Mahabharata · Chapter 9.19

sannivṛtteṣu sainyeṣu sālvo mlecchagaṇādhipaḥ /
abhyadravatsusaṅkruddhaḥ pāṇḍavānāṃ mahadbalam //

āsthāya sumahānāgaṃ prabhinnaṃ parvatopamam /
saptamairāvataprakhyamamitragaṇamardanam //

yo'sau mahānbhadrakulaprasūtaḥ supūjito dhārtarāṣṭreṇa nityam /
sukalpitaḥ śāstraviniścayajñaiḥ sadaupavāhyaḥ samareṣu rājan //

airāvataṃ daityagaṇānvimṛdra-- ñśakro yathā sañjanayanbhayāni /
tamāsthito rājavaro babhūva yathodayasthaḥ savitā kṣapānte //

sa tena nāgapravareṇa rāja-- nnabhyudyayau pāṇḍusutānsametān /
śitaiḥ pṛṣatkairvidadāra vegai-- rmahendravajrapratimaiḥ sughoraiḥ //

tataḥ śarānvai sṛjato mahāraṇe yodhāṃśca rājannayato yamālayam /
nāsyānatraṃ dadṛśuḥ sve pare vā yathā purā vajradharasya daityāḥ //

te pāṇḍavāḥ somakāḥ sṛñjayāśca tamekanāgaṃ dadṛśuḥ samantāt /
sahasraśo vai vicarantamekaṃ yathā mahendrasya gajaṃ samīpe //

sandrāvyamāṇaṃ tu balaṃ pareṣāṃ paretakalpaṃ vibabhau samantataḥ /
naivāvatasthe samare bhṛśaṃ bhayā-- dvimṛdyamānaṃ tu parasparaṃ tadā //

tataḥ prabhagnā sahasā mahācamūḥ sā pāṇḍavī tena narādhipena /
diśaścatasraḥ sahasā vidhāvitā gajendravegaṃ tamapārayantī //

dṛṣṭvā ca tāṃ vegavatā prabhagnāṃ sarve tvadīyā yudhi yodhamukhyāḥ /
apūjayaṃste tu narādhipaṃ taṃ dadhmuśca śaṅkhāñśaśisannikāśān //

śrutvā ninādaṃ tvatha kauravāṇāṃ harṣādvimuktaṃ saha śaṅkhaśabdaiḥ /
senāpatiḥ pāṇḍavasṛñjayānāṃ pāñcālaputro mamṛṣe na kopāt //

tatastu taṃ vai dviradaṃ mahātmā pratyudyayau tvaramāṇo jayāya /
jambho yathā śakrasamāgame vai nāgendramairāvaṇamindravāhyam //

tamāpatantaṃ sahasā tu dṛṣṭvā pāñcālaputraṃ yudhi rājasiṃhaḥ /
taṃ vai dvipaṃ preṣayāmāsa tūrṇaṃ vadhāya rājandrupadātmajasya //

sa taṃ dvipendraṃ sahasāpatanta-- mavidhyadagnipratimaiḥ pṛṣatkaiḥ /
karmāradhautairniśitairjvaladbhi-- rnārācamukhyaistribhirugravegaiḥ //

tato'parānpañcaśatānmahātmā nārācamukhyānvisasarja kumbhe /
sa taistu viddhaḥ paramadvipo raṇe tadā parāvṛtya bhṛśaṃ pradudruve //

taṃ nāgarājaṃ sahasā praṇunnaṃ vidrāvyamāṇaṃ vinivartya sālvaḥ /
totrāṅkuśaiḥ preṣayāmāsa tūrṇaṃ pāñcālarājasya sutaṃ pradiśya //

dṛṣṭvā patantaṃ sahasā tu nāgaṃ dhṛṣṭadyumnaḥ svarathācchīghrameva /
gadāṃ pragṛhyograjavena vīro bhūmiṃ prapanno bhayavihvalāṅgaḥ //

sa taṃ rathaṃ hemavibhūṣitāṅgaṃ sāśvaṃ sasūtaṃ sahasā vimṛdya /
utkṣipya hastena nadanmahādvipo vipothayāmāsa vasundharātale //

pāñcālarājasya sutaṃ ca dṛṣṭvā tadārditaṃ nāgavareṇa tena /
tamabhyadhāvatsahasā javena bhīmaḥ śikhaṇḍī ca śineśca naptā //

śaraiśca vegaṃ sahasā nigṛhya tasyābhito vyāpatato gajasya /
sa saṅgṛhīto rathibhirgajo vai cacāla tairvāryamāṇaśca saṅkhye //

tataḥ pṛṣatkānpravavarṣa rājā sūryo yathā raśmijālaṃ samantāt /
tairāśugairvadhyamānā rathaughāḥ pradudruvuḥ sahitāstatratatra //

tatkarma sālvasya samīkṣya sarve pāñcālaputrā nṛpa sṛñjayāśca /
hāhākārairnādayanti sma yuddhe dvipaṃ samantādrurudhurnarāgryāḥ //

pāñcālaputrastvaritastu śūro gadāṃ pragṛhyācalaśṛṅgakalpām /
sasambhramaṃ bhārata śatrughātī javena vīro'nusasāra nāgam //

tatastu nāgaṃ dharaṇīdharābhaṃ madaṃ sravantaṃ jaladaprakāśam /
gadāṃ samātidhya bhṛśaṃ jaghāna pāñcālarājasya sutastarasvī //

sa bhinnakumbhaḥ sahasā vinadya mukhātprabhūtaṃ kṣatajaṃ vimuñcan /
papāta nāgo dharamīdharābhaḥ kṣitiprakampāccalito yathā'driḥ //

nipātyamāne tu tadā gajendre hāhākṛte tava putrasya sainye /
sa sālvarājasya śinipravīro jahāra bhallena śiraḥ śitena //

hṛtottamāṅgo yudhi sātvatena papāta bhūmau saha nāgarājñā /
yathā'driśṛṅgaṃ sumahatpraṇunnaṃ vajreṇa devādhipacoditena //