Mahabharata · Chapter 9.56

rāmasānnidhyamāgamya putro duryodhanastava /
yoddhukāmo mahābāhuḥ samahṛṣyata vīryavān //

dṛṣṭvā lāṅgalinaṃ rājā pratyutthāya ca bhārata /
prītyā* paramayā yukto yudhiṣṭhiramathābravīt //
duryodhana uvāca /

samantapañcakaṃ puṇyamito yāma viśāmpate /
prathitottaravedī sā devaloke prajāpateḥ //

tasminmahāpuṇyatame trailokyasya sanātane /
saṅgrāme nidhanaṃ prāpya dhruvaṃ svargaṃ gamiṣyasi //

tathetyuktvā mahārāja kuntīputro yudhiṣṭhiraḥ /
samantapañcakaṃ vīraḥ prāyādabhimukhaḥ prabhuḥ //

tato duryodhano rājā pragṛhya mahatīṃ gadām /
paddhyāmamarṣī dyutimānagacchatpāṇḍavaiḥ saha //

tathā yāntaṃ gadāhastaṃ varmaṇā cāpi daṃśitam /
antarikṣacarā devāḥ sādhusādhvityapūjayan //

vādakāśca narāstatra dṛṣṭvā te harṣamāgatāḥ //

sa pāṇḍavaiḥ parivṛtaḥ kururājastavātmajaḥ /
mattasyeva gajendrasya gatimāsthāya so'vrajat //

tataḥ śaṅkhaninādaiśca bherīṇāṃ ca mahāsvanaiḥ /
siṃhanādaiśca śūrāṇāṃ diśaḥ sarvāḥ prapūritāḥ //

tataste tu kurukṣetraṃ prāptā naravarottamāḥ / pratīcyabhimukhaṃ deśaṃ yathoddiṣṭaṃ sutena te /
dakṣiṇena sarasvatyāḥ svayanaṃ tīrthamuttamam //

tasmindeśe tvaniriṇe te tu yuddhamarocayan //

tato bhīmo mahākoṭiṃ gadāṃ gṛhyātha varmabhṛt /
bibhradrūpaṃ mahārāja sadṛśaṃ hi garutmataḥ //

avabaddhaśirastrāṇaḥ śuddhakāñcanavarmabhṛt /
rarāja rājanputraste kāñcanaḥ śailarāḍiva //

tau tathā saṅgatau vīrau bhīmaduryodhanāvubhau /
saṃyuge samprakāśete saṃrabdhāviva kuñjarau //

rathamaṇḍalamadhyasthau bhrātarau tau nararṣabhau /
aśobhetāṃ mahārāja candrasūryāvivoditau //

tāvanyonyaṃ nirīkṣetāṃ kruddhāviva mahoragau /
dahantau locanai rājanparasparavadhaiṣiṇau //

samprahṛṣṭamanā rājangadāmādāya kauravaḥ /
sṛkviṇī saṃlihanrājankrodharaktekṣaṇaḥ śvasan //

tato duryodhano rājangadāmādāya vīryavān /
bhīmasenamabhiprekṣya gajo gajamivāhvayat //

adrisāramayīṃ bhīmastathaivādāya vīryavān /
āhvayāmāsa nṛpatiṃ siṃhaḥ siṃhaṃ yathā vane //

tāvudyatagadāpāṇī duryodhanavṛkodarau /
saṃyuge samprakāśetāṃ girī saśikharāviva //

tāvubhau samatikruddhāvubhau bhīmaparākramau /
ubhau śiṣyau gadāyuddhe rauhiṇeyasya dhīmataḥ //

ubhau sadṛśakarmāṇau varuṇasya mahābalau /
vāsudevasya rāmasya tathā vaiśravaṇasya ca //

sadṛśau tau mahārāja madhukaiṭabhayorapi /
ubhau sadṛśakarmāṇau tathā sundopasundayoḥ //

[rāmarāvaṇayoścaiva vālisugrīvayostathā] /
tathaiva kālasya samau mṛtyoścaiva parantapau //

anyonyamabhidhāvantau mattāviva mahādvipau /
vāsitāsaṅgame dṛptau śaradīva madotkaṭau //

ubhau krodhaviṣaṃ dīptaṃ vamantāvuragāviva /
anyonyamabhisaṃrabdhau prekṣamāṇāvarindamau //

ubhau bharataśārdūlau vikrameṇa samanvitau /
siṃhāviva durādharṣau gadāyuddhaviśāradau //

nakhadaṃṣṭrāyudhau vīrau vyāghrāviva durutsahau /
prajāsaṃharaṇe kṣubdhau samudrāviva dustarau //

lohitāṅgāviva kruddhau pratapantau mahārathau /
[pūrvapaścimajau meghau prekṣamāṇāvarindamau //

garjamānau suviṣamaṃ kṣarantau prāvṛṣīva hi /
raśmiyuktau mahātmānau dīptimantau mahābalau //

dadṛśāte kuruśreṣṭhau kālasūryāvivoditau /
vyāghrāviva susaṃrabdhau garjantāvivatoyadau //

jahṛṣāte mahābāhu siṃhakesariṇāviva /
gajāviva susaṃrabdhau jvalitāviva pāvakau //

dadṛśāte mahātmānau saśṛṅgāviva parvatau /
roṣātprasphuramāṇoṣṭhau nirīkṣantau parasparam //

tau sametau mahātmānau gadāhastau narottamau.] ubhau paramasaṃhṛṣṭāvubhau paramasammatau //

sadaśvāviva heṣantau bṛṃhantāviva kuñjarau / vṛṣabhāviva garjantau duryodhanavṛkodarau /
daityāviva balonmattau rejatustau narottamau //

tato duryodhano rājannidamāha yudhiṣṭhiram /
sṛñjayaiḥ saha tiṣṭhantaṃ tapantamiva bhāskaram //

idaṃ vyavasitaṃ yuddhaṃ mama bhīmasya cobhayoḥ /
upopaviṣṭāḥ paśyadhvaṃ vimardaṃ nṛpasattamāḥ //

tataḥ samupaviṣṭaṃ tatsumahadrājamaṇḍalam /
virājamānaṃ dadṛśe divīvādityamaṇḍalam //

teṣāṃ madhye mahābāhuḥ śrīmānkeśavapūrvajaḥ /
upaviṣṭo mahārāja pūjyamānaḥ samantataḥ //

śuśubhe rājamadhyastho nīlavāsāḥ sitaprabhaḥ /
nakṣatrairiva sampūrṇo vṛto niśi niśākaraḥ //

tau tathā tu mahārāja gadāhastau suduḥsahau /
anyonyaṃ vāgbhirugrābhistakṣamāṇau vyavasthitau //

apriyāṇi tato'nyonyamuktvā tau kurusattamau /
udīkṣantau sthitau tatra vṛtraśakrau yathā'have //

prītyā paramayā yuktāḥ samabhyarcya yathāvidhi /
āsanaṃ ca dadau tasmai paryapṛcchadanāmayam //

tato yudhiṣṭhiraṃ rāmo vākyametaduvāca ha /
madhuraṃ dharmasaṃyuktaṃ śūrāṇāṃ hitameva ca //

mayā śrutaṃ kathayatāmṛṣīṇāṃ rājasattama /
kurukṣetraṃ paraṃ puṇyaṃ pāvanaṃ svargyameva ca //

devatairṛṣibhirjuṣṭaṃ brāhmaṇaiśca mahātmabhiḥ /
tatra vai yotsyamānā ye dehaṃ tyakṣyanti mānavāḥ //

teṣāṃ svarge dhruvo vāsaḥ śakreṇa saha māriṣa /
tasmātsamantapañcakamito yāma drutaṃ nṛpa //