Mahabharata · Chapter 9.20

tasmiṃstu nihate śūre sālve samitiśobhane /
tavābhajyadbalaṃ vegādvāteneva mahādrumaḥ //

tatprabhagnaṃ balaṃ dṛṣṭvā kṛtavarmā mahārathaḥ /
dadhāra samare śūraḥ śatrusainyaṃ mahābalaḥ //

sannivṛttāstu te śūrā dṛṣṭvā sātvatamāhave /
śailopamaṃ sthiraṃ rājankīryamāṇaṃ śarairyudhi //

tataḥ pravavṛte yuddhaṃ kurūṇāṃ pāṇḍavaiḥ saha /
nivṛttānāṃ mahārāja mṛtyuṃ kṛtvā nivartanam //

tatrāścaryamabhūdyudvaṃ sātvatasya paraiḥ saha /
yadeko vārayāmāsa pāṇḍusenāṃ durāsadām //

teṣāmanyonyasuhṛdāṃ kṛte karmaṇi duṣkare /
siṃhanādaḥ prahṛṣṭānāṃ divispṛksumahānabhūt //

tena śabdena vitrastānpāñcālānbharatarṣabha /
śinernaptā mahābāhuranvapadyata sātyakiḥ //

sa samāsādya rājānaṃ kṣemadhūrtiṃ mahābalam /
saptabhirniśitairbāṇairanayadyamasādanam //

tamāyāntaṃ mahābāhuṃ pravapantaṃ śitāñśarān /
javenābhyapatadvīmānhārdikyaḥ śinipuṅgavam //

tau siṃhāviva nardantau dhanvinau rathināṃ varau /
anyonyamabhidhāvantau śastrapravaradhāriṇau //

pāṇḍavāḥ sahapāñcālā yodhāścānye nṛpottamāḥ /
prekṣakāḥ samapadyanta tayoḥ puruṣasiṃhayoḥ //

nārācairvatsadantaiśca vṛṣṇyandhakamahārathau /
abhijaghnaturanyonyaṃ prahṛṣṭāviva kuñcarau //

carantau vividhānmārgānhārdikyaśinipuṅgavau /
muhurantardadhāte tau bāṇavṛṣṭyā parasparam //

cāpavegabalodvūtānmārgaṇānvṛṣṇisiṃhayoḥ /
ākāśe samapaśyāma pataṅgāniva śīghragān //

tamekaṃ satyakarmāṇamāsādya hṛdikātmajaḥ /
avidhyanniśitairbāṇaiścaturbhiścaturo hayān //

sa dīrghabāhuḥ saṅkruddhastotrārdita iva dvipaḥ /
aṣṭabhiḥ kṛtavarmāṇamavidhyatparameṣubhiḥ //

tataḥ pūrṇāyatotsṛṣṭaiḥ kṛtavarmā śilāśitaiḥ /
sātyakiṃ tribhirāhatya dhanurekena cicchide //

nikṛttaṃ taddhanuḥśreṣṭhamapāsya śinipuṅgavaḥ /
anyadādatta vegena śaineyaḥ saśaraṃ dhanuḥ //

tadādāya dhanuḥśreṣṭhaṃ variṣṭhaḥ sarvadhanvinām /
āropya ca dhanuḥ śīghraṃ mahāvīryo mahābalaḥ //

amṛṣyamāṇo dhanuṣaśchedanaṃ kṛtavarmaṇā /
kupito'tirathaḥ śīghraṃ kṛtavarmāṇamabhyayāt //

tataḥ suniśitairbāṇairdaśabhiḥ śinipuṅgavaḥ /
jaghāna sūtaṃ cāśvāṃśca dhvajaṃ ca kṛtavarmaṇaḥ //

tato rājanmaheṣvāsaḥ kṛtavarmā mahārathaḥ /
hatāśvasūtaṃ samprekṣya rathaṃ hemapariṣkṛtam //

roṣeṇa mahatā'viṣṭaḥ śūlamudyamya māriṣa /
cikṣepa bhujavegena jighāṃsuḥ śini puṅgavam //

tacchūlaṃ sātvato hyājau nirbhidya niśitaiḥ śaraiḥ / cūrṇitaṃ pātayāmāsa mohayanniva mādhavam /
tato'pareṇa bhallena hṛdyenaṃ samatāḍayat //

suyudve yuyudhānena hatāśvo hatasārathiḥ /
kṛtavarmā kṛtāstreṇa dharamīmanvapadyata //

tasminsātyakinā vīre dvairathe virathīkṛte /
samapadyata sarveṣāṃ sainyānāṃ sumahadbhayam //

putrāṇāṃ tava cātyarthaṃ viṣādaḥ samajāyata /
hatasūte hatāśve tu virathe kṛtavarmaṇi //

hatāśvaṃ ca samālakṣya hatasūtamarindama /
abhyadhāvatkṛpo rājañjighāṃsuḥ śinipuṅgavam //

tamāropya rathopasthe miṣatāṃ sarvadhanvinām /
apovāha mahābāhuṃ tūrṇamāyodhanādapi //

śaineye'dhiṣṭhite rājanvirathe kṛtavarmaṇi /
duryodhanabalaṃ sarvaṃ punarāsītparāṅmukham //

tatpare nānvabudhyanta sainyena rajasā vṛtāḥ /
tāvakāḥ pradrutā rājanduryodhanamṛte nṛpam //

duryodhanastu samprekṣya bhagnaṃ svabalamantikāt /
javenābhyapatattūrṇaṃ sarvāṃścaiko nyavārayat //

pāṇḍūṃśca sarvānsaṅkruddho dhṛṣṭadyumnaṃ ca pārṣatam /
śikhaṇḍinaṃ draupadeyānpāñcālānāṃ ca ye gaṇāḥ //

kekayānsomakāṃścaiva sṛñjayāṃścaiva māriṣa /
asambhramaṃ durādharṣaḥ śitairbāṇairavākirat //

atiṣṭhadāhave yattaḥ putrastava mahābalaḥ / yathā yajñe mahānagnirmantrapūtaḥ prakāśate /
tathā duryodhano rājā saṅgrāme sarvato'bhavat //

taṃ pare nābhyavartanta martyā mṛtyumivāhave /
athānyaṃ rathamāsthāya hārdikyaḥ samapadyata //