Mahāsubhāṣitasaṃgraha 1-9979 · Verses 9515-9534

kāpyāgataṃ vīkṣya manodhināthaṃ samutthitā sādaramāsanāya /
kareṇa śiñjadvalayena talpam āsphālayantī kalamājuhāva //

kā prastutābhiṣekād āryaṃ pracyāvayed guṇajyeṣṭham /
manye mamaiva puṇyaiḥ sevāvasaraḥ kṛto vidhinā //

kā priyeṇa rahitā varāṅganā dhāmni kena tanayena nanditā /
kīdṛśena puruṣeṇa pakṣiṇāṃ bandhanaṃ samabhilaṣyate sadā //

kā prītiḥ saha mārjāraiḥ kā prītiravanīpatau /
gaṇikābhiśca kā prītiḥ kā prītirbhikṣukaiḥ saha //

kābhirna tatrābhinavasmarājñā viśvāsanikṣepavaṇik kriye'ham /
jihneti yannaiva kuto'pi tiryak kaścit tiraścastrapate na tena //

kā bhūṣā balināṃ, kṣamā, paribhavaḥ, kopaḥ svakulyaiḥ kṛtaḥ kiṃ duḥkhaṃ, parasaṃśrayo, jagati kaḥ ślāghyo, ya āśrīyate /
ko mṛtyu, rvyasanaṃ, śucaṃ jahati ke, yairnirjitā śatravaḥ kairvijñātamidaṃ virāṭanagaracchannasthitaiḥ pāṇḍavaiḥ //

kāmaṃ karīṣāgnimadho nidhāyā- bhrameṇa tāpātiśayaṃ bhajadhvam /
yuṣmākamadyāvadhi nādhikāro dugdhātimugdhādharamādhurīṣu //

kāmaṃ karṇakaṭuḥ kṛto'timadhuraḥ kekāravaḥ kekināṃ meghāścāmṛtadhāriṇo'pi vihitāḥ prāyo viṣasyandinaḥ /
unmīlannavakandalāvalirasau śayyāpi sarpāyate tat kiṃ yad viparītamatra na kṛtaṃ tasyā viyogena me //

kāmaṃ kāmadughaṃ dhuṅkṣva mitrāya varuṇāya ca /
vayaṃ dhīreṇa dānena sarvān kāmānaśīmahi //

kāmaṃ kāmayate na kelinalinīṃ nāmodate kaumudī- nisyandairna samīhate mṛgadṛśāmālāpalīlāmapi /
sīdanneṣa niśāsu duḥsahatanurbhogābhilāṣālasair aṅgaistāmyati cetasi vrajavadhūmādhāya mugdho hariḥ //

kāmaṃ kāmayamānasya yadā kāmaḥ samṛddhyate /
athainamaparaḥ kāmas tṛṣṇā vidhyati bāṇavat //

kāmaṃ kāmasamas tvamatra jagati khyāto'si yat sarvadā rūpeṇaiva mahīpate tava dhanuḥpāṇḍityamanyādṛśam /
tvaṃ yasmin viśikhaṃ vimuñcasi tamevoddiśya muktatrapaṃ truṭyatkaṃcukamudgataspṛhamaho dhāvanti devāṅganāḥ //

kāmaṃ kumīnasadṛśaṃ rājyamapi prājyakaṇṭakaṃ kuśalaḥ /
pākānvitamatisurasaṃ bhuṅkte bahudhāvadhānena //

kāmaṃ kūle nadīnāmanugiri mahiṣīyūthanīḍopakaṇṭhe gāhante śaṣparājīrabhinavaśalabhagrāsalolā balākāḥ /
antarvinyastavīruttṛṇamayapuruṣatrāsavighnaṃ kathaṃcit kāpotaṃ kodravāṇāṃ kavalayati kaṇān kṣetrakoṇaikadeśe //

kāmaṃ kopakaṣāyitākṣiyugalaṃ kṛtvā karotphālanaiḥ kṣudrān vanyamṛgāt karīndra sahasā vidrāvaya tvaṃ mudā /
helākhaṇḍitakumbhikumbhavigaladraktāruṇāṅge harau jāte locanagocare yadi bhavān sthātā tadā manmahe //

kāmaṃ krodhaṃ ca lobhaṃ ca dambhaṃ darpaṃ ca bhūmipaḥ /
samyagvijetuṃ yo veda sa mahīmabhijāyate //
kāmaṃ krodhaṃ bhayaṃ lobhaṃ dambhaṃ mohaṃ madaṃ tathā /
nidrāṃ matsaramālasyaṃ nāstikyaṃ ca parityaja //

kāmaṃ krodhaṃ lobhaṃ mohaṃ tyaktvātmānaṃ paśya hi ko'ham
ātmajñānavihīnā mūḍhās te pacyante narake mūḍhāḥ //

kāmaṃ guṇairmahāneṣa prakṛtyā punarāsuraḥ /
utkarṣāt sarvato vṛtteḥ sarvākāraṃ hi dṛpyati //

kāmaṃ janāḥ smayante kailāsavilāsavarṇanāvasare /
sādhanakathanāvasare sācīkurvanti vaktrāṇi //

kāmaṃ tu kṣapayed dehaṃ puṣpamūlaphalaiḥ śubhaiḥ /
na tu nāmāpi gṛhṇīyāt patyau prete parasya tu //