Mahāsubhāṣitasaṃgraha 1-9979 · Verses 7012-7031

upakāraḥ paro dharmaḥ paro'rthaḥ karmanaipuṇam /
pātre dānaṃ paraḥ kāmaḥ paro mokṣo vitṛṣṇatā //

upakārakamāyaterbhṛśaṃ prasavaḥ karmaphalasya bhūriṇaḥ /
anapāyi nibarhaṇaṃ dviṣāṃ na titikṣāsamamasti sādhanam //

upakāragṛhītena śatruṇā śatrumuddharet /
pādalagnaṃ karasthena kaṇṭakeneva kaṇṭakam //

upakāraparaḥ pravaraḥ pratyupakāraṃ karoti madhyasthaḥ /
nīcastadapi na kurute upakārvaśād bhavati śatruḥ saḥ //

upakāraparaḥ svabhāvata satataṃ sarvajanasya sajjanaḥ /
asatāmaniśaṃ tathāpyaho guruhṛdrogakarī tadunnatiḥ //

upakārapradhānaḥ syād apakārapare'pyarau /
saṃpadvipatsvekamanā hetāvīrṣyet phale na tu //

upakāraphalaṃ mitram apakāro'rilakṣaṇam /
... ... ... ... ... ... ... ... ... ... //

upakārameva tanute vipadgataḥ sadguṇo nitarām /
mūrcchāṃ gato mṛto vā nidarśanaṃ pārado'tra rasaḥ //

upakāraśatenāpi gṛhyate kena durjanaḥ /
sādhuḥ saṃmānamātreṇa bhavatyevātmavikrayī //

upakāraśatenāpi dānaiścāpi suvistaraiḥ /
lālanāt prītipūrvācca na grāhyo bhaginīsutaḥ //

upakāraścāpakāro yasya vrajati vismṛtim /
pāṣāṇahṛdayasyāsya jīvatītyabhidhā mudhā //

upakārācca lokānāṃ nimittānmṛgapakṣiṇām /
bhayāllobhācca mūrkhāṇāṃ maitrī syād darśanāt satām //

upakārādṛte'pyāśu mitraṃ śreyasi tiṣṭhati /
mitravān sādhayatyarthān duḥsādhyānapyanādarāt //

upakārāya na jātaḥ sapadi sujātaḥ kva jātavaire'pi /
grāsayati grasto'pi drohiṇamamṛtāni rohiṇīramaṇaḥ //

upakārāya yā puṃsāṃ na parasya na cātmanaḥ /
patrasaṃcayasaṃbhāraiḥ kiṃ tayā bhāravidyayā //

upakāriṇamapi pūjyaṃ hanti mahāntaṃ khalo'trapo'vasare /
dhṛṣṭadyumno madhye- vīraṃ hatavān guruṃ śāntam //

upakāriṇi vikṣīṇe śanaiḥ kedāravāriṇi /
sānukrośatayā śālir abhūt pāṇḍuravā mukhaḥ //

upakāriṇi viśrabdhe śuddhamatau yaḥ samācarati pāpam /
taṃ janamasatyasaṃdhaṃ bhagavati vasudhe kathaṃ vahasi //

upakāriṇi vītamatsare vā sadayatvaṃ yadi tatra ko'tirekaḥ /
ahite sahasāparāddhalabdhe saghṛṇaṃ yasya manaḥ satāṃ sa dhuryaḥ //

upakāriṣu yaḥ sādhuḥ sādhutve tasya ko guṇaḥ /
apakāriṣu yaḥ sādhuḥ sa sādhuḥ sadbhirucyate //