મહાસુભાષિતસંગ્રહ · શ્લોક 9535-9554

કામં દહન્તુ મરુતો મલયાચલસ્ય ચન્દ્રોઽપિ પાતયતુ વા નિતરાં સ્ફુલિઙ્ગાન્ ।
દૂરે પ્રિયો વિમલવંશમણિઃ પતિર્મે તત્સામ્પ્રતં ત્વરિતમાનય તં કથંચિત્ ॥

કામં દીર્ઘા ભવેદ્ યાત્રા કામં પન્થા મહાન્ ભવેત્ ।
સોઽપિ પ્રભોઃ કૃપામેવ નિત્યમાશ્રયતેઽન્તતઃ ॥

કામં દુગ્ધે વિપ્રકર્ષત્યલક્ષ્મીં કીર્તિં સૂતે દુષ્કૃતં યા હિનસ્તિ ।
તાં ચાપ્યેતાં માતરં મઙ્ગલાનાં ધેનું ધીરાઃ સૂનૃતાં વાચમાહુઃ ॥

કામં દુર્વિષહજ્વરં જનયતિ વ્યાઘૂર્ણયત્પક્ષિણી ગાત્રાણ્યૂરુનિતમ્બગણ્ડહૃદયાન્યુચ્છૂનય્ અત્યુલ્બણમ્ ।
તાં તાં દુર્વિકૃતં કરોતિ સુહૃદો ગાઢં વ્યથન્તે યયા વ્યાધિયૌવનમાત્મનાશનિયતઃ કે તે ગ્રહણ્યાદયઃ ॥

કામં દૃષ્ટા મયા સર્વા વિવસ્ત્રા રાવણસ્ત્રિયઃ ।
ન તુ મે મનસઃ કિંચિદ્ વૈકૃત્યમુપપદ્યતે ॥

મનો હિ હેતુઃ સર્વેષામ્ ઇન્દ્રિયાણાં પ્રવર્તને ।
શુભાશુભાસ્વવસ્થાસુ તચ્ચ મે સુવ્યવસ્થિતમ્ ॥

કામં ન પશ્યતિ દિદૃક્ષત એવ ભૂમ્ના નોક્તાપિ જલ્પતિ વિવક્ષતિ ચાદરેણ ।
લજ્જાસ્મરવ્યતિકરેણ મનોઽધિનાથે બાલા રસાન્તરમિદં લલિતં બિભર્તિ ॥

કામં નિષ્કરુણં વેત્સિ વેત્સિ તં બહુવલ્લભમ્ ।
દૂતિ ચૂતાઙ્કુરખરા દિશો વેત્સિ ન વેત્સિ કિમ્ ॥

કામં નૃપાઃ સન્તુ સહસ્રશોઽન્યે રાજન્વતીમાહુરનેન ભૂમિમ્ ।
નક્ષત્રતારાગ્રહસંકુલાપિ જ્યોતિષ્મતી ચાન્દ્રમસૈવ રાત્રિઃ ॥
કામં પરમિતિ જ્ઞાત્વા દેવોઽપિ હિ પુરન્દરઃ ।
ગૌતમસ્ય મુનેઃ પત્નીમ્ અહલ્યાં ચકમે પુરા ॥

કામં પ્રત્યાદિષ્ટાં સ્મરામિ ન પરિગ્રહં મુનેસ્ તનયાન્ ।
બલવત્ તુ દૂયમાનં પ્રત્યાયયતીવ મે હૃદયમ્ ॥

કામં પ્રદીપયતિ રૂપમભિવ્યનક્તિ સૌભાગ્યમાવહતિ વક્ત્રસુગન્ધિતાં ચ ।
ઊર્જં કરોતિ કફજાશ્ચ નિહન્તિ રોગાંસ્ તામ્બૂલમેવમપરાંશ્ચ ગુણાન્ કરોતિ ॥

યુક્તેન ચૂર્ણેન કરોતિ રાગં રાગક્ષયં પૂગફલાતિરિક્તમ્ ।
ચૂર્ણાધિકં વક્ત્રવિગન્ધકારિ પત્રાધિકં સાધુ કરોતિ ગન્ધમ્ ॥

પત્રાધિકમ્ નિશિ હિતં સફલં દિવા ચ પ્રોક્તાન્યથાકરણમસ્ય વિડમ્બનૈવ ।
કક્કોલપૂગલવલીફલપારિજાતૈર્ આમોદિતં મદમુદા મુદિતં કરોતિ ॥

કામં પ્રદોષતિમિરેણ ન દૃશ્યસે ત્વં સૌદામિનીવ જલદોદરસંધિલીના ।
ત્વાં સૂચયિષ્યતિ તુ માલ્યસમુદ્ભવોઽયં ગન્ધશ્ચ ભીરુ મુખરાણિ ચ નૂપુરાણિ ॥

કામં પ્રિયાનપિ પ્રાણાન્ વિમુઞ્ચન્તિ મનસ્વિનઃ ।
ઇચ્છન્તિ ન ત્વમિત્રેભ્યો મહતીમપિ સત્ક્રિયામ્ ॥

કામં પ્રિયા ન સુલભા મનસ્ તુ તદ્ભાવદર્શનાશ્વાસિ ।
અકૃતાર્થેઽપિ મનસિજે રતિમુભયપ્રાર્થના કુરુતે ॥

કામં ભવન્તુ મધુલમ્પટષટ્પદૌઘ- સંઘટ્ટધુન્ધુમઘનધ્વનયોઽબ્જખણ્ડાઃ ।
ગાયત્યતિશ્રુતિસુખં વિધિરેવ યત્ર ભૃઙ્ગઃ સ કોઽપિ ધરણીધરનાભિપદ્મઃ ॥

કામં ભવન્તુ સરિતો ભુવિ સુપ્રતિષ્ઠાઃ સ્વાદૂનિ સન્તુ સલિલાનિ ચ શુક્તયશ્ચ ।
એતાં વિહાય વરવર્ણિનિ તામ્રપર્ણીં નાન્યત્ર સમ્ભવતિ મૌક્તિકકામધેનુઃ ॥

કામં મા કામયધ્વં વૃષમપિ ચ ભૃશં માદ્રિયધ્વં ન વિત્તે ચિત્તં દત્ત શ્રયધ્વં પરમમૃતફલા યા કલા તામિહૈકામ્ ।
ઇત્થં દેવઃ સ્મરારિર્વૂષમધરચરીકૃત્ય મૂર્ત્યૈવ દિત્સન્ નિઃસ્વો વિશ્વોપદેશાનમૃતકરકલાશેખરસ્ત્રાયતાં વઃ ॥

કામં લિખતુ સંસ્થાનં કશ્ચિદ્ રૂપં ચ ભાસ્વતઃ ।
અભિત્તિવિહતાલમ્બમ્ આલોકં વિલિખેત્ કથમ્ ॥