Mahāsubhāṣitasaṃgraha 1-9979 · Verses 9535-9554

kāmaṃ dahantu maruto malayācalasya candro'pi pātayatu vā nitarāṃ sphuliṅgān /
dūre priyo vimalavaṃśamaṇiḥ patirme tatsāmprataṃ tvaritamānaya taṃ kathaṃcit //

kāmaṃ dīrghā bhaved yātrā kāmaṃ panthā mahān bhavet /
so'pi prabhoḥ kṛpāmeva nityamāśrayate'ntataḥ //

kāmaṃ dugdhe viprakarṣatyalakṣmīṃ kīrtiṃ sūte duṣkṛtaṃ yā hinasti /
tāṃ cāpyetāṃ mātaraṃ maṅgalānāṃ dhenuṃ dhīrāḥ sūnṛtāṃ vācamāhuḥ //

kāmaṃ durviṣahajvaraṃ janayati vyāghūrṇayatpakṣiṇī gātrāṇyūrunitambagaṇḍahṛdayānyucchūnay atyulbaṇam /
tāṃ tāṃ durvikṛtaṃ karoti suhṛdo gāḍhaṃ vyathante yayā vyādhiyauvanamātmanāśaniyataḥ ke te grahaṇyādayaḥ //

kāmaṃ dṛṣṭā mayā sarvā vivastrā rāvaṇastriyaḥ /
na tu me manasaḥ kiṃcid vaikṛtyamupapadyate //

mano hi hetuḥ sarveṣām indriyāṇāṃ pravartane /
śubhāśubhāsvavasthāsu tacca me suvyavasthitam //

kāmaṃ na paśyati didṛkṣata eva bhūmnā noktāpi jalpati vivakṣati cādareṇa /
lajjāsmaravyatikareṇa mano'dhināthe bālā rasāntaramidaṃ lalitaṃ bibharti //

kāmaṃ niṣkaruṇaṃ vetsi vetsi taṃ bahuvallabham /
dūti cūtāṅkurakharā diśo vetsi na vetsi kim //

kāmaṃ nṛpāḥ santu sahasraśo'nye rājanvatīmāhuranena bhūmim /
nakṣatratārāgrahasaṃkulāpi jyotiṣmatī cāndramasaiva rātriḥ //
kāmaṃ paramiti jñātvā devo'pi hi purandaraḥ /
gautamasya muneḥ patnīm ahalyāṃ cakame purā //

kāmaṃ pratyādiṣṭāṃ smarāmi na parigrahaṃ munes tanayān /
balavat tu dūyamānaṃ pratyāyayatīva me hṛdayam //

kāmaṃ pradīpayati rūpamabhivyanakti saubhāgyamāvahati vaktrasugandhitāṃ ca /
ūrjaṃ karoti kaphajāśca nihanti rogāṃs tāmbūlamevamaparāṃśca guṇān karoti //

yuktena cūrṇena karoti rāgaṃ rāgakṣayaṃ pūgaphalātiriktam /
cūrṇādhikaṃ vaktravigandhakāri patrādhikaṃ sādhu karoti gandham //

patrādhikam niśi hitaṃ saphalaṃ divā ca proktānyathākaraṇamasya viḍambanaiva /
kakkolapūgalavalīphalapārijātair āmoditaṃ madamudā muditaṃ karoti //

kāmaṃ pradoṣatimireṇa na dṛśyase tvaṃ saudāminīva jaladodarasaṃdhilīnā /
tvāṃ sūcayiṣyati tu mālyasamudbhavo'yaṃ gandhaśca bhīru mukharāṇi ca nūpurāṇi //

kāmaṃ priyānapi prāṇān vimuñcanti manasvinaḥ /
icchanti na tvamitrebhyo mahatīmapi satkriyām //

kāmaṃ priyā na sulabhā manas tu tadbhāvadarśanāśvāsi /
akṛtārthe'pi manasije ratimubhayaprārthanā kurute //

kāmaṃ bhavantu madhulampaṭaṣaṭpadaugha- saṃghaṭṭadhundhumaghanadhvanayo'bjakhaṇḍāḥ /
gāyatyatiśrutisukhaṃ vidhireva yatra bhṛṅgaḥ sa ko'pi dharaṇīdharanābhipadmaḥ //

kāmaṃ bhavantu sarito bhuvi supratiṣṭhāḥ svādūni santu salilāni ca śuktayaśca /
etāṃ vihāya varavarṇini tāmraparṇīṃ nānyatra sambhavati mauktikakāmadhenuḥ //

kāmaṃ mā kāmayadhvaṃ vṛṣamapi ca bhṛśaṃ mādriyadhvaṃ na vitte cittaṃ datta śrayadhvaṃ paramamṛtaphalā yā kalā tāmihaikām /
itthaṃ devaḥ smarārirvūṣamadharacarīkṛtya mūrtyaiva ditsan niḥsvo viśvopadeśānamṛtakarakalāśekharastrāyatāṃ vaḥ //

kāmaṃ likhatu saṃsthānaṃ kaścid rūpaṃ ca bhāsvataḥ /
abhittivihatālambam ālokaṃ vilikhet katham //