Mahabharata · Chapter 9.21

putrastu te mahārāja rathastho rathināṃ varaḥ /
durutsaho babhau yuddhe yathā rudraḥ pratāpavān //

tasya bāṇasahasraistu pracchannā hyabhavanmahī /
parāṃśca siṣice bāṇairdhārābhiriva parvatān //

na ca so'sti pumānkaścitpāṇḍavānāṃ balārṇave /
hayo gajo ratho vā'pi yaḥ syādbāṇairavikṣataḥ //

yaṃ yaṃ hi samare yodhaṃ prapaśyāmi viśāmpate /
sa sa bāṇaiścito'bhūdvai putreṇa tava bhārata //

yathā sainyena rajasā samudbhūtena vāhinī /
pratyadṛśyata sañchannā tathā bāṇairmahātmanaḥ //

bāṇabhūtāmapaśyāma pṛthivīṃ pṛthivīpate /
duryodhanena prakṛtāṃ kṣiprahastena dhanvinā //

teṣu yodhasahasreṣu tāvakeṣu pareṣu ca /
nāsti duryodhanasamaḥ pumāniti matirmama //

tatrādbhutamapaśyāma tava putrasya vikramam /
yadekaṃ sahitāḥ pārthā nābhyavartanta bhārata //

yudhiṣṭhiraṃ śatenājau vivyādha bharatarṣabha /
bhīmasenaṃ ca saptatyā sahadevaṃ ca pañcabhiḥ //

nakulaṃ ca catuḥṣaṣṭyā dhṛṣṭadyumnaṃ ca pañcabhiḥ /
pañcabhirdraupadeyāṃśca tribhirvivyādha sātyakim //

dhanuściccheda bhallena sahadevasya māriṣa /
tadapāsya dhanuśchinnaṃ mādrīputraḥ pratāpavān //

abhyadravata rājānaṃ pragṛhyānyanmahaddhanuḥ /
tato duryodhanaṃ saṅkhye vivyādha daśabhiḥ śaraiḥ //

nakulastu tato vīro rājānaṃ navabhiḥ śaraiḥ /
ghorarūpairmaheṣvāso vivyādha ca nanāda ca //

sātyakiścaiva rājānaṃ śareṇānataparvaṇā / draupadeyāstrisaptatyā dharmarājaśca pañcabhiḥ /
aśītyā bhīmasenaśca śarai rājānamārpayan //

samantātkīryamāṇastu bāṇasaṅghairmahātmabhiḥ /
na cacāla mahārāja sarvasainyasya paśyataḥ //

lāghavātsauṣṭhavāccāpi vīryāccāpi mahātmanaḥ /
ati sarvāṇi bhūtāni dadṛśuḥ sarvapārthivāḥ //

dhārtarāṣṭrā hi rājendra yodhāstu svalpamantaram /
apaśyamānā rājānaṃ paryavartanta daṃśitāḥ //

teṣāmāpatatāṃ ghorastumulaḥ samapadyata /
kṣubdhasya hi samudrasya prāvṛṭ्kāle yathā svanaḥ //

samāsādya raṇe te tu rājānamaparājitam /
pratyudyayurmaheṣvāsāḥ pāṇḍavānātatāyinaḥ //

bhīmasenaṃ raṇe kruddho droṇaputro nyavārayat / tayorbāṇairmahārāja pramuktaiḥ sarvatodiśam /
nājñāyanta raṇe vīrā na diśaḥ pradiśastathā //

tāvubhau krūrakarmāṇāvubhau bhārataduḥsahau /
ghorarūpamayudhyetāṃ kṛtapratikṛtaiṣiṇau //

trāsayantau diśaḥ sarvā jyākṣepakaṭhinatvacau /
śakunistu raṇe vīro yudhiṣṭhiramapīḍayat //

tasyāśvāṃścaturo hatvā subalasya suto vibho /
nādaṃ cakāra balavatsarvasainyāni kampayan //

etasminnantare vīraṃ rājānamaparājitam /
apovāha rathenājau sahadevaḥ pratāpavān //

athānyaṃ rathamāsthāya dharmaputro yudhiṣṭhiraḥ / śakuniṃ navabhirviddhvā punarvivyādha pañcabhiḥ /
nanāda ca mahānādaṃ pravaraḥ sarvadhanvinām //

tadyuddhamabhavaccitraṃ ghorarūpaṃ ca māriṣa /
prekṣatāṃ prītijananaṃ siddhacāraṇasevitam //

ulūkastu maheṣvāsaṃ nakulaṃ yuddhadurmadam /
abhyavarṣadameyātmā śaravarṣaiḥ samantataḥ //

tathaiva nakulaḥ śūraḥ saubalasya sutaṃ raṇe /
śaravarṣeṇa mahatā samantātparyavārayat //

tau tatra samare vīrau kulaputrau mahārathau /
yodhayantāvapaśyetāṃ kṛtapratikṛtaiṣiṇau //

tathaiva kṛtavarmāṇaṃ śaineyaḥ śatrutāpanaḥ /
yodhayañśuśubhe rājanbaliṃ śakra ivāhave //

duryodhano dhanuśchittvā dhṛṣṭadyumnasya saṃyuge /
athainaṃ chinnadhanvānaṃ vivyādha niśitaiḥ śaraiḥ //

dhṛṣṭadyumno'pi samare pragṛhya paramāyudham /
rājānaṃ yodhayāmāsa paśyatāṃ sarvadhanvinām //

tayoryuddhaṃ mahaccāsītsaṅgrāme bharatarṣabha /
prabhinnayoryathā saktaṃ mattayorvanahastinoḥ //

gautamastu raṇe kruddho draupadeyānmahābālān /
vivyādha bahubhiḥ śūraḥ śaraiḥ sannataparvabhiḥ //

tasya tairabhavadyuddhamindriyairiva dehinaḥ /
ghorarūpamasaṃvāryaṃ nirmaryādamavartata //

te ca sampīḍayāmāsurindriyāṇīva bāliśam /
sa ca tānpratisaṃrabdhaḥ pratyayodhayadāhave //

evaṃ citramabhūdyuddhaṃ tasya taiḥ saha bhārata /
utthāyotthāya hi yathā dehināmindriyairvibho //

narāścaiva naraiḥ sārdhaṃ dantino dantibhistathā /
hayā hayaiḥ samāsaktā rathino rathibhiḥ saha //

saṅkulaṃ cābhavadbhūyo ghorarūpaṃ viśāmpate //

idaṃ citramidaṃ ghoramidaṃ raudramiti prabho /
yuddhānyāsanmahārāja ghorāṇṇi ca bahūni ca //

te samāsādya samare parasparamarindamāḥ /
vyanadaṃścaiva jaghnuśca samātādya mahāhave //

teṣāṃ patrasamudbhūtaṃ rajastīvramadṛśyata /
vātena coddhataṃ rājandhāvadbhiścāśvasādibhiḥ //

rathanemisamudbhūtaṃ niḥśvāsaiścāpi dantinām /
rajaḥ sandhyābhrakalilaṃ divākarapathaṃ yayau //

rajasā tena sampṛkto bhāskaro niṣprabhaḥ kṛtaḥ /
sañchāditā'bhavadbhūmiste ca śūrā mahārathāḥ //

muhūrtādiva saṃvṛttaṃ nīrajaskaṃ samantataḥ /
vīraśoṇitasiktāyāṃ bhūmau bharatasattama //

upāśāmyattatastīvraṃ tadrajo ghoradarśanam //

tato'paśyamahaṃ bhūyo dvandvayuddhāni bhārata /
yathāprāṇaṃ yathāśreṣṭhaṃ madhyāhne vai sudāruṇam //

varmaṇāṃ tatra rājendra vyadṛśyantojjvalāḥ prabhāḥ / śabdaśca tumulaḥ saṅkhye śarāṇāṃ patatāmabhūt
mahāveṇuvanasyeva dahyamānasya parvate //