmaḥ kāmaṃ kamalavadanānetraparyantavāsī dāsībhūtatribhuvanajanaḥ prītaye jāyatāṃ vaḥ /
dagdhasyāpi tripuraripuṇā sarvalokaspṛhārhā yasyādhikyaṃ ruciratitarāmañjanasyeva yātā //

kāmaḥ kupyati candramā api balānmāṃ dagdhumabhyudyato vātā vāpi samāgatā yamadiśaḥ prāṇān niharntu tathā /
raktākṣāstvarayanti tān parabhṛtāḥ svaiḥ kūjanairdūti tat preyāṃsaṃ tamupānayāśvitarathā trāṇaṃ na me kutracit //
kāmaḥ krodhaśca lobhaśca dehe tiṣṭhanti taskarāḥ /
jñātaratnamapāhāri tasmāj jāgrata jāgrata //

kāmaḥ krodhaśca lobhaśca māno harṣo madas tathā /
ete hi ṣaḍ vijetavyā nityaṃ svaṃ dehamāśritāḥ //

kāmaḥ krodhaśca lobhaśca mado mānas tathaiva ca /
harṣaśca śatravo hyete nāśāya kumahībhṛtām //
kāmaḥ krodhaśca lobhaśca moho harṣo madastathā /
ṣaḍvargamutsṛjedenaṃ yasmiṃstyakte sukhī nṛpaḥ //
kāmaḥ krodhas tathā mohas trayo'pyete mahādviṣaḥ /
ete na nirjitā yāvat tāvat saukhyaṃ kuto nṛṇām //

kāmaḥ krodhas tathā lobho dehe tiṣṭhanti taskarāḥ /
te muṣṇanti jagat sarvaṃ tasmājjāgrata jāgrata //
kāmaḥ krodhas tathā lobho rāgo dveṣaśca matsaraḥ /
mado māyā tathā mohaḥ kandarpo darpa eva ca //
ete hi ripavo ghorā dharmasarvasvahāriṇaḥ /
etairbambhramyate jīvaḥ saṃsāre bahuduḥkhade //

kāmaḥ krodhas tathā lobho harṣo māno madas tathā /
ṣaḍvargamutsṛjedenaṃ tasmiṃs tyakte sukhī nṛpaḥ //

kāmaḥ krodho mado māno lobho harṣas tathaiva ca /
ete varjyāḥ prayatnena sādaraṃ pṛthivīkṣitā //