Mahāsubhāṣitasaṃgraha 1-9979 · Verses 9495-9514

kānte snehanidhau samīyuṣi madhau jitvā śriyaṃ śaiśirīṃ viśleṣādiva tasya pāṇḍimabhṛtāmālīlatānāmiyam /
kartuṃ nūtanacitrapatraracanāṃ kiṃ kānanaśrīrimāṃ prācīnāṃ pavanāñcalena paritaḥ patrāvalīṃ lumpati //

kānte hanta sukomalā bata matā prāg vyarthameva bhramāt kiṃtu tvaṃ bhuvi niṣṭhurā nirupamā paśyasyapīmaṃ na mām /
tasmād vakṣasi te payodharamiṣād dhātrā nikhāyārpitau śailendrāviti sāṃprataṃ na hi ciraṃ saukhyaṃ parakleśituḥ //

kānto narmaṇi naipuṇena viditastvaṃ śaiśavadveṣiṇī krīḍāśailaśiromaṇirgṛhamidaṃ ramyo vasantotsavaḥ /
sakhyaḥ kāmakathopacāracaturāḥ saṃbhogakāle'dhunā māno vā kalaho'thavā yadi kadā taccetaso nirvṛtiḥ //

kānto yāsyati dūradeśamiti me cintā paraṃ jāyate lokānandakaro hi candravadane vairāyate candramāḥ /
kiṃ cāyaṃ vitanoti kokilakalālāpo vilāpodayaṃ prāṇāneva haranti hanta nitarāmārāmamandānilāḥ //

kānto'si nityamadhuro'si rasākulo'si kiṃ cāsi pañcaśarakārmukamadvitīyam /
ikṣo tavāsti sakalaṃ paramekamūnaṃ yat sevito bhajasi nīrasatāṃ krameṇa //

kāntyā kāñcanakāntayā parimalairbhāgyaikabhogyais tathā saundaryeṇa ca sādhunaiva kusumaṃ hā hanta na tvatsamam /
akrodhaṃ śṛṇu kintu dūṣaṇamiva tvayyasti kiñcit punas tattvajñairyadacumbitaṃ tvamasi re cāmpeya puṣpandhayaiḥ //

kāntyā daridratvamupaiti candraḥ kimasti tattvaṃ vikacotpaleṣu /
na vedyi viśvāsya kathaṃ mṛgākṣyā saundaryasṛṣṭirmuṣitā vidhātuḥ //

kāntyā viluptāni vilocanānām āpāṭalānāmatirodanena /
sakuṅkumānīva punarbhaṃvanti yasyārinārīkucamaṇḍalāni //

kāntyā suvarṇavarayā parayā ca śuddhyā nityaṃ svikāḥ khalu śikhāḥ paritaḥ kṣipantīm /
cetoharāmapi kṛśeśayalocane tvāṃ jānāmi kopakaluṣo dahano dadāha //

kānyakubjā dvijāḥ sarve māgadhaṃ mādhuraṃ vinā /
gauḍadrāviḍavikhyātāḥ kānyakubjāḥ mahodbhavāḥ //

kā pāṇḍupatnī gṛhabhūṣaṇaṃ kiṃ ko rāmaśatruḥ kimagastyajanma /
kaḥ sūryaputro viparītapṛcchā kuntīsuto rāvaṇakumbhakarṇāḥ //

kāpi kāntamidamāha mahelā sādhu sādhaya tathā yudhi kāryam /
vartate tava yathā ca jayaśrīr lokanāthalalanā ca sapatnī //

kāpi kuḍyalikhitāvadhirekhāḥ proṣitapriyatamā gaṇayantī /
veśmani prabalavahniparīte sāsrayā bahiranīyata sakhyā //

kāpi mukhyapadavīmadhiropya svāṃ sakhīṃ svakaradhāritadīpā /
prāṇanātharatigehamayāsīd adbhuto ratipaterupadeśaḥ //

kāpiśāyanasugandhi vighūrṇann unmado'dhiśayituṃ samaśeta /
phulladṛṣṭivadanaṃ pramadānām abjacāru caṣakaṃ ca śaḍaṅghriḥ //

kāpi śīghramavadhīritamānā mānino vicalitā priyadhāmni /
āgatena marutāpi purastāl lāghavasya parihāramamaṃsta //

kāpuruṣaḥ kukkuraśca bhojanaikaparāyaṇaḥ /
lālitaḥ pārśvamāyāti vārito naiva gacchati //

kāpyaṅghrī raṅgapatryāruṇayati ramaṇī bhūṣaṇairbhāti kācid gāyatyanyā parāpi pralasati laharīlakṣma vāso vasānā /
yatrānyā snehapūrān vitarati ca mudaṃ yāti dolābhiranyā sā śṛṅgāradvitīyā racayati na manaḥ kasya śṛṅgāramagnam //

kāpyanyā mukulādhikāramilitā lakṣmīraśokadrume mākandaḥ samayocitena vidhinā dhatte'bhijātaṃ vapuḥ /
kiṃ cāṣāḍhagireranaṅgavijayaprastāvanāpaṇḍita ḥ svairaṃ sarpati bālacandanalatālīlāsakho mārutaḥ //

kāpyabhikhyā tayorāsīd vrajato śuddhaveṣayoḥ /
himanirmuktayoryoge citrācandramasoriva //