Mahabharata · Chapter 9.34

xxxxxxxxxxxsusaṃvṛtte sudāruṇe /
xxxxxxxxxxx pāṇḍaveṣu mahātmasu //

tatastāladhvajake rāmastayoryuddha upasthite /
śrutvā tacchiṣyayo rājannājagāma halāyudhaḥ //

taṃ dṛṣṭvā paramaprītāḥ pāṇḍavāḥ sahakeśavāḥ /
upagamyopasaṅgṛhya vidhivatpratyapūjayan //

pūjayitvā tataḥ paścādidaṃ vacanamabruvan /
śiṣyayoḥ kauśalaṃ yuddhe paśya rāmeti pārthiva //

abravīcca tadā rāmo dṛṣṭvā kṛṣṇaṃ sapāṇḍavam /
duryodhanaṃ ca kauravyaṃ gadāpāṇimavasthitam //
rāma uvāca /

catvāriṃśadahānyadya dve ca me niḥsṛtasya vai / puṣyeṇa samprayāto'smi śravaṇe punarāgataḥ /
śiṣyayorvai gadāyuddhaṃ druṣṭukāmo'smi mādhava //

tato yudhiṣṭhiro rājā pariṣvajya halāyudham /
svāgataṃ kuśalaṃ cāsmai paryapṛcchadyathātatham //

kṛṣṇau cāpi maheṣvāsāvabhivādya halāyudham /
sasvajāte pariprītau prīyamāṇau yaśasvinau //

mādrīputrau tathā śūrau draupadyāḥ pañca cātmajāḥ /
abhivādya sthitā rājanrauhiṇeyaṃ mahābalam //

bhīmaseno'tha balavānputrastava janādhipa /
tathaiva codyatagadau pūjayāmāsaturbalam //

svāgatena ca te tatra pratipūjya punaḥpunaḥ /
paśya yuddhaṃ mahābāho iti te rāmamabruvan //

evamucurmahātmānaṃ rauhiṇeyaṃ narādhipāḥ //

pariṣvajya tadā rāmaḥ pāṇḍavānsaha sṛñjayān / apṛcchatkuśalaṃ sarvānpārthivāṃścāmitaujasaḥ /
tathaiva te samāsādya papracchustamanāmayam //

pratyabhyarcya halī sarvānkṣatriyāṃśca mahātmanaḥ /
kṛtvā kuśalasampraśnaṃ saṃvidaṃ ca yathāvayaḥ //

janārdanaṃ sātyakiṃ ca premṇā sampariṣasvaje /
mūrdhni caitāvupāghrāya kuśalaṃ paryapṛcchata //

tau ca taṃ vidhivadrājanpūjayāmāsaturgurum /
brahmāṇāmiva deveśamindropendrau mudānvitau //

tato'bravīddharmasuto rauhiṇeyamarindamam /
idaṃ bhrātrormahāyuddhaṃ paśya rāmeti bhārata //

teṣāṃ madhye mahābāhuḥ śrīmānkeśavapūrvajaḥ /
nyaviśatparamaprītaḥ pūjyamāno mahārathaiḥ //

sa babhau rājamadhyastho nīlavāsāḥ sitaprabhaḥ /
divīva nakṣatragaṇaiḥ parivīto niśākaraḥ //

tatastayoḥ sannipātastumulo romaharṣaṇaḥ /
āsīdantakaro rājanvairasyāntaṃ vidhitsatoḥ //