Mahabharata · Chapter 9.63

tataste prayayuḥ sarve nivāsāya mahīkṣitaḥ /
śaṅkhānpradhmāpayanto vai hṛṣṭāḥ parighabāhavaḥ //

pāṇḍavāngacchataścāpi śibiraṃ no viśāmpate /
maheṣvāso'nvagātpaścādyuyutsuḥ sātyakistathā //

dhṛṣṭadyumnaḥ śikhaṇḍī ca draupadeyāśca sarvaśaḥ /
sarve cānye maheṣvāsā yayuḥ svaśibirāṇyuta //

tataste prāviśanpārthā hatatviṭkaṃ hateśvaram /
duryodhanasya śibiraṃ raṅgavanniḥsṛte jane //

gatotsavaṃ puramiva hṛtanāgamiva hadam /
strīvarṣavarabhūyiṣṭhaṃ vṛddhāmātyairadhiṣṭhitam //

tatraitānparyupātiṣṭhanduryodhana puraḥsarāḥ /
kṛtāñjalipuṭā rājankāṣāyamalināmbarāḥ //

śibiraṃ samanuprāpya kururājasya pāṇḍavāḥ /
avaterurmahārāja rathebhyo rathasattamāḥ //

tato gāṇḍīvadhanvānamabhyabhāṣata keśavaḥ /
sthitaḥ priyahite nityamatīva bharatarṣabha //

avaropaya gāṇḍīvamakṣayau ca maheṣudhī / athāhamavarokṣyāmi paścādbharatasattama /
svayaṃ caivāvaroha tvametacchreyastavānagha //

taccākarottathā vīraḥ pāṇḍuputro dhanañjayaḥ //

atha paścāttataḥ kṛṣṇo raśmīnutsṛjya vājinām /
avārohata medhāvī rathādgāṇḍīvadhanvanaḥ //

athāvatīrṇe bhūtānāmīśvare sumahātmani /
kapirapyāśvapākrāmatsahadevairdhvajālayaiḥ //

sa dagdho droṇakarṇābhyāṃ divyairastrairmahārathaḥ /
atha dīpto'gninā hyāśu prajajvāla mahīpate //

sopāsaṅgaḥ saraśmiśca sāśvaḥ sayugabandhanaḥ /
bhasmībhūto'patadbhūmau ratho gāṇḍīvadhanvanaḥ //

taṃ tathā bhasmabhūtaṃ tu dṛṣṭvā pāṇḍusutāḥ prabho /
abhavanvismitā rājannarjunaścedamabravīt //

kṛtāñjaliḥ sapraṇayaṃ praṇipatyābhivādya ha /
govanda kasmādbhagavanratho dagdho'yamagninā //

kimetanmahadāścaryamabhavadyadunandana /
tanme brūhi mahābāho śrotavyaṃ yadi manyase //
vāsudeva uvāca /

droṇakarṇāstranirdagdhaḥ pūrvamevāyamarjuna /
madāsthitatvātsamare na viśīrṇaḥ parantapa //

idānīṃ tu viśīrṇo'yaṃ dagdho brahmāstratejasā /
mayā vimuktaḥ kaunteya tvayyadya kṛtakarmaṇi //
sañjaya uvāca /

īṣadutsmayamānastu bhagavānkeśavo'rihā /
pariṣvajya ca rājānaṃ yudhiṣṭhiramabhāṣata //

diṣṭyā jayasi kaunteya diṣṭyā te śatravo jitāḥ /
diṣṭyā gāṇḍīvadhanvā ca bhīmasenaśca pāṇḍavaḥ //

tvaṃ cāpi kuśalī rājanmādrīputrau ca pāṇḍavau / muktā vīrakṣayādismātsaṅgrāmānnihatadviṣaḥ /
kṣipramuttarakālāni kuru kāryāṇi bhārata //

upayātamupaplāvyaṃ saha gāṇḍīvadhanvanā /
ānīya madhuparkaṃ māṃ yatpurā tvamavocathāḥ //

eṣa bhrātā sakhā caiva tava kṛṣṇa dhanañjayaḥ /
rakṣitavyo mahābāho sarvāsvāpatsviti prabho //

tava caiva bruvāṇasya tathetyevāhamabruvam //

sa savyasācī guptaste vijayī ca janeśvara /

bhrātṛbhiḥ saha rājendra śūraḥ satyaparākramaḥ /
mukto vīrakṣayādasmātsaṅgrāmādromaharṣaṇāt //

evamuktastu kṛṣṇena dharmarājo yudhiṣṭhiraḥ /
hṛṣṭaromā mahārāja pratyuvāca janārdanam //
yudhiṣṭhira uvāca /

pramuktaṃ droṇakarṇābhyāṃ brahmāstramarimardana /
kastvadanyaḥ sahetsākṣādapi vajrī purandaraḥ //

bhavatastu prasādena sangrāme bahavo hatāḥ /
mahāraṇagataḥ pārtho yacca nāsītparāṅmukhaḥ //

tathā tava mahābāho paryāyairbahubhirmayā /
karmaṇaāmanusandhānāttejasvī jagati śrutā //

upaplāvye maharṣirme kṛṣṇadvaipāyano'bravīt /
yato dharmastataḥ kṛṣṇo yataḥ kṛṣṇastato jayaḥ //

evamuktastataḥ kṛṣṇaḥ pratyuvāca yudhiṣṭhiram /
na tulyāścārjunasyeha balena kurunandana //

sa eṣa sarvāṇyastrāṇi divyāni prāpya śaṅkarāt / satsamo vā viśiṣṭo vā raṇe tvamiti pāṇḍavaḥ /
anujñātaḥ pāṇḍusutaḥ punaḥ pratyāgamanmahīm //

bhūtaṃ bhavyaṃ bhaviṣyacca anujñātastvayā vibho /
nimeṣārdhānnaravyāghro nayediti matirmama //

droṇaṃ bhīṣmaṃ kṛpaṃ karṇaṃ droṇaputraṃ jayadratham /
nihantuṃ śaknuyātkruddho nimeṣārdhāddhanañjayaḥ //

sadevāsuragandharvānsayakṣoragarākṣasān /
trīnvā lokānvijetuṃ sa śaktaḥ kimiha mānuṣān //

vidhinā vihitaṃ cāsau mayā sañcodito'pi san /
na cakāra matiṃ hantuṃ tataste balavattarāḥ //

atra gītā mayā suṣṭhu giraḥ satyā mahīpate /
darsitaṃ mayi sarvaṃ ca tenāsau jitavānripūn //

arjuno'pi mahābāhurmayā tulyo mahīpate / sa maheśvaralabdhāstraḥ kiṃ na kuryādvibhuḥ prabho //

ityevamukte te vīrāḥ śibiraṃ tava bhārata /
praviśya pratyapadyanta kośaratnardhisañcayān //

rajataṃ jātarūpaṃ ca maṇīnatha ca mauktikān /
bhūṣaṇānyatha mukhyāni kambalānyajināni ca //

gajānaśvānrathāṃścaiva mahānti śayanāni ca /
dāsīdāsamasaṃkhyeyaṃ rājyopakaraṇāni ca //

te prāpya dhanamakṣayyaṃ tvadīyaṃ bharatarṣabha /
udakrośanmahābhāgā narendra vijitārayaḥ //

te tu vīrāḥ samāśvasya vāhanānyavamucya ca /
atiṣṭhanta muhuḥ sarve pāṇḍavā vigatajvarāḥ //

athābravīnmahārāja vāsudevo mahāyaśāḥ /
asmābhirmaṅgalārthāya vastavyaṃ śibirādbahiḥ //

tathetyuktvā hi te sarve pāṇḍavāḥ sātyakistathā /
vāsudevena sahitā maṅgalārthaṃ bahiryayuḥ //

te samāsādya saritaṃ puṇyāmoghavatīṃ nṛpa /
nyavasannatha tāṃ rātriṃ pāṇḍavā hataśatravaḥ //

yudhiṣṭhirastato rājā prāptakālamacintayan //

tatra te gamanaṃ māptaṃ rocate tava mādhava /
gāndhāryāḥ krodhadīptāyāḥ praśamārthamarindama //

hetukāraṇayuktaiśca vākyaiḥ kālasamīritaiḥ / kṣiprameva mahābhāga gāndhārīṃ praśamiṣyasi /
pitāmahaśca bhagavānvyāsastatra bhaviṣyati //

tataḥ sampreṣayāmāsuryādavaṃ nāgasāhvayam //

sa ca prāyājjavenāśu vāsudevaḥ pratāpavān /
dārukaṃ rathamāropya yena rājā'mbikāsutaḥ //

tamūcuḥ samprayāsyantaṃ śaibyasugrīvavāhanam /
pratyāśvāsaya gāndhārīṃ hataputrāṃ yaśasvinīm //

sa prāyātpāṇḍavairuktastatpuraṃ sātvatāṃ varaḥ /
āsasāda tataḥ kṣipraṃ gāndhārīṃ nihatātmajām //