Mahabharata · Chapter 9.48

atyadbhutamidaṃ brahmañśrutavānasmi tattvataḥ /
abhiṣekaṃ kumārasya vistareṇa yathāvidhi //

yacchrutvā pūtamātmānaṃ vijānāmi tapodhana /
prahṛṣṭāni ca romāṇi prasannaṃ ca mano mama //

abhiṣekaṃ kumārasya daityānāṃ ca vadhaṃ tathā /
śrutvā me paramā prītirbhūyaḥ kautūhalaṃ hi me //

apāmpatiḥ kathaṃ hyasminnabhiṣiktaḥ purā suraiḥ /
tanme brūhi mahāprajña kuśalo hyasi sattama //
vaiśampāyana uvāca /

śṛṇu rājannidaṃ citraṃ pūrvakāle yathā'bhavat //

ādau kṛtayuge rājanvartamāne yathāvidhi /
varuṇaṃ devatāḥ sarvāḥ sametyedamathābruvan //

yathā'smānsurarāṭ śakro bhayebhyaḥ pāti sarvadā /
tathā tvamapi sarvāsāṃ saritāṃ vai patirbhava //

vāsaśca te sadā deva sāgare makarālaye /
samudro'yaṃ tava vaśe bhaviṣyati nadīpatiḥ //

somena sārdhaṃ ca tava hānivṛdvī bhaviṣyataḥ /
evamastviti tāndevānvaruṇo vākyamabravīt //

samāgamya tataḥ sarve varuṇaṃ sāgarālayam /
apāmpatiṃ pracakrurhi vidhidṛṣṭena karmaṇā //

abhiṣicya tato devā varuṇaṃ yādasāmpatim /
jagmuḥ svānyeva sthānāni pūjayitvā jaleśvaram //

abhiṣiktastato devairvaruṇo'pi mahāyaśāḥ / saritaḥ sāgarāṃścaiva nadāṃścāpi sarāṃsi ca /
pālayāmāsa vidhinā yathā devāñśatakratuḥ //

tatastratrāpyupaspṛśya dattvā ca vividhaṃ vasu / agnitīrthaṃ mahāprājño jagāmātha pralambahā /
naṣṭo na dṛśyate yatra śamīgarbhe dutāśanaḥ //

lokālokavināśe ca prādurbhūte tadā'nagha /
upatasthuḥ surā yatra sarvalokapitāmaham //

agniḥ pranaṣṭo bhagavānkāraṇaṃ ca na vidmahe /
sarvabhūtakṣayo rājansampādaya vibho'nalam //
janamejaya uvāca /

kimarthaṃ bhagavānagniḥ pranaṣṭo lokabhāvanāḥ /
vijñātaśca kathaṃ devaistanmamācakṣva tattvataḥ //
vaiśampāyana uvāca /

bhṛgoḥ śāpādbhṛśaṃ bhīto jātavedāḥ pratāpavān /
śamīgarbhamathāsādya nanāśa bhagavāṃstataḥ //

pranaṣṭe tu tadā vahnau devāḥ sarve savāsavāḥ /
anvaiṣanta tadā naṣṭaṃ jvalanaṃ bhṛśaduḥkhitāḥ //

tato'gnitīrthamāsādya śamīgarbhasthameva hi /
dadṛśurjvalanaṃ tatra vasamānaṃ yathāvidhi //

devāḥ sarve naravyāghra bṛhaspatipurogamāḥ /
jvalanaṃ taṃ samāsādya prītā'bhūvansavāsavāḥ //

punaryathāgataṃ jagmuḥ sarvabhakṣaśca so'bhavat /
bhṛgoḥ śāpānmahābhāga yaduktaṃ brahmavādinā //

tatrāpyāplutya matimānbrahmaśāpānmumoca ha //

tatrāplutya tato brahmā saha devaiḥ prabhuḥ purā /
sasarja cānnāni tathā devatānāṃ yathāvidhi //

tatra snātvā ca dattvā ca vasūni vividhāni ca /
kauberaṃ prayayau tīrthaṃ yatra taptvā mahattapaḥ //

dhanādhipatyaṃ samprāpto rājannailabilaḥ prabhuḥ //

tatrasthameva taṃ rājandhanāni nidhayastathā /
upataddhaturnaraśreṣṭha tattīrthaṃ lāṅgalī balaḥ //

gatvā snātvā ca vidhivadbrāhmaṇebhyo dhanaṃ dadau /
dadṛśe tatra tatsthānaṃ kaubere kānanottame //

purā yatra tapastaptaṃ vipulaṃ sumahātmanā /
yakṣarājñā kubereṇa varā labdhāśca puṣkalāḥ //

dhanādhipatyaṃ sakhyaṃ ca rudreṇāmitatejasā /
suratvaṃ lokapālatvaṃ putraṃ ca nalakūbaram //

yatra lebhe mahābāho dhanādhipatirañjasā /
abhiṣiktaśca tatraiva samāgamya marudgaṇaiḥ //

vāhanaṃ cāsya taddattaṃ haṃsayuktaṃ manojavam /
vimānaṃ puṣpakaṃ divyaṃ nairṛtaiśvaryameva ca //

tatrāplutya balo rājandattvā dāyāṃśca puṣkalān /
jagāma tvarito rāmastīrthaṃ svetānulepanaḥ //

niṣevitaṃ sarvasatvairnāmnā badarapācanam /
nānartukavanopetaṃ sadā puṣpaphalaṃ śubham //