Mahabharata · Chapter 9.33

evaṃ duryodhane rājangarjamāne muhurmuhuḥ /
yudhiṣṭhirasya saṅkruddho vāsudevo'bravīdidam //

yadī nāma hyayaṃ yūddhe varayettvāṃ yudhiṣṭhira /
arjunaṃ nakulaṃ caiva sahadevamathāpi vā //

kimidaṃ sāhasaṃ rājaṃstvayā vyāhṛtamīdṛśam /
ekameva nihatyājau bhava rājā kuruṣviti //

etena hi kṛtā yogyā varṣāṇīha trayodaśa /
āyase puruṣe rājanbhīmasenajighāṃsayā //

kathaṃ nāma bhavetkāryamasmādvi bharatarṣabha /
sāhasaṃ kṛtavāṃstvaṃ tu hyanukrośānnṛpottama //

nānyamasyānupaśyāmi pratiyoddhāramāhave /
ṛte vṛkodarātpārthātsa ca nātikṛtaśramaḥ //

tadidaṃ dyūtamārabdhaṃ punareva yathā purā /
viṣamaṃ śakuneścaiva tava caiva viśeṣataḥ //

balī bhīmaḥ samarthaśca kṛtī rājā suyodhanaḥ /
balavānvā kṛtī veti kṛtī rājanviśiṣyate //

so'yaṃ rājaṃstvayā śatruḥ same pathi niveśitaḥ /
nyastaścātmā suviṣame kṛcchramāpāditā vayam //

ko'nu sarvānvinirjitya śatrūnekena vairiṇā / [kṛcchraprāptena ca tathā hārayedrājyamāgatam.]
pātitaścaikabāṇena śocayedevamāhave //

na hi paśyāmi taṃ loke yo'dya duryodhanaṃ raṇe /
gadāhastaṃ vijetuṃ vai śaktaḥ syādamaropi hi //

phalguno vā bhavānvātha mādrīputrāvathāpi vā /
na samarthānahaṃ manye gadāhastasya saṃyuge //

na tvaṃ bhīmo na nakulaḥ sahadevo'tha phalgunaḥ /
jetuṃ nyāyena śakto vai kṛtī rājā suyodhanaḥ //

sa kathaṃ vadase śatruṃ yudhyasva gadayeti hi /
ekaṃ ca no nihatyājau bhava rājeti bhārata //

vṛkodaraṃ samāsādya saṃśayo vai jaye hi naḥ /
nyāyato yudhyamānānāṃ kṛtī hyeṣa mahābalaḥ //

[nūnaṃ na rājyabhāgeṣā pāṇḍoḥ kuntyāśca santatiḥ / atyantavanavāsāya sṛṣṭā bhaikṣyāya vā punaḥ // ]
bhīmasena uvāca /

madhusūdana mākārṣīviṣādaṃ yadunandana /
adya pāraṃ gamiṣyāmi vairasya bhṛśadurgamam //

ahaṃ suyodhanaṃ saṅkhye haniṣyāmi na saṃśayaḥ /
vijayo vai dhruvaḥ kṛṣṇa dharmarājasya dṛśyate //

adhyardhena guṇeneyaṃ gadā gurutarī mama /
na tathā dhārtarāṣṭrasya mākārṣīrmādhava vyathām //

anayā gadayānāhaṃ saṃyuge yoddhumutsahe /
bhavantaḥ prekṣakāḥ sarve mama santu janārdana //

sāmarānapi lokāṃstrīnnānāśastradharānyudhi /
yodhayeyaṃ raṇe kṛṣṇa kimutādya suyodhanam //
sañjaya uvāca /

tathā sambhāṣamāṇaṃ tu vāsudevo vṛkodaram /
hṛṣṭaḥ sampūjayāmāsa vacanaṃ cedamabravīt //

tvāmāśritya mahābāho dharmarājo yudhiṣṭhiraḥ /
nihatāriḥ svakāṃ dīptāṃ śriyaṃ prāpnotyasaṃśayam //

tvayā vinihatāḥ sarve dhṛtarāṣṭrasutā raṇe /
rājāno rājaputrāśca nāgāśca vinipātitāḥ //

kaliṅgā māgadhāḥ prācyā gāndhārāḥ kuravastathā /
tvāmāsādya mahāyuddhe nihatāḥ pāṇḍunandana //

hatvā duryodhanaṃ cāpi prayacchorvīṃ sasāgarām /
dharmarājāya kaunteya yathā viṣṇuḥ śacīpateḥ //

tvāṃ ca prāpya raṇe pāpo dhārtarāṣṭro vinaṅkṣyati /
tvamasya sakthinī bhanktvā pratijñāṃ pālayiṣyasi //

yatnena ha tvayā pāpo yoddhavyo dhṛtarāṣṭrajaḥ /
kṛtī ca balavāṃścaiva yuddhaśauṇḍaśca nityadā //

tatastu sātyakī rājanpūjayāmāsa pāṇḍavam /
vividhābhiśca taṃ vāgbhirbhimasenaṃ janeśvara //

pāñcālāḥ pāṇḍaveyāśca dharmarājapurogamāḥ /
tadvaco bhīmasenasya sarva evābhyapūjayan //

tato bhīmabalo bhīmo yudhiṣṭhiramathābravīt /
sṛñjayaiḥ saha tiṣṭhantaṃ tapantamiva bhāskaram //

ahametena saṅgamya saṃyuge yoddhumutsahe /
na hi śakto raṇe jetuṃ māmeṣa puruṣādhamaḥ //

adya krodhaṃ vimokṣyāmi nihitaṃ hṛdaye bhṛśam /
suyodhane dhārtarāṣṭre khāṇḍave'gnimivārjunaḥ //

śalyamadyoddhariṣyāmi tava pāṇḍava hṛcchayam /
nihate gadayā pāpe adya rājansukhī bhava //

adya kīrtimayīṃ mālāṃ pritamokṣye tavānagha /
prāṇāñśriyaṃ ca rājyaṃ ca mokṣyate'dya suyodhanaḥ //

rājā ca dhṛtarāṣṭro'dya śrutvā putraṃ mayā hatam /
smariṣyatyaśubhaṃ karma yattacchakunibuddhijam //

ityuktvā bharataśreṣṭho gadāmudyamya vīryavān /
udatiṣṭhata yuddhāya śakro vṛtramivāhvayan //

[tadāhvānamamṛṣyanvai tava putro'tivīryavān /
pratyupasthita evāśu matto mattamiva dvipam //

gadāhastaṃ tava sutaṃ yuddhāya samupasthitam /
dadṛśuḥ pāṇḍavāḥ sarve kailāsamiva śṛṅgiṇam] //

tamekākinamāsādya dhārtarāṣṭraṃ mahābalam /
viyūthamiva mātaṅgaṃ samahṛṣyanta pāṇḍavāḥ //

[na sambhramo na ca bhayaṃ na ca glānirna ca vyathā /
āsīdduryodhanasyāpi sthitaḥ siṃha ivāhave] //

samudyatagadaṃ dṛṣṭvā kailāsamiva śṛṅgiyām /
bhīmasenastadā rājanduryodhanamathābravīt //

rājñāpi dhṛtarāṣṭreṇa tvayā cāsmāsu yatkṛtam / smara tadduṣkṛtaṃ karmaṃ yadbhūtaṃ vāraṇāvate /

draupadī ca parāmṛṣṭā samāmadhye rajasvalā /
dyūte ca vañcito rājā śakūnerbuddhilāghavāt //

yāni cānyāni duṣṭātmanpāpāni kṛtavānasi /
anāgāsu ca pārtheṣu tasya paśya mahatphalam //

tvatkṛte nihataḥ śete śaratalpe mahāyaśāḥ /
yāṅgeyo bharataśreṣṭhaḥ sarveṣāṃ naḥ pitāmahaḥ //

hato droṇaśca karṇaśca itaḥ śalyaḥ pratāpavān /
vairāgnerādikartā ca śakunirnihato raṇe //

bhrātaraste hatāḥ śūrāḥ putrāśca sahasainikāḥ /
rājānaśca hatāḥ śūrāḥ samareṣvanivartinaḥ //

ete cānye ca nihatā bahavaḥ kṣatriyarṣabhāḥ /
prātikāmī tathā pāpo draupadyāḥ kleśakṛddhataḥ //

avaśiṣṭastvamevaikaḥ kulaghno'dhamapūruṣaḥ /
tvāmapyadya haniṣyāmi gadayā nātra saṃśayaḥ //

adya te'haṃ raṇe darpaṃ sarvaṃ nāśayitā nṛpa /
rājyāśāṃ vipulāṃ cāpi pāṇḍaveṣu ca duṣkṛtam //
duryodhana uvāca /

kiṃ katthitena bahunā yudhyasvādya mayā saha /
adya te'haṃ vineṣyāmi yuddhaśraddhāṃ vṛkodara //

kiṃ na paśyasi māṃ pāpa gadāyuddhe vyavasthitam /
himavacchikharākārāṃ pragṛhya mahatīṃ gadām //

gadinaṃ ko'dya māṃ pāpa hantumutsahate ripuḥ /
nyāyato yudhyamānaśca deveṣvapi purandaraḥ //

mā vṛthā garja kaunteya śāradābhramivājalam /
darśayasva balaṃ yuddhe yāvannāsūnnihanmi te //

tasya tadvacanaṃ śrutvā pāṇḍavāḥ sahasṛñjayāḥ /
sarve sampūjayāmāsustadvaco vijigīṣavaḥ //

unmattamiva mātaṅgaṃ talaśabdena mānavāḥ /
bhūyaḥ saṃharṣayāmāsū rājanduryodhanaṃ dviṣaḥ //

bṛṃhanti kuñjarāstatra hayā heṣanti cāsakṛt /
śastrāṇi sampradīpyante pāṇḍavānāṃ jayaiṣiṇām //